កិច្ចប្រជុំ COP29 បន្ថែមម៉ោង ខណៈប្រទេសក្រីក្រច្រានចោលការផ្តល់ឲ្យ២៥០ពាន់លានដុល្លារពីប្រទេសអ្នកមាន

ការចរចាដ៏ក្តៅគគុកស្តីពីកិច្ចព្រមព្រៀងអាកាសធាតុសកល ត្រូវបានកំណត់ថាឈានចូលដល់ថ្ងៃសៅរ៍នេះ បន្ទាប់ពីប្រទេសកំពុងអភិវឌ្ឍ បានច្រានចោលការផ្តល់ឲ្យដំបូងចំនួនត្រឹមតែ២៥០ពាន់លានដុល្លារ ពីប្រទេសអ្នកមាន ដើម្បីជួយពួកគេដោះស្រាយការឡើងកម្តៅភពផែនដីសកល។

ប្រទេសអាស៊ែបៃហ្សង់ ដែលធ្វើជាម្ចាស់ផ្ទះកិច្ចប្រជុំអាកាសធាតុ COP29 បាននិយាយថាការចរចា បានអូសបន្លាយ «រហូតដល់យប់» នៅក្នុងទីក្រុង Baku សមុទ្រ Caspian ដើម្បីបង្កើតបានកិច្ចព្រមព្រៀងចុងក្រោយ។ បញ្ហា នឹងត្រូវបានដាក់នៅចំពោះមុខប្រទេសជិត២០០ សម្រាប់កិច្ចព្រមព្រៀងជាឯកច្ឆន្ទ នៅថ្ងៃសៅរ៍នេះ។

សំណើដែលត្រូវបានច្រានចោល បានលើកឡើងពីការប្តេជ្ញាចិត្តដែលមានស្រាប់ចំនួន១០០ពាន់លានដុល្លារក្នុងមួយឆ្នាំពីប្រទេសអ្នកមាន ប៉ុន្តែបានធ្លាក់ចុះយ៉ាងខ្លាំងពីអ្វីដែលអ្នកជំនាញនិយាយថាប្រទេសកំពុងអភិវឌ្ឍ ត្រូវការ។

ប្រទេសអាស៊ែបៃហ្សង់ដែលជាម្ចាស់ផ្ទះកិច្ចប្រជុំស្តីពីអាកាសធាតុ COP29 បានជំរុញឱ្យប្រទេសនានា បន្តខិតខំ ប៉ុន្តែបានទទួលស្គាល់ថា តួលេខទឹកប្រាក់២៥០ពាន់លានដុល្លារអាមេរិក ដែលនឹងត្រូវឈានដល់នៅឆ្នាំ២០៣៥ គឺមិន «យុត្តិធម៌ ឬជាមហិច្ឆតា» ដែលត្រូវការគ្រប់គ្រាន់នោះទេ។

សម្ព័ន្ធនៃរដ្ឋដីកោះតូចៗ ដែលបម្រែបម្រួលអាកាសធាតុ គឺជាការគំរាមកំហែងអត្ថិភាព បាននិយាយថា ការផ្តល់ឲ្យនេះ បង្ហាញពី «ការមិនគោរពដល់ជនងាយរងគ្រោះរបស់យើង»។