សហព័ន្ធទ្រីយ៉ាត្លុងត្រៀមបញ្ជូនកីឡាការិនី២រូប ចូលរួមប្រកួតកីឡាអាស៊ី នៅប្រទេសជប៉ុន ខែក្រោយ

សហព័ន្ធទ្រីយ៉ាត្លុងត្រៀមបញ្ជូនកីឡាការិនី២រូបរូបចូលរួមព្រឹតិ្តការណ៍ការប្រកួតកីឡាអាស៊ី លើកទី ២០ ឆ្នាំ២០២៦ “The 20th Asian Games Aichi-Nagoya 2026” នឹងប្រព្រឹត្តទៅចាប់ពីថ្ងៃទី១៩ ខែកញ្ញា ដល់ថ្ងៃទី៤ ខែតុលា ឆ្នាំ២០២៦ នៅទូទាំងខេត្តអៃឈី និងរដ្ឋធានីណាហ្គោយ៉ា ប្រទេសជប៉ុន។

លោក ងិន សុខបញ្ញា អគ្គលេខាធិការ សហព័ន្ធកីឡាទ្រីយ៉ាត្លុងកម្ពុជាបានគូសបញ្ជាក់ថា សហព័ន្ធត្រៀមបញ្ជូនកីឡាការិនី២រូប ដើម្បីទៅចូលរួមប្រកួតកីឡាអាស៊ីនាពេលខាងមុខនេះ រួមមាន កីឡាការិនីឆ្នើមកូនកាត់ខ្មែរ-បារាំង ម៉ាហ្គត មរកត ហ្គារ៉ាប៊ីឌៀន ដែលជាម្ចាស់មេដាយមាសស៊ីហ្គេម ២០២៣ និងជាម្ចាស់មេដាយប្រាក់១គ្រឿង កីឡាឆ្នេរខ្សាច់អាស៊ី នៅចិន ២០២៦ និងកីឡាការិនី កូនកាត់ខ្មែរ-បារាំង ឡាប្លាណេតា កាឡាទេវីម៉ារាជិនីម៉ារីជាកីឡាការិនីថ្មីរបស់សហព័ន្ធ ។

អគ្គលេខាធិការ រូបនេះបន្ថែមថា ការប្រកួតកីឡាអាស៊ី នៅប្រទេសជប៉ុននេះ គឺក្នុង១ប្រទេសចុះឈ្មោះបានតែកីឡាករ២នាក់ ឬកីឡាការិនី២នាក់ប៉ុណ្ណោះ ដូច្នេះហើយទើបសហព័ន្ធទទួលបានគោលការណ៍ពីក្រសួងអប់រំ យុវជនផងនោះបញ្ជូនតែកីឡាការិនី២នាក់ទៅចូលរួមប្រកួតវិញ្ញាសាទ្រីយ៉ាត្លុងនារី ដែលមានហែលទឹក ៧៥០ម៉ែត្រ ជិះកង់ ២០គីឡូម៉ែត្រ និងរត់ប្រណាំង៥គីឡូម៉ែត្រ។ លោក ងិន សុខបញ្ញា សង្កត់ធ្ងន់ថា ការប្រកួតកីឡាអាស៊ី ក្នុងប្រភេទកីឡាទ្រីយ៉ាត្លុងនេះ គឺមានកម្រិតប្រហាក់ប្រហែលអូឡាំពិកហ្គេមទៅហើយ ដោយសារបណ្តាប្រទេសនានា ក្នុងអាស៊ីសុទ្ធសឹងតែមានអត្តពលិកខ្លាំងៗ ដែលម្ចាស់ផ្ទះជប៉ុនស្ថិតក្នុងកម្រិត Top10 ក្នុងពិភពលោក និងប្រទេសចិនក៏ខ្លាំងប្រហាក់ប្រហែលគ្នាដែរ។ យ៉ាងណាលោកសង្ឃឹមខ្លះៗដែរថា កីឡាការិនីទ្រីយ៉ាត្លុងកម្ពុជានឹងអាចធ្វើបានល្អ អាចឈានទៅរកមេដាយសំរិទ្ធិ១គ្រឿងផងដែរ។

សូមបញ្ជាក់ថា ព្រឹតិ្តការណ៍ការប្រកួតកីឡាអាស៊ី លើកទី ២០ ឆ្នាំ២០២៦ នៅប្រទេសជប៉ុន ចាប់ផ្តើមពីថ្ងៃទី ១៩សីហា ដល់ថ្ងៃទី៤ តុលា មាន៤៥ប្រទេសចូលរួមប្រកួតប្រជែងដណ្តើមមេដាយ។ កម្ពុជាបានបញ្ជូនប្រភេទកីឡាមួយចំនួនទៅចូលរួមប្រកួត ក្នុងនោះក៏មានប្រភេទកកីឡាទ្រីយ៉ាត្លុងចូលរួមផងដែរ៕