អាជ្ញាធរមីនរៀបចំបទឧទ្ទេសស្តីពីភាពដឹកនាំប្រកបដោយគុណធម៌ ជូនថ្នាក់ដឹកនាំ មន្រ្តីរាជការ និងបុគ្គលិក ដេីម្បីពង្រឹងសមត្ថភាព សតិអារម្មណ៍ កិច្ចខិតខំប្រឹងប្រែង​

(ភ្នំពេញ) នៅទីស្នាក់ការអាជ្ញាធរមីន រសៀលថ្ងៃទី១៧ ខែមិថុនា ឆ្នាំ២០២៥ អាជ្ញាធរមីន បានរៀបចំបទឧទ្ទេសស្តីពីភាពដឹកនាំប្រកបដោយគុណធម៌ ជូនថ្នាក់ដឹកនាំ មន្រ្តីរាជការ បុគ្គលិកអាជ្ញាធរមីន ក្រោមអធិបតីភាពរបស់ ឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន និងក្រោមកិច្ចសម្រប សម្រួលដោយ ធម្មបណ្ឌិត អៀង សុធារ៉ា និងឯកឧត្តមបណ្ឌិត ម៉ីកល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ។

បទឧទ្ទេសនេះ ប្រព្រឹត្តិទៅក្នុងគោលបំណងដេីម្បីពង្រឹងសមត្ថភាព សតិអារម្មណ៍ កិច្ចខិតខំប្រឹងប្រែង និងទំនួលខុសត្រូវ ក្នុងការដឹកនាំ និងការអភិវឌ្ឍស្ថាប័នអាជ្ញាធរមីន ឱ្យកាន់តែមានភាពរឹងមាំ ការរីកចម្រើន និងទទួលបានប្រសិទ្ធភាពខ្ពស់។

ឯកឧត្តមទេសរដ្ឋមន្រ្តី លី ធុជ បានថ្លែងថា ដើម្បីឱ្យស្ថាប័នមានការអភិវឌ្ឍ និងទទួលបានការវាយតម្លៃខ្ពស់ មន្រ្តី-បុគ្គលិក ត្រូវមានភាពស្មោះត្រង់ ការទទួលខុស ត្រូវ និងចេះគោរពគ្នាទៅវិញទៅមក។ ឯកឧត្តម​បន្ត​ទៀត​ថា ការគ្រប់គ្រង និងដឹកនាំស្ថាប័ន ត្រូវប្រព្រឹត្តិទៅដោយផ្អែកលើគុណសម្បត្តិ និងមានគុណធម៌ ហើយលក្ខណៈសំខាន់ៗនៃភាពដឹកនាំប្រកបដោយគុណធម៌ ត្រូវមានសុចរិតភាព ភាពស្មោះត្រង់ ការគោរពអ្នកដល់អ្នកដទៃ ភាពទំនួលខុសត្រូវ និងភាពយុត្តិធម៌។

ជាចុងបញ្ចប់ ឯកឧត្ដម​ទេសរដ្ឋមន្រ្តី​ លី​ ធុជ​ បាន​ណែនាំ​ដល់​ថ្នាក់​ដឹកនាំ​ មន្រ្ដី​ បុគ្គលិក​អាជ្ញាធរ​មីន​ទាំងអស់​ ត្រូវ​បន្ត​ការយកចិត្តទុកដាក់​ និង​កិច្ច​ខិតខំ​ប្រឹងប្រែង​រួម​គ្នា​ ដេីម្បី​ដឹកនាំ​ និង​សម្របសម្រួល​វិស័យ​សកម្មភាព​មីន​នៅ​កម្ពុជា​ ឱ្យ​ទទួល​បាន​ជោគជ័យ​ស្រប​តាម​ចក្ខុវិស័យ​របស់​ សម្តេច​ធិបតី​ ហ៊ុន​ ម៉ាណែត​ នាយករដ្ឋមន្ត្រី​ ឆ្ពោះ​ទៅរក​កម្ពុជា​មួយ​ដែល​គ្មាន​ផល​ប៉ះពាល់​ដោយ​សារ​មីន​ និង​សំណល់​ជាតិ​ផ្ទះ​ពី​សង្រ្គាម​៕