ប្រធាន AFF ជូនពរព្រះខ័នរាជទទួលបានជោគជ័យ និងកសាងប្រវត្តិសាស្ដ្រថ្មី ក្នុងនាមក្លិបបាល់ទាត់កម្ពុជា

ក្លិបព្រះខ័នរាជស្វាយរៀង របស់កម្ពុជា នឹងត្រូវជួបក្រុម Al Kuwait SC របស់ម្ចាស់ផ្ទះកូវ៉ែត នាវេលាម៉ោង ៧៖១៥នាទី ម៉ោងក្នុងតំបន់ ត្រូវនឹងម៉ោង ១១៖១៥នាទីយប់ (ម៉ោងនៅកម្ពុជា) នៅរាត្រីថ្ងៃទី១៣ ខែឧសភា ឆ្នាំ២០២៦ នេះ នៅពហុកីឡដ្ឋានជាតិកូវ៉ែត Jaber Al Ahmad International  ក្នុងវគ្គផ្ដាច់ព្រ័ត្រពានរង្វាន់លំដាប់ទី៣ ទ្វីបអាស៊ី (AFC Challenge League) ឆ្នាំ២០២៥/២៦។

នេះគឺជាការប្រកួតដ៏ធំមួយ ដែលកំពុងទាក់ទាញអ្នកគាំទ្របាល់ទាត់ពិភពលោក ពិសេស នៅទ្វីបអាស៊ី ហើយអ្នកគាំទ្រ និងប្រជាពលរដ្ឋកម្ពុជាជាច្រើនបានផ្ញើសារគាំទ្រ និងលើកទឹកចិត្ដដល់ក្លិបព្រះខ័នរាជស្វាយរៀង ក្នុងនោះឯកឧត្តម ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា និងជាប្រធានសហព័ន្ធកីឡាបាល់ទាត់អាស៊ីអាគ្នេយ៍(AFF) ក៏បានជូនពរក្លិបតំណាងព្រះរាជាណាចក្រកម្ពុជា និងជាក្លិបក្នុងតំបន់តែមួយគត់ ដែលបានឡើងវគ្គផ្ដាច់ព្រ័ត្រពានកម្រិតទ្វីប នារដូវកាលនេះដែរ។

ឯកឧត្តម ខៀវ សាម៉េត បានជូនពរក្លិបព្រះខ័នរាជស្វាយរៀង ឲ្យទទួលបានជោគជ័យក្នុងការប្រកួតវគ្គផ្ដាច់ព្រ័ត្រនេះ និងបានកសាងនូវប្រវត្តិសាស្ដ្រថ្មី ក្នុងនាមក្លិបបាល់ទាត់កម្ពុជា។

សូមបញ្ជាក់ថា នេះជាឆ្នាំទី២ ដែលក្លិបបាល់ទាត់កម្ពុជា ពោលគឺក្លិបព្រះខ័នរាជស្វាយរៀង បានឡើងវគ្គផ្ដាច់ព្រ័ត្រពានកម្រិតទី៣ ទ្វីបអាស៊ីនេះ បន្ទាប់ពីរដូវកាលមុន ការប្រកួតវគ្គផ្ដាច់ព្រ័ត្រ បានធ្វើឡើងនៅពហុកីឡដ្ឋានជាតិមរតកតេជោ រាជធានីភ្នំពេញ តែគួរឲ្យស្ដាយ ព្រះខ័នរាជស្វាយរៀង ទទួលបានត្រឹមជើងឯករង ក្រោយចាញ់ក្រុម AK Arkadag ទាំងប្រផិតប្រផើង ២-១ ។ យ៉ាងណាការប្រកួតវគ្គផ្ដាច់ព្រ័ត្រក្រៅដី នារាត្រីនេះ ប្រជាពលរដ្ឋកម្ពុជាជាច្រើន បានគាំទ្រ និងសង្ឃឹមថា ព្រះខ័នរាជស្វាយរៀង នឹងអាចធ្វើបាន ដើម្បីនាំយកពានរង្វាន់អន្ដរជាតិលើកដំបូងជូនជាតិមាតុភូមិ៕ អត្ថបទ លី ឈុនឡា