គ្រូពេទ្យខេត្តកោះកុង សង្រ្គោះស្រ្តីម្នាក់សម្រាលកូនលើទូកដោយសុវត្ថិភាព

កោះកុង៖ ក្រុមគ្រូពេទ្យផ្នែកសម្ភព និងរោគស្ត្រី នៃមន្ទីរពេទ្យបង្អែកខេត្តកោះកុង បាន​ចុះជួយ​សង្គ្រោះ​ស្ត្រីសម្រាលកូននៅលើទូកដោយសុវត្ថិភាព ក្នុងកំឡុងពេលធ្វើដំណើរ​នៅ​លើផ្ទៃ​សមុទ្រ​មក​កាន់​មន្ទីរពេទ្យ។។

ស្រ្តីដែល​សម្រាលកូនលើទូក ហើយត្រូវបានក្រុមគ្រូពេទ្យជួយសង្រ្គោះកាលពីម៉ោង៤ទាបភ្លី ថ្ងៃទី៤ ខែកញ្ញា ឆ្នាំ២០២៤ មានឈ្មោះ នឿន ស្រីនី អាយុ២៧ឆ្នាំ រស់នៅភូមិកោះស្រឡៅ (នៅលើកោះ) ឃុំកោះកាពិ ស្រុកកោះកុង។

លោក​វេជ្ជបណ្ឌិត ហៃ ឡៃសុន ប្រធានមន្ទីរពេទ្យបង្អែកខេត្តកោះកុង បានឱ្យដឹងព្រឹកថ្ងៃទី៤ ខែ​កញ្ញានេះថា បន្ទាប់ពីទទួលដំណឹងពីប្រជាពលរដ្ឋថាស្ត្រីខាងលើ បាន​សម្រាល​កូន​នៅ​លើ​ទូក​លើ​ផ្ទៃ​សមុទ្រ លោកបានចាត់ក្រុមគ្រូពេទ្យចុះសង្រ្គោះភ្លាមៗទោះបីមានព្យុះភ្លៀងយ៉ាងណាក៏ដោយ ក្នុង​កំឡុងពេលកំពុងធ្វើដំណើរតាមទូក។

បើតាមលោកវេជ្ជបណ្ឌិត ហៃ ឡៃសុន ស្រ្តីដែលឈឺពោះសម្រាលកូន បានសង្រ្គោះប្រកប​ដោយ​សុវត្ថិភាព​ទាំងម្តាយ និងទារក ដោយទារកនោះជាកូនទី៣ ភេទស្រី ទំងន់៣,២គីឡូក្រាម។ បច្ចុប្បន្ន​ក្រុមគ្រូពេទ្យបានបញ្ជូនតាមរយៈរថយន្តសង្គ្រោះមកបន្តការថែទាំ ព្យាបាលនៅផ្នែកសម្ភព និង​រោគស្ត្រី នៃមន្ទីពេទ្យបង្អែកខេត្តកោះកុង៕ អត្តបទៈឈឹម មករា