សម្ដេចធិបតី ហ៊ុន ម៉ាណែត អញ្ជើញជួបជាមួយប្រធានសម្ព័ន្ធនិយោជកហ្វ្រង់កូហ្វូន

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅ​រសៀល​ថ្ងៃទី៨ ខែកក្កដា ឆ្នាំ ២០២៤នេះ បានអញ្ជើញជួបជាមួយលោក Geoffroy Roux de Bézieux ប្រធានសម្ព័ន្ធនិយោជកហ្វ្រង់កូហ្វូន ក្នុងជំនួបសម្ដែងការគួរសម និងពិភាក្សា​ការងា​រ​នៅ​វិមាន​សន្តិភាព។

សូមជម្រាបថា សម្ព័ន្ធនិយោជកហ្វ្រង់កូហ្វូន (APF) គឺជាបណ្តាញ​ក្រុមហ៊ុន​ដែល​ត្រូវ​បាន​បង្កើត​ឡើង​នៅទីក្រុងប៉ារីស មានសមាជិកចំនួន ៣៤ប្រទេស ក្នុងនោះ ៣១ប្រទេស និយាយ​ភាសា​បារាំង និងមានក្រុមហ៊ុនដែលជាសម្ព័ន្ធភាព ៧០០.០០០។ APF ត្រូវបានជួ​ប​ប្រជុំ​ដើម្បី​លើក​ទឹក​ចិត្ត​រវាង​អ្នកធុរកិច្ចនៃប្រទេសផ្សេងៗគ្នា ដើម្បីជំរុញលំហូរពាណិជ្ជកម្ម និងសេដ្ឋកិច្ចនៅ​ក្នុង​តំបន់​ដែល​និយាយ​ភាសាបារាំង។

សភាពាណិជ្ជកម្មកម្ពុជា (CCC) បានជួបពិភាក្សាជាមួយសម្ព័ន្ធនិយោជកហ្វ្រង់កូហ្វូន (APF) ក្នុងអំឡុង​ពេលទស្សនកិច្ចផ្លូវការរបស់ សម្តេចធិបតីនាយករដ្ឋម្រ្តី នៅប្រទេសបារាំងក្នុងខែមករា ឆ្នាំ ២០២៤ ហើយប្រទេសកម្ពុជាត្រូវបានជ្រើសរើសធ្វើជាម្ចាស់ផ្ទះនៃ កិច្ចប្រជុំហ្វ្រង់កូហ្វូនលើកទី៦ នៅឆ្នាំ២០២៦៕

អត្ថបទ: BTV NEWS