ក្រសួងរំពឹងយុវជនចូលរួមច្រើនក្នុងទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ​នៅ​ពាក់​កណ្ដាល​ខែនេះ

គិតមកដល់ពេលនេះ ជាលើក៨ហើយដែលក្រសួងការងារ និងបណ្តុះបណ្តាល​វិជ្ជាជីវៈ​បាន​រៀបចំ​ទិវា​ជាតិ​អប់រំបណ្តុះបណ្តាលបច្ចេកទេស និងវិជ្ជាជីវៈ (TVET Day) ខណៈឆ្នាំនេះនឹង​ប្រព្រឹត្ត​ទៅ​ក្រោម​ប្រធានបទ «TVET បង្កើតឱកាសការងារ សាងក្តីសង្ឃឹមដល់យុវជន» ដែលរំពឹងទុកថា​នឹង​មាន​អ្នក​ចូលរួ​មប្រមាណ ៧ ម៉ឺននាក់។

ឯកឧត្តម ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុកអគ្គនាយក នៃ​អគ្គ​នាយកដ្ឋាន​អប់រំ​បណ្តុះ​បណ្តាល​​បច្ចេកទេស និងវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ ថ្លែងក្នុងសន្និសីទ​សារ​ព័ត៌មាន នៅព្រឹកថ្ងៃទី១០ ខែមិថុនានេះថា នៅឆ្នាំនេះ ទិវាធីវ៉េត នឹងរៀបចំ​ឡើង​រយៈ​ពេល​២​ថ្ងៃ​ នៅថ្ងៃទី ១៥-១៦ ខែមិថុនា នៅមជ្ឈមណ្ឌលសន្និបាត និងពិព័រណ៍កោះពេជ្រ។

ឯកឧត្តម បានបន្តថាទិវាជាតិនេះ ក្រសួង​នឹង​រៀបចំ​ដាក់​តាំង​បង្ហាញ​ពី​វឌ្ឍនភាព​ពីវិស័យ​អប់រំ​បណ្តុះ​បណ្តាល បច្ចេកទេស និងវិជ្ជាជីវៈដែលមានការចូលរួមពីក្រសួង ស្ថាប័ន គ្រឹះស្ថានសិក្សា វិស័យ​ឯកជន ដៃគូអភិវឌ្ឍ និងផ្នែកពាក់ព័ន្ធនានាសរុបចំនួន ១៣១ ស្មើនឹង ២០៥ ស្តង់ ព្រម​ទាំង​មាន​ការ​ធ្វើបទបង្ហាញចែករំលែកបទពិសោធន៍ពីវាគ្មិនល្បីៗ និងកម្មវិធីសំខាន់ៗដូចជា៖ ការ​ចែករំលែកបទពិសោធន៍ការអភិវឌ្ឍន៍ជំនាញ និងកម្មវិធី ASEAN Year of Skills 2025 របស់​ប្រទេស​ម៉ាឡេស៊ី និងគ្រឹះស្ថាន TVET មកពីប្រទេសចិន, ការធ្វើតេស្តវាយតម្លៃផ្អែកលើសមត្ថភាព ដើម្បី​ទទួលបានគុណវុឌ្ឍិជាតិ និងទទួលបានសញ្ញាបត្របញ្ជាក់សមត្ថភាព និងការ​តាំង​បង្ហាញ​ស្នាដៃ​សិស្ស និស្សិតរបស់គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ ដូចជារ៉ូបូតអាច​និយាយ​ឆ្លើយ​ឆ្លងជាមួយមនុស្ស រ៉ូបូតឆុងកាហ្វេដោយស្វ័យប្រវត្តិ ព្រមទាំងឧបករណ៍ សម្ភារៈ និង​ស្នាដៃ​ស្រាវជ្រាវ គំនិតច្នៃប្រឌិតរបស់សាធារជនដែលអាចប្រើប្រាស់ក្នុងវិស័យឧស្សាហកម្ម ពាណិជ្ជ​កម្ម កសិកម្ម និងវិស័យសំណង់ជាដើម។

សូមបញ្ជាក់ថា «ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ» ត្រូវបានកំណត់​យក​ថ្ងៃ​ទី​១៥ ខែមិថុនា ជារៀងរាល់ឆ្នាំ៕ អត្ថបទ៖ បូរ៉ាវី