ស្រូវប្រជាកសិករក្នុងស្រុករលាប្អៀរ លូតលាស់ល្អឡើងវិញបន្ទាប់ពីកម្ចាត់ដង្កូវហ្វូង​កាលពីសប្តាហ៍មុន

នាព្រឹកថ្ងៃទី១ ខែកក្កដា ឆ្នាំ២០២៤នេះ លោក សេង វិចិត្រ អភិបាលស្រុករលាប្អៀរបានឲ្យដឹង​ថា ស្រូវវស្សាប្រជាកសិករដែលរងផលប៉ះពាល់ពីសត្វដង្កូវយាយីកាលសប្តាហ៍មុន បានលូត​លាស់​ល្អ​ឡើង​វិញហើយ​ មិនមានអ្វីជាបញ្ហានោះឡើយ។ ប្រជាកសិករ និងក្រុមមន្ត្រីកសិកម្មស្រុក និងឃុំ បាន និងកំពុងតាមដានយ៉ាងយកចិត្តទុកដាក់ពីបញ្ហាដង្កូវហ្វូង និងសត្វល្អិតចង្រៃ។

លោក សេង វិចិត្រ បានថ្លែងបន្តថា ដោយមានការយកចិត្តទុកដាក់ និងមាន​ណែនាំ​ពី​អាជ្ញាធ​រ​ស្រុក មន្ត្រីកសិកម្មឃុំ អាជ្ញាធរមូលដ្ឋាន និងប្រជាកសិករផ្ទាល់ មកដល់ពេលនេះ ដំណាំ​ស្រូវ​បាន​លូត​លាស់​ល្អប្រសើរឡើងវិញ។ បច្ចុប្បនុ្នកំពុងរងផលប៉ះពាល់ជាលក្ខណៈស្បែកខ្លា និង​តិច​តួច​ប៉ុណ្ណោះ ហើយស្ថិតនៅក្រោមការតាមដានជាប្រចាំ។ លោកអភិបាល​ស្រុក​បាន​ណែនាំដល់​ប្រជា​កសិករ​ឱ្យ​ឧស្សាហ៍ចុះមកមើលស្រែ និងមានវិធានការកម្ចាត់សមាសភាពចង្រៃ តាមវិធី​សាស្រ្ត​មេកានិក និងវិធីសាស្រ្តគីមីរួមមាន៖ ទី១ វិធានការការពារ ត្រូវធ្វើការសម្អាតស្មៅនៅតាមភ្លឺស្រែ ឬ​គម្ពោធព្រៃនៅជុំវិញស្រែដែលជាជម្រករបស់ដង្កូវហ្វូង ត្រូវជីកចង្អូរទំហំ២តឹកជម្រៅ៣តឹក រោយផេះ​ក្នុងរណ្ដៅការពារកុំឲ្យដង្កូវរាលដាលទៅស្រែផ្សេងទៀត។

ទី២ វិធានការកំចាត់ លែងទាឱ្យស៊ីដង្កូវនៅក្នុងស្រែ ពន្លិចទឹកនៅក្នុងស្រែ និងទី៣វិធីសាស្ត្រគីមី សម្រាប់​ការប្រើប្រាស់ថ្នាំកម្ចាត់សត្វល្អិត ដែលមានស្លាកសញ្ញា​ជាភាសារ​ខ្មែរ​ទទួល​ស្គាល់ដោ​យ​ក្រសួង​កសិកម្ម។

ប្រភេទដង្កូវហ្វូងដែលបានរកឃើញលើស្រែកសិករ ជាប្រភេទដង្កូវហ្វូងមានឈ្មោះវិទ្យាសាស្ត្រ Spodoptera Mauritia (បំផ្លាញដោយដុំៗ)៕

អត្ថបទ: កាំង ហុងវាស្នា