ក្លិប Manila Digger មកដល់កម្ពុជា ត្រៀមជួបព្រះខ័នរាជជាថ្មី ក្នុងវគ្គ ១/២ ពានកម្រិតទី៣ ទ្វីបអាស៊ី

ក្លិបបាល់ទាត់ Manila Digger របស់ហ្វីលីពីន បានធ្វើដំណើរមកដល់ប្រទេសកម្ពុជាហើយ កាលពីល្ងាចថ្ងៃចន្ទ ដើម្បីត្រៀមជួបក្រុមម្ចាស់ផ្ទះព្រះខ័នរាជស្វាយរៀង របស់កម្ពុជា ក្នុងជំនួបវគ្គពាក់កណ្ដាលផ្ដាច់ព្រ័ត្រជើងទី១ នៃពានរង្វាន់ក្លិបបាល់ទាត់កម្រិតទី៣ ទ្វីបអាស៊ី AFC Challenge League 2025/26 នាថ្ងៃទី៩ ខែមេសា ឆ្នាំ២០២៦ សប្ដាហ៍នេះ នៅពហុកីឡដ្ឋានជាតិមរតកតេជោ រាជធានីភ្នំពេញ។

នេះជាលើកទី២ ហើយ ដែលក្រុមខ្លាំងហ្វីលីពីននេះ បានធ្វើដំណើរមកកាន់ទឹកដីអរិច្ឆរៈ ក្នុងបេសកកម្មប្រកួតពានកម្រិតទី៣ ប្រចាំទ្វីបអាស៊ី បន្ទាប់ពីមកទឹកដីកម្ពុជាលើកដំបូង កាលពីចុងឆ្នាំ២០២៥ បានចូលរួមការប្រកួតវគ្គចែកពូល និងធ្លាប់ប្រកួតស្មើក្រុមព្រះខ័នរាជស្វាយរៀង ២-២ ម្ដងរួចមកហើយ។ ប៉ុន្ដែជំនួបលើកនេះ អាចនឹងមានការប្រកួតប្រជែងកាន់តែខ្លាំង ដ្បិតក្រុមនីមួយៗ បានរៀបចំ និងត្រៀមខ្លួនកាន់តែល្អ មុនការប្រកួតមកដល់។

មុនធ្វើដំណើរមកកម្ពុជា ក្រុម Manila Digger បានបង្ហាញពីភាពខ្លាំងរបស់ខ្លួន ជាមួយការត្រៀមកាន់តែមុតស្រួច ដើម្បីតតាំងជាមួយក្រុមព្រះខ័នរាជស្វាយរៀង ហើយកាន់តែស្រេកឃ្លាននូវជ័យជម្នះជាងមុន។ ដោយឡែកលោក McConkey Matthew គ្រូបង្វឹកព្រះខ័នរាជស្វាយរៀង ធ្លាប់បានលើកឡើង និងទទួលស្គាល់ថា ការប្រកួតលើកនេះ នឹងមិនងាយស្រួល ដ្បិតក្រុមនីមួយៗ បាននាំចូលកីឡាករថ្មីៗ តែលោកនៅតែជឿជាក់លើក្រុមខ្លួន នឹងអាចសម្រេចតាមផែនការរៀបចំ ដើម្បីឡើងទៅវគ្គបន្ដ។

គួរដឹងថា សម្រាប់ជំនួបវគ្គពាក់កណ្ដាលផ្ដាច់ព្រ័ត្រ រវាងក្រុមទាំងពីរ នឹងធ្វើធ្វើឡើង ២ជើង ដោយជើងទី១ ព្រះខ័នរាជស្វាយរៀង ត្រូវធ្វើម្ចាស់ផ្ទះ និងជើងទី២ ត្រូវប្រកួតនៅទឹកដីក្លិប Manila Digger  នាប្រទេសហ្វីលីពីនវិញម្ដង នាថ្ងៃទី១៦ ខែមេសា ឆ្នាំ២០២៦ ខាងមុខ។ ដូច្នេះជំនួបជើងទី១ នាថ្ងៃព្រហស្បត្តិសប្ដាហ៍នេះ ពិតជាមានសារៈសំខាន់ សម្រាប់ក្រុមជើងឯកលីគកំពូលកម្ពុជា ក្នុងការស្វែងរកលទ្ធផលល្អប្រសើរ សម្រាប់ជាដើមទុនប្រជែងកៅអីវគ្គផ្ដាច់ព្រ័ត្រពានរង្វាន់ AFC Challenge League 2025/26 រដូវកាលនេះ៕ អត្ថបទ លី ឈុនឡា