ចាស់ជរា ស្រ្តីមេម៉ាយ ជនពិការ និងជនរងគ្រោះធម្មជាតិ ១៦០គ្រួសារ នៅខេត្តប៉ៃលិន ទទួលអំណោយពីរាជរដ្ឋាភិបាល

ប៉ៃលិន៖ នៅសាលាឃុំស្ទឹងត្រង់ នៅថ្ងៃទី២៤ ខែមីនា នេះ លោកជំទាវ បាន ស្រីមុំ អភិបាល​ខេត្ត​ប៉ៃលិន អមដំណើរដោយអភិបាលរងខេត្ត និងថ្នាក់ដឹកនាំមន្ទីរអង្គភាពជុំវិញខេត្ត ព្រមទាំងក្រុម ការងារ បានអញ្ជើញសំណេះសំណាលសួរសុខទុក្ខ និងផ្តល់អំណោយ​របស់​រាជ​រដ្ឋាភិបាល​កម្ពុជា​ជូន​ដល់​ប្រជាពលរដ្ឋ ទីទ័លក្រ ចំនួន១៦០គ្រួសារ ដែលជាចាស់ជរា ស្រ្តីមេម៉ាយ ជនមាន​ពិការភាព និងជនរងគ្រោះដោយសារ គ្រោះធម្មជាតិ មកពីភូមិចំនួន១៦ ក្នុងឃុំស្ទឹងត្រង់ ស្រុក​សាលាក្រៅ ។

លោកជំទាវ បាន ស្រីមុំ បានមានប្រសាសន៍ថា ការចែកអំណោយរបស់រាជរដ្ឋាភិបាលកម្ពុជា តាមរ យៈមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្ត នៅពេលនេះ គឺដើម្បី​ចូល​រួម​ចំណែក​ដោះស្រាយ និងរួមចំណែកលើកកម្ពស់ជីវភាព បើទោះបីជាអំណោយ​ទាំង​នេះ​មិន​បាន​បំពេញ​តាម​តម្រូវការ របស់បងប្អូនក៏ពិតមែន តែក៏អាចដោះស្រាយបានមួយកម្រិតផងដែរ ដូច្នេះ​សូមលោកតា លោក យាយ អ៊ុំពូមីង និង​បង​ប្អូន​ទាំង​អស់​ត្រូវ​ខិតខំ​ប្រឹង​ប្រែង​ប្រកប​មុខរបរ​ចិញ្ចឹម​ជីវិត និងបង្កបង្កើនផលដំណាំឱ្យបានកាន់តែច្រើន ដើម្បីបង្កើនជីវភាពរស់នៅ ជាពិសេសត្រូវ​យល់​ដឹង​ពី​បច្ចេកទេសក្នុងការធ្វើការងារកសិកម្ម ទៅតាមការណែនាំរបស់មន្ត្រីជំនាញ។

លោកជំទាវ បានមានប្រសាសន៍ទៀតថា រាជរដ្ឋាភិបាល ក្រោមការដឹកនាំរបស់គណបក្សប្រជាជន កម្ពុជា មិនដែលទុកប្រជាពលរដ្ឋណាម្នាក់ចោល ឱ្យដាច់បាយដោយមិនដឹង និងមិន​បាន​ដោះ​ស្រាយ​នោះឡើយ ជាពិសេសរាជដ្ឋាភិបាលកម្ពុជា អាណត្តិទី៧ ក្រោមការដឹកនាំរ​បស់​សម្ដេច​ធិបតី ហ៊ុន ម៉ាណែត បានដាក់ចេញនូវគោលនយោបាយ «យុទ្ធសាស្ត្របញ្ចកោណ» ដំណាក់​កាលទី១ ដែលមានអាទិភាពគន្លឹះ ចំនួន៥ គឺ មនុស្ស ផ្លូវ ភ្លើង ទឹក និងបច្ចេកវិទ្យាឌីជីថល ក្នុងន័យ ដើម្បីជំរុញកំណើនការងារសមធម៌ ប្រសិទ្ធ ភាព និងចីរភាព ក្នុងការកសាង​មូល​ដ្ឋាន​គ្រឹះ​ឆ្ពោះ​ទៅ​សម្រេចចក្ខុវិស័យកម្ពុជាឆ្នាំ២០៥០ និងកំណែទម្រង់ មុខងារសាធារណៈ ការពង្រឹង​អភិបាល​កិច្ច និងការធ្វើទំនើបកម្មស្ថាប័នព្រមទាំងគោលនយោបាយ និងកំ ណែទម្រង់​ជា​ច្រើន​ផ្សេង​ទៀត។

លោកជំទាវ បាន ស្រីមុំ ក៏បានមានប្រសាសន៍ផ្តាំដល់ប្រជាពលរដ្ឋទាំងអស់ ត្រូវមានការប្រុងប្រ យ័ត្ន​ខ្ពស់ចំពោះសុខភាព ដោយសាររដូវនេះអាកាសធាតុក្តៅខ្លាំង និងមានភ្លៀង​កក់​ខែ​ខ្លះៗដែ​ល​ងាយ​បង្កឱ្យកើតជំងឺដម្កាត់ផ្សេងៗ ហើយបើមានកើតបញ្ហាអ្វីក្នុងមូលដ្ឋាន ត្រូវរាយការណ៍​ទៅ​មេឃុំ​/មេភូមិ ដែលនៅ ជិតកៀកជាមួយបងប្អូនផ្ទាល់ ដើម្បីឱ្យក្រុមការងារចុះជួយបានឆាប់រហ័ស និង​ទាន់ពេលវេលា ដោយឡែក អាជ្ញាធរមូលដ្ឋានទាំងអស់ ត្រូវចូលរួមសហការ និងជួយ​សង្រ្គោះ​ប្រជា​ពលរដ្ឋគ្រប់ស្ថានភាព គ្រប់ហេតុ ការណ៍ ដោយនៅជាមួយប្រជាជន រួមរស់ជាមួយ​ប្រជាជ​ន​គ្រប់​កាលៈទេសៈ៕