ពិព័រណ៍ផ្សព្វផ្សាយ និងចែកកូនឈើ និងវេទិកាកេសរកូលជាតិ លើកទី៤ ប្រកាសបើកជាផ្លូវការ

ភ្នំពេញ ៖ ក្រសួងបរិស្ថាន នៅរសៀលថ្ងៃទី១០ ខែកក្កដា ឆ្នាំ២០២៤នេះ បានប្រកាសបើកពិព័រណ៍ផ្សព្វផ្សាយ និងចែកកូនឈើ ក្រោមមូលបទ «ពន្លកបៃតង» និងវេទិកាកេសរកូលជាតិ លើកទី៤ ក្រោមអធិបតីភាពដ៍ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ដោយមានការអញ្ជើញចូលរួមពីឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន តំណាងក្រសួង-ស្ថានប័ន ស្ថានទូត និងដៃគូពាក់ព័ន្ធផ្សេងៗទៀត។

នៅក្នុងអង្គពិធី ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថានបានថ្លែងថា នៅក្នុងអាណត្តិទី៧ នៃរដ្ឋសភា រាជរដ្ឋាភិបាលបានដាក់ចេញនូវយុទ្ធសាស្រ្តបញ្ចាកោណដំណាក់កាលទី១ ហើយតាមយុទ្ធសាស្រ្តនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានណែនាំ និងចង្អុលបង្ហាញដល់ក្រសួងបរិស្ថានឱ្យរៀបចំឡើងយុទ្ធសាស្រ្តចក្រា ដែលមានសរសរស្តម្ភបីនោះរួមមាន៖ភាពស្អាត ភាពបៃតង និងចីរភាព។ សរសរស្តម្ភទី១ភាពស្អាត គឺសំដៅធ្វើយ៉ាងណា ដើម្បីឱ្យផ្ទះរបស់យើង សង្គមរបស់យើង ប្រទេសរបស់យើងមានភាពស្អាត ដែលក្រសួងបរិស្ថានបានដាក់ចេញយុទ្ធនាការជាបន្តបន្ទាប់។

ជាមួយគ្នានេះ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ បានថ្លែងថា ការរៀបចំពិព័រណ៍ផ្សព្វផ្សាយ និងចែកកូនឈើ ក្រោមមូលបទ «ពន្លកបៃតង» និងវេទិកាកេសរកូលជាតិ លើកទី៤ គឺជាវេទិការដ៍សំខាន់មួយសម្រាប់ស្វែងយល់បន្ថែមពីសារៈប្រយោជន៍ព្រៃឈើ ធនធានធម្មជាតិ និងជីវៈចម្រុះជាដើម។ លើសពីនេះ ឯកឧត្តម បានជំរុញដល់ប្រជាពលរដ្ឋចូលរួមដាំដើមឈើឱ្យបានច្រើន ដើម្បីបង្កើនគម្រប់ព្រៃឈើនៅកម្ពុជា។

គួរបញ្ជាក់ដែរថា ពិព័រណ៍ផ្សព្វផ្សាយ និងចែកកូនឈើ និងវេទិកាកេសរកូលជាតិ លើកទី៤ ចាប់ផ្តើមពីថ្ងៃទី១០ ដល់ថ្ងៃទី១២ ខែកក្កដា ឆ្នាំ២០២៤ ស្ថិតនៅស្តីការក្រសួងបរិស្ថាន រាជធានីភ្នំពេញ។ ក្នុងពិព័រណ៍នេះ ក្រសួងបរិស្ថាន មានកូនឈើចំនួន៤០ប្រភេទ សរុបចំនួនជាង៤ម៉ឺនដើម ចែកជូនប្រជាពលរដ្ឋដោយឥតគិតថ្លៃ ក្នុងម្នាក់បានច្រើនបំផុតចំនួន១០ដើម។ ក្រៅពីនេះ នៅក្នុងពិព័រណ៍ក៍បានដាក់បង្ហាញសមិទ្ធផលផ្សេងៗរបស់ ក្រសួងបរិស្ថាន មន្ទីរបរិស្ថាន និងអង្គដៃគូពាក់នានា និងតាំងបង្ហាញផលិតផលខ្មែរជាដើម។