អតីតយុទ្ធជនខេត្តកំពង់ឆ្នាំង បង្ហាញការដឹងគុណចំពោះសម្តេចទាំង២ ដែលបានយកចិត្ត​ទុកដាក់ដល់ពួកគាត់

ក្នុងទិវាអតីតយុទ្ធជនលើកទី១៧ នៅក្នុងខេត្តកំពង់ឆ្នាំង បងប្អូនអតីតយុទ្ធជនចំនួន១២០គ្រួសារ បាន​ថ្លែងអំណរគុណយ៉ាងខ្លាំងដល់សម្តេចតេជោ ហ៊ុន សែន ប្រធានសមាគម​អតីត​យុទ្ធជន​កម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែល​បាន​យក​ចិត្តទុកដាក់ជួយដល់អតីតយុទ្ធជនកម្ពុជាគ្រប់កាលៈទេសៈទាំងអស់ ដោយបានផ្តល់ការថែទាំ ផ្តល់​មុខ​របរការងារ រហូតផ្ដល់ដី និងផ្ទះសម្បែងទៀតផង។

អតីតយុទ្ធជន បានបង្ហាញនូវទឹកចិត្តសប្បាយរីករាយ ពេលពួកគាត់​បាន​ចូល​រួម​ក្នុង​ទិវា​អតីត​យុទ្ធជន​លើកទី១៧នេះ ដោយបានទទួលនូវថវិការ គ្រឿងឧបភោគបរិភោគពីសម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រី​នៃ​ព្រះរាជា​ណាចក្រកម្ពុជា ដែលគិតគូរពីសុខទុក្ខរ​បស់​បងប្អូន​អតីត​យុទ្ធជ​នដែល​កន្លងមក​បាន​ចូលរួម​ក្នុង​បុព្វហេតុការពារទឹកដី ជាតិមាតុភូមិ ពីពួកសត្រូវឈ្លានពាន និងបានលះ​បង់​នូវ​សាច់​ស្រស់​ឈាម​ស្រស់ ក្រុមគ្រួសារ ដើម្បីប្រទេសជាតិមានការទទួលបានសុខសន្តិភាព និងមាន​ការ​អភិវឌ្ឍ​រីក​ចម្រើនគួឲ្យគត់សំគាល់នាពេលច្ចុប្បន្ននេះ។

លោកឧត្តមសេនីយ៍ត្រី អ៊ុំ សុភា ប្រធានគណៈកម្មាធិការសមាគមអតីតយុទ្ធជនខេត្តកំពង់ឆ្នាំង បាន​រំលឹកឡើងវិញពីវីរភាព ដ៏អង់អាចក្លាហានរបស់បងប្អូនអតីតយុទ្ធក្នុងការបូជាសាច់ស្រស់ ឈាម​ស្រស់ ដើម្បីរំដោះជាតិចេញពីរបបប្រល័យពូជសាសន៍ និងថែរក្សា ការពារ សន្តិភាព ស្ថេរភាព​សង្គមរហូតដល់សព្វថ្ងៃនេះ។ វីរជនពិតប្រាកដ គឺបងប្អូនអតីតយុទ្ធនេះហើយ ដែលបាន​ចូល​រួម​ជាមួយរាជរដ្ឋាភិបាលកម្ពុជារំដោះប្រទេសជាតិ នាំមកនូវសុខសន្តិភាព ស្ថេរភាព និងការអ​ភិវឌ្ឍ​ពិត​ប្រាកដរហូតដល់បច្ចុប្បន្ននេះ។ ការអភិវឌ្ឍនាពេលនេះ គឺមិនមែន​កើត​ឡើង​ដោយ​ចៃដន្យ​ទេ តែជាការខិតខំប្រឹងប្រែងរបស់រាជរដ្ឋាភិបាល ដែលមានសម្តេច​អគ្គ​មហា​សេនា​បតីតេជោ ហ៊ុន សែន ជាអតីតនាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រី​នា​ពេល​បច្ចុប្បន្ន បានខិតខំគៀងគរអ្នកវិនិយោគទាំងក្នុង និងក្រៅប្រទេស ដើម្បីធ្វើការ​វិនិយោគ​នៅ​ប្រទេស​កម្ពុជា និងបានបង្កើតការងារយ៉ាងច្រើនជូនប្រជាពលរដ្ឋ យុវជនកម្ពុជា៕

អត្ថបទ: BTV NEWS