យុទ្ធនាការផ្តល់ថ្នាំបង្ការការពារជំងឺកញ្រ្ជឹល ស្អូចបន្ថែមនៅរាជធានីភ្នំពេញ បានចំនួន១០២%

លោកវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ បានថ្លែងប្រាប់BTV ព័ត៌មាន នាព្រឹកថ្ងៃទី៣ ខែធ្នូ ឆ្នាំ២០២៤នេះថា យុទ្ធនាការផ្តល់ថ្នាំបង្ការការពារជំងឺកញ្រ្ជឹល ស្អូច​បន្ថែមនៅក្នុងមូលដ្ឋានរាជធានីភ្នំពេញ ដើម្បីការពារកុមារ សម្រេចបានចំនួន១០២%។

ឯកឧត្តមវេជ្ជបណ្ឌិត ងី មានហេង បានមានប្រសាសន៍ថា យុទ្ធនាការ​ផ្តល់​បន្ថែមថ្នាំ​បង្ការ​ជំងឺ​កញ្ជ្រឹល​ និងស្អូច ឆ្នាំ២០២៤នេះ បានចាប់ផ្តើមពីថ្ងៃទី០១ខែវិច្ឆិកា រហូតដល់ខែធ្នូ ឆ្នាំ២០២៤ ចាក់​វ៉ាក់សាំងជូនកុមារដែលមានអាយុចាប់ពី៩ខែ ដល់ក្រោម៥ឆ្នាំ។ ជាក់​ស្តែងក្នុ​ង​មូល​ដ្ឋាន​រាជ​ធានី​ភ្នំពេញ ការផ្តល់វ៉ាក់សាំងការពារជំងឺកញ្ជ្រឹល និងស្អូច ដល់កុមារ តាមភូមិ ខ្នងផ្ទះ​សហគមន៍​រស់​នៅ​របស់​ប្រជាពលរដ្ឋ ក៏បានបិទបញ្ចប់យុទ្ធនាការផងដែរ ជាលទ្ធផលការ​ផ្តល់​វ៉ាក់សាំង​ជូន​កុមារ​ បានចំនួន១០២% ជាពិសេសថ្នាំបង្ការជំងឺកញ្ជ្រិល ស្អូច អាចការពារកុមារ ឬទារក ពី​សេចកី្ត​ស្លាប់ និងផលបាសេៗដូចជា៖ ងងឹតភ្នែក ថ្លង់ ជំងឺរលាកខួរក្បាល ជំងឺរលាកសួត ជំងឺ​បេះដូង​ពីកំណើត ជំងឺអន់ថយប្រាជ្ញាស្មារតីជាដើម។

បើតាមលោកវេជ្ជបណ្ឌិត អ៊ឹម វិសិដ្ឋ ប្រធានការិយាល័យសុខាភិបាលស្រុកប្រតិបតិ្តការដង្កោ (ហៅកាត់ OD ដង្កោ) បានដឹងនៅថ្ងៃនេះដែរថា ចាប់ពីថ្ងៃទី១ ដល់ថ្ងៃទី២៩ វិច្ឆិកា ឆ្នាំ២០២៤ ការិយាល័យ​សុខាភិបាលស្រុកប្រតិបត្តិដង្កោ យើងចាក់វ៉ាក់សាំងកញ្រ្ជឹល ស្អូច ជូនកុមារ បាន​ចំនួន​១៤៣៩៩នាក់។

សូមបញ្ជាក់ផងដែរថា យុទ្ធនាការនេះដឹកនាំផ្ទាល់ដោយក្រសួងសុខាភិបាល និងមាន​ការ​គាំទ្រ​ផ្នែក​ហិរញ្ញ​វត្ថុដោយអង្គការសម្ព័ន្ឋសកលសម្រាប់វ៉ាក់សាំង និងការផ្ដល់ថ្នាំបង្ការ (Gavi) និង​មាន​ការ​គាំទ្រ​ផ្នែក បច្ចេកទេសពីអង្គការសុខភាពពិភពលោក (WHO) អង្គការមូ​ល​និធិ​សម្រាប់​កុមារ​នៃ​អង្គការ​សហប្រជាជាតិ (UNICEF) និងអង្គការគ្លីនតុនហែល្ស អែកសេស អ៊ីនីតស៊ីអេធីវ  (CHAI)​។ ដើម្បីឆ្លើយតបទៅនឹងការផ្ទុះរាតត្បាតជំងឺកញ្ជ្រឹលនៅលើទូទាំងពិភពលោក ជាពិសេស​ចំពោះប្រជាជ នដែលមានភាពស៊ាំការពារទៅនឹងជំងឺកញ្ជ្រឹលទាប ដូច្នេះ យុទ្ធនាការ​នេះជា​ដំណោះស្រាយបន្ទាន់មួយ ដើម្បីការ ពា រពីការចម្លងជំងឺកញ្ជ្រឹលនេះ។ នៅលើ​សកល​លោក ចំនួនករណីជំងឺកញ្ជ្រឹលមានការកើនឡើងទ្វេរដងពី១៧0,000ករណី ក្នុងឆ្នាំ២០២២ ដល់​៣២0,000ករណី ក្នុងឆ្នាំ២០២៣។ ដែល​នេះ​ជាមូល​ហេតុ​ចម្បង​ដោយសារ​តែ​ការ​រំខាន​ដល់​ការ​ផ្តល់​ថ្នាំ​បង្ការជាប្រចាំក្នុងអំឡុងពេលរីករាលដាលនៃវីរុសកូវីដ-១៩។ យុទ្ធនាការផ្តល់​បន្ថែម​ថ្នាំ​បង្ការ​ជំងឺ​កញ្រ្ជឹល ស្អូច នេះចែកចេញជាពីរដំណាក់កាល៖ ដំណាក់កាល​ទីមួយ​នឹង​គ្រប​ដណ្តប់​ខេត្ត​ចំនួន​១៣ (បន្ទាយមានជ័យ បាត់ដំបង កំពង់ចាម កំពង់ស្ពឺ កំពង់ធំ កណ្តាល ក្រចេះ ឧត្តរមានជ័យ រាជធានីភ្នំពេញ ពោធិ៍សាត់ សៀមរាប ប៉ៃលិន និងខេត្តត្បូង្មុ) ចាប់ថ្ងៃទី១ ដល់​ថ្ងៃទី១៣ ខែវិច្ឆិកា ឆ្នាំ២០២៤ និងដំណាក់កាលទីពីរ គ្របដណ្តប់ខេត្តចំនួន១២ (ខេត្តកំពង់ឆ្នាំង កំពត កោះកុង មណ្ឌលគិរី ព្រះវិហារ ព្រៃវែង រតនគិរី ព្រះសីហនុ ស្ទឹងត្រែង ស្វាយរៀង តាកែវ និង​ខេត្តកែប) ចាប់ ពី ថ្ងៃ ទី២៥ ខែ វិច្ឆិកា ដល់ ថ្ងៃ ទី៦ ខែ ធ្នូ ឆ្នាំ២០២៤៕ អត្ថបទ រដ្ឋា