ឧបនាយករដ្ឋមន្ត្រី សុខ ចិន្តាសោភា៖ កម្ពុជាប្ដេជ្ញាលើកកម្ពស់សមភាព Gender ដើម្បីជំរុញការអភិវឌ្ឍសេដ្ឋកិច្ចសង្គម

ភ្នំពេញ៖ នៅថ្ងៃទី២៦ ខែមិថុនា ឆ្នាំ២០២៤ ឯកឧត្តម ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រី​ការបរទេស និងសហប្រតិបត្តិការអន្តរជាតិ និងលោកជំទាវ Jacqueline Jean O’Neil ឯកអគ្គរដ្ឋទូតសម្រាប់ស្ត្រី សន្តិភាព និងសន្តិសុខ នៃកិច្ចការពិភពលោករបស់ប្រទេសកាណាដា បាន​ជួបពិភាក្សាពីការលើកកម្ពស់សមភាពយេនឌ័រ ដែលក្នុង​ឱកាស​នោះ​ឯកឧត្តម​ឧបនាយក​រដ្ឋមន្រ្តី​បានលើកឡើងពីការប្តេជ្ញាចិត្តឥតងាករេរបស់កម្ពុជាក្នុងការផ្តល់អំណាចដល់ស្ត្រី និង​ទទួល​ស្គាល់នូវតួនាទីដ៏សកម្មរបស់ស្ត្រីក្នុងការអភិវឌ្ឍសេដ្ឋកិច្ចសង្គម។

ក្នុងឱកាសនោះ ឯកឧត្តម ឧបនាយករដ្ឋមន្ត្រី និងលោកជំទាវឯកអគ្គរដ្ឋទូត ក៏បានលើក​ឡើង​ផងដែរ​នូវ​ប្រវត្តិសាស្រ្តដ៏សម្បូរបែបក្នុងការចូលរួមរបស់ស្ត្រីនៅក្នុងសង្គមកម្ពុជា និងបានគូស​បញ្ជាក់​ពី​កិច្ចប្រឹងប្រែងឥតឈប់ឈររបស់កម្ពុជាក្នុងការថែរក្សាកេរ្តិ៍ដំណែលនេះ។ ភាគីទាំងពី​រ​ក៏​បាន​ពិភាក្សា​ផងដែរពីការចូលរួមដ៏សកម្មរបស់​កម្ពុជា​ក្នុង​ប្រតិបត្តិការ​រក្សា​សន្តិភាព​របស់​អង្គការ​សហ​ប្រជាជាតិ និងតួនាទីដ៏សកម្មរបស់កម្ពុជាក្នុងសកម្មភាពមនុស្សធម៌នានា៕

អត្ថបទ: BTV NEWS