កម្ពុជា-ចិន ពិភាក្សាអំពីកាលានុវត្តភាពវិនិយោគវិស័យអគ្គិសនីនៅកម្ពុជា

កម្ពុជា-ចិន ពិភាក្សាអំពីកាលានុវត្តភាពវិនិយោគនៅកម្ពុជា និងការចូលរួមចំណែករបស់ក្រុមហ៊ុន ក្នុង​ការធ្វើឱ្យប្រសើរឡើងនូវការ ផ្គត់ផ្គង់ថាមពលអគ្គិសនី ជាពិសេស​ថាមពល​អគ្គិសនី​ដែល​ប្រើប្រាស់​ដោយ​ធ្យូងថ្ម ពន្លឺព្រះអាទិត្យ និងឧស្ម័នធម្មជាតិ (LNG)។

ឯកឧត្ដម សួន សុផល អគ្គលេខាធិការរងគណៈកម្មាធិការវិនិយោគកម្ពុជា នៅក្នុងជំនួប​ពិភាក្សា​ការងារ​ជាមួយ គណៈ ប្រតិភូចិន មកពីខេត្ត Zhejiang ដឹកនាំដោយលោក Yang Yaming ប្រធាន​សារមន្ទីរសិល្បៈសេរ៉ាមិចទំនើប ខេត្ត Zhejiang និងក្រុមហ៊ុន Xianghu Ceramic Art island Zhejiang Co., Ltd. នៅចុងសប្តាហ៍កន្លងនេះ, ឯកឧត្តម បានសម្តែងនូវការស្វាគមន៍ យ៉ាង​កក់​ក្តៅ ជូនចំពោះគណៈប្រតិភូចិន ដែលបានចំណាយពេលវេលាដ៏មានតម្លៃ មកធ្វើទស្សន​កិច្ច​សិក្សា​ដោយ​ផ្ទាល់កម្ពុជា បីស្វែងយល់ពីកាលានុវត្តភាពវិនិយោគ និងសក្តានុពល​វិនិយោគ​របស់​កម្ពុជា។

ក្នុងជំនួបនេះ, ឯកឧត្តមអគ្គលេខាធិការរង បានជម្រាបជូន​ពីកាលា​នុវត្ត​ភាព​វិនិយោគ​ក្នុង​វិស័យ​អាទិភាព​មួយចំនួន និងកំណើនខ្ពស់នៃការវិនិយោគនៅកម្ពុជា និងការអភិវឌ្ឍន៍តំបន់​សេដ្ឋកិច្ច​ពិសេស​នៅ​កម្ពុជា ដែលបានចូលរួមធ្វើពិពិធកម្មសេដ្ឋកិច្ចកម្ពុជា តាមរយៈការទាក់ទាញ​ឧស្សាហកម្ម​ថ្មី​ៗដូ​ចជា៖ ការផលិតថាមពលប្រើប្រាស់ដោយធ្យូងថ្ម និងផលិតបន្ទះស្រូប​ដោយ​ពន្លឺ​ព្រះអាទិត្យ, លើសពីនេះទៀត ឯកឧត្តមបានជំរុញលើកទឹកចិត្តក្រុមហ៊ុន ឱ្យធ្វើការពិភាក្សា​ជាមួយ​តួអង្គពាក់ព័ន្ធ ជាពិសេសក្រសួងរ៉ែ និងថាមពល ដើម្បីស្វែងរក​ការគាំទ្រ​ជា​លក្ខណៈ​បច្ចេកទេស។

មានមតិក្នុងឱកាសកិច្ចប្រជុំ លោក Yang Yaming ក៏បានធ្វើបទឧទ្ទេសនាមខ្លី អំពី​សកម្មភាព​ធុរកិច្ច​របស់​ក្រុមហ៊ុន និងបាន ចែករំលែកអំពីនិន្នាការនៃការអភិវឌ្ឍថាមពលអគ្គិសនី និងបាន​បង្ហាញ​ពី​ចំណាប់អារម្មណ៍ក្នុងការបណ្តាក់ទុនវិនិយោគ ក្នុងវិស័យនេះ នៅកម្ពុជាផងដែរ។

ជាការឆ្លើយតប ឯកឧត្តមអគ្គលេខាធិការរងបានសម្តែងនូវក្តីសោនស្សរីករាយដោយបាន ជំរុញ​លើក​ទឹកចិត្តឱ្យក្រុមហ៊ុនមកបណ្តាក់ទុន វិនិយោគនៅកម្ពុជា ដើម្បីទទួលបានផលចំណេញ និង​បាន​ស្នើ​ឱ្យគណៈប្រតិភូចិន ជួយផ្សព្វផ្សាយពីបរិស្ថានវិនិយោគរបស់កម្ពុជា ជូនទៅ​វិនិយោគិន​ចិន​បន្ត​បន្ទាប់​ទៀត ដើម្បីពិនិត្យលទ្ធភាពមកបណ្តាក់ទុនវិនិយោគនៅកម្ពុជាបន្ថែមទទៀត៕ អត្ថបទ៖ សុន រ៉ាឌី