តំណាងសិស្ស-និស្សិតនៅកូវ៉ែត រំពឹងវគ្គផ្ដាច់ព្រ័ត្រ ACGL នឹងធ្វើឲ្យពិភពអារ៉ប់ស្គាល់ច្បាស់ពីក្លិប និង​ប្រទេសកម្ពុជា

យុវជន ម៉ាត់ ស៊ីនីន តំណាងសិស្ស-និស្សិសកម្ពុជា ដែលកំពុងសិក្សានៅប្រទេសកូវ៉ែត រំពឹង​ជំនួប​រវាង​ក្រុម​ព្រះខ័ន​រាជស្វាយរៀង របស់កម្ពុជា និងក្រុម Al Kuwait របស់កូវ៉ែត ក្នុងវគ្គផ្ដាច់​ព្រ័​ត្រ​ពាន​រង្វាន់​កម្រិតទី៣ ទ្វីបអាស៊ី AFC Challenge League (ACGL) 2025/26 ​នឹង​ធ្វើ​ឲ្យ​ពិភព​អារ៉ាប់​ស្គាល់កា​ន់តែច្បាស់ពីក្លិបបាល់ទាត់ និងប្រទេសកម្ពុជា។

ការលើកឡើងនេះ ស្របពេលជំនួបវគ្គផ្ដាច់ព្រ័ត្រ រវាងក្រុមតំណាងប្រទេសទាំងពីរ នឹងមក​ដល់​នា​ថ្ងៃ​ទី១៣ ខែឧសភា ឆ្នាំ២០២៦ ខាងមុខ នៅពហុកីឡដ្ឋានជាតិ Jaber Al-Ahmad International ស្ថិតនៅរដ្ឋធានីកូវ៉ែត នៃរដ្ឋកូវ៉ែត។

យុវជនខ្មែរ​រូប​នេះថា សិស្ស-និស្សិតកម្ពុជា ដែលកំពុងសិស្សានៅរដ្ឋកូវ៉ែត ពិតជារំភើប និងមាន​មោទន​ភាព ចំពោះព្រឹត្តិការណ៍ប្រវត្តិ និងកម្រ លើទឹកដីអារ៉ាប់នេះ ហើយតាម​រយៈ​ការ​ប្រកួត​វគ្គ​ផ្ដាច់​ព្រ័ត្រ​នាសប្ដាហ៍ក្រោយនេះ នឹងពាំនាំវិស័យកីឡាបាល់ទាត់កម្ពុជា ក៏ដូចជាឲ្យ​ពិភព​អារ៉ាប់​ស្គាល់​ពី​ប្រទេស​កម្ពុជាកាន់តែច្រើន។

គួរដឹងថា ជំនួបវគ្គផ្ដាច់ព្រ័ត្រពានរង្វាន់កម្រិតទី៣ ទ្វីបអាស៊ី រវាងព្រះខ័នរាជស្វាយរៀង និង​ក្រុម​ម្ចាស់​ផ្ទះ ​Al Kuwait នឹងចាប់ផ្ដើមការប្រកួតនាវេលាម៉ោង ៧ និង ១៥នាទីយប់ សម្រាប់ម៉ោង​នៅ​រដ្ឋ​កូវ៉ែត​ ត្រូវនឹងម៉ោង ១១ និង ១៥នាទីយប់ សម្រាប់ម៉ោងនៅកម្ពុជា៕ អត្ថបទ លី ឈុនឡា