កម្ពុជាគ្រោងចំណាយថវិកាប្រមាណពីរពាន់លានដុល្លារ ដើម្បីបន្សុំានឹងការប្រែប្រួលអាកាសធាតុ

ក្នុងរយៈពេល១០ឆ្នាំ ចាប់ពីឆ្នាំ២០២០ រហូតដល់ឆ្នាំ២០៣០ ប្រទេសកម្ពុជា​មានផែនការ​ចំណាយ​ថវិកាប្រមាណពីរពាន់លានដុល្លាសហរដ្ឋអាមេរិក ដើម្បីបន្សុំាទៅនឹង​ការ​ប្រែប្រួល​អាកាស​ធាតុ​។ នេះបើតាមប្រសាសន៍ឯកឧត្តមបណ្ឌិត ហេង ចាន់ធឿន អគ្គនាយករង នៃ​អគ្គ​នាយក​ដ្ឋាន​គោល​នយោបាយ និងយុទ្ធសាស្រ្តក្រសួងបរិស្ថាន និងជានាយកគម្រោងជាតិ បានលើកឡើង​ក្នុង​សិក្ខា​សាលា​អភិវឌ្ឍសមត្ថភាពស្តីពីការប្រែប្រួលអាកាសធាតុសម្រាប់អ្នកសារព័ត៌មាន និងវិស័យ​ឯកជន នៅថ្ងៃទី២៦ ខែកញ្ញានេះ ស្ថិតនៅសណ្ឋាគារកាំបូឌីយ៉ាណា រាជធានីភ្នំពេញ។

ឯកឧត្តមបណ្ឌិត ហេង ចាន់ធឿន បានឱ្យដឹងទៀតថា ក្នុងចំណោម​ថវិកា​ប្រមាណ​ពីរ​ពាន់​លាន​ដុល្លារ ដើម្បីបន្សុំាទៅនឹងការប្រែប្រួលអាកាសធាតុនេះ មានវិស័យចំនួន៣ ដែលមាន​អាទិភាព​ខ្ពស់​ជាង​គេ ដែលក្នុងនោះរួមមាន៖វិស័យធនធានទឹក កសិកម្ម និងហេដ្ឋារចនាសម្ព័ន្ធ។ក្រៅពីនេះ មានវិស័យបន្ទាប់បន្សុំផ្សេងៗទៀត។ ឯកឧត្តមបន្តទៀត សម្រាប់ការកាត់​បន្ថយ​ឧស្ម័ន​ផ្ទះ​កញ្ចក់​វិញ ដោយគិតចាប់ពីឆ្នាំ២០២០ រហូតដល់ឆ្នាំ២០៣០ កម្ពុជាមានផែនការ​ចំណាយ​ថវិ​កាជិ​ត​៦​ពាន់​លានដុល្លារសហរដ្ឋអាមេរិក។

ការប្រែប្រួលអាកាសធាតុ គឺជាការប្រែប្រួលស្ថានភាពអាកាសធាតុដែលអា​ច​កំណត់​អត្ត​សញ្ញាណ​បាន​តាម​រយៈការវិភាគស្ថិតិ ដែលមានការប្រែប្រួលតួលេខមធ្យម និងតួលេខអថេរនៃអាកាសធាតុ ហើយ​ការប្រែប្រួលនោះបន្តកើតឡើងក្នុងរយៈពេលវែងជាច្រើនទសវត្សរិ៍ ឫយូជាងនេះ។ មូល​ហេតុ​នៃ​ការ​ប្រែប្រួលអាកាសធាតុមានដូចជា៖ការបំភាយឧស្ម័នកាបូនិច មេតាន និងឌីអាសូត​មូណូ​អុកស៊ីតជាដើម។

នៅឆ្នាំ២០២៣កន្លងទៅ តាមរយៈកិច្ចប្រជុំកំពូលក្របខណ្ឌUN ស្តីពីការប្រែប្រួលអាកាសធាតុ COP-28 នៅទីក្រុងឌូបៃ ប្រទេសកម្ពុជា បានប្តេជ្ញា​ចិត្ត​ខ្ពស់​ដើម្បី​ចូល​រួម​ទប់​ស្កាត់​ការ​ប្រែប្រួល​អាកា​ស​ធាតុ។ ការប្តេជ្ញាចិត្តនោះមានដូចជា៖ លុប​ចោល​គម្រោង​រោង​ចក្រ​អគ្គិសនី​ដើរ​ដោយ​ធ្យូងថ្ម ៧០០MW ជំនួសមកវិញដោយរោងចក្រអគ្គិសនីដើរដោយឧស្ម័នLPGវិញ។ អភិវឌ្ឍថ្មី​នៃ​ទំនប់ស្តុកទឹក ដើម្បីផលិតថាមពលអគ្គិសនីស្អាត ១០០០MW ឱ្យបានមុនឆ្នាំ២០២៨។ បង្កើន​ថា​មពលកកើតឡើងវិញ ដែលភាគច្រើនជាថាមពលពន្លឺព្រះអាទិត្យ ថាមពលវារីអគ្គិសនី និង ថាមពលខ្យល់ ឱ្យបានដល់កម្រិត៧០ភាគរយ និងដាំដើមឈើយ៉ាងតិច១លានដើមក្នុងមួយឆ្នាំ និងផែនការផ្សេងៗជាច្រើនទៀត៕ អត្ថបទ៖ទូច សោភ័ណ