ក្រសួងកសិកម្មណែនាំកសិករត្រូវរាយការណ៍បន្ទាន់ករណីជួបប្រទះដង្កូវបំផ្លាញដំណាំស្រូវ

មន្រ្តីជាន់ខ្ពស់នៃក្រសួងកិសកម្ម រុក្ខាប្រមាញ់ និងនេសាទ បានអំពាវនាវដល់ប្រជាកសិករទាំងអស់ ចុះ​ពិនិត្យស្រែជាប្រចាំ បើជួបប្រទះនឹងដង្កូវហ្វូងកំពុងបំផ្លាញដំណាំស្រូវ ត្រូវរាយការណ៍ ឬទាក់​ទង​ទៅ​អាជ្ញាធរមូលដ្ឋានដែលនៅជិតបំផុត ឬផ្តល់ព័ត៌មានទៅមន្ត្រីកសិកម្មនៅតាមឃុំ-ស្រុក-ខេត្ត ដើម្បី​ជួយ​ផ្តល់ការណែនាំផ្នែកបច្ចេកទេស ឬវិធីសាស្ត្រ​នៃ​ការ​ជ្រើសរើស​ថ្នាំ​កសិកម្ម​សម្រាប់​បាញ់​កម្ចាត់​ដង្កូវ​នោះឱ្យទាន់ពេលវេលា។

អំឡុងចុះពិនិត្យស្ថានភាពនៃការផ្ទុះរាលដាលដង្កូវហ្វូង និងនាំយក​ដ្រូន​បង្ហោះ​បាញ់​ថ្នាំ​កសិកម្ម​កម្ចាត់​ដង្កូវ​នៅស្រុកភ្នំស្រួច ខេត្តកំពង់ស្ពឺ ឯកឧត្តម ងិន ឆាយ ប្រតិភូរាជរដ្ឋាភិបាលកម្ពុជា ទទួល​បន្ទុក​ជា​អគ្គនាយកនៃអគ្គនាយកដ្ឋានកសិកម្ម បានឲ្យដឹងថា ដោយសារបច្ចុប្បន្ននេះ ស្ថិត​នៅ​ក្នុង​ដំណាក់កាលនៃការផ្ទុះឡើងដង្កូវហ្វូង។ ជាក់ស្តែង កាលពីកន្លងទៅថ្មីៗនេះ ដង្កូវហ្វូង​បាន​បំផ្លាញ​ដំណាំ​ស្រូវ​របស់ប្រជាកសិករនៅខេត្តកំពង់ស្ពឺ ប្រមាណជា ៦៥ហិកតាប៉ុណ្ណោះ ខណៈមក​ដល់​ថ្ងៃ​ទី​២៣ ខែមិថុនាម្សិលមិញ ផលប៉ះពាល់ដំណាំស្រូវមានចំនួនប្រហែលជាជិត ២០០ហិកតា។

ឯកឧត្តម បានបន្តថា បើសិនជាប្រជាកសិករមានភាពយឺតយ៉ាវក្នុងការចុះពិនិត្យស្រែចម្ការ និង​ចាត់​វិធានការកម្ចាត់ឱ្យបានទាន់ពេលទេនោះ ដង្កូវហ្វូង អាចបំផ្លាញដំណាំស្រូវ ឬដំណាំ​ផ្សេង​ៗ​ទៀត​ក្នុង​រយៈពេល ២ទៅ៣ថ្ងៃ អស់តែម្តង។

សូមជម្រាបជូន ការចុះពិនិត្យស្ថានភាពនៃការផ្ទុះរាលដាលដង្កូវហ្វូង និងនាំ​យក​ដ្រូន​បង្ហោះ​បាញ់​ថ្នាំ​កសិកម្មកម្ចាត់ដង្កូវនៅ ខេត្តកំពង់ស្ពឺនេះ ក្នុងគោលបំណង ដើម្បីសិក្សាវាយ​តម្លៃ​លើ​ការ​រាត​ត្បាត​របស់​ដង្កូវហ្វូង និងណែនាំដល់ប្រជាកសិករ​អំពីវិធាន​ការ​ទប់​ស្កាត់ និង​កម្ចាត់​ដង្កូវ​ តាមរយៈ​កា​រ​ណែនាំ និងផ្តល់សៀវភៅស្តីពី វិធានការចម្រុះគ្រប់សមាសភាពចង្រៃលើដំណាំស្រូវ និង​បច្ចេកទេស​ប្រើប្រាស់ថ្នាំសម្លាប់សត្វល្អិតឱ្យត្រឹមត្រូវ​ស្រប​តាម​ស្តង់​ដា​បច្ចេកទេស​ដែល​អាច​ចៀសវា​ង​ផលប៉ះពាល់ដល់បរិស្ថាន និងសុខភាពប្រជាពលរដ្ឋប្រកបដោយប្រសិទ្ធភាព និង​ប្រសិទ្ធ​ផលខ្ពស់​៕

អត្ថបទ: ឈិត បូរ៉ាវី