ព្រឹត្តិការណ៍ទិវាវប្បធម៌រុស្ស៊ីនៅកម្ពុជាឆ្នាំ២០២៦ ដែលជាផ្នែក​នៃការ​អបអរ​សាទរ​ខួប​លើក​ទី៧០ នៃ​ការ​បង្កើត​ទំនាក់ទំនងការទូតកម្ពុជា-រុស្ស៊ី ត្រូវបានរៀបចំឡើងនៅរាជធានីភ្នំពេញ

នាល្ងាចថ្ងៃទី២៨ ខែមីនា ឆ្នាំ២០២៦ ទិវាវប្បធម៌រុស្ស៊ីនៅកម្ពុជា បានរៀបចំឡើង ក្រោម​អធិបតី​ភាព​លោក​ជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និង​ឯកឧត្តម​ Anatoly Borovik ឯកឧត្តម​អគ្គរដ្ឋទូត​វិសាមញ្ញ​ និង​ពេញ​សមត្ថភាព​នៃ​សហព័ន្ធ​រុស្ស៊ី​ប្រចាំ​ព្រះរា​ជាណា​ចក្រកម្ពុជា នៅសាលសន្និសីទចតុម្មុខ។

ព្រឹត្តិការណ៍​នេះមានការរៀបចំពិព័រណ៍វត្ថុសិល្បៈ សម្លៀកបំពាក់ប្រពៃណី និងការ​សម្តែង​សិល្បៈ​ក្រោម​ប្រធាន​បទ “អ្នកបន្តវេនតំបន់ស៊ីបេរី”។ កម្មវិធីនេះ ជាឱកាសក្នុងការចែករំលែក ការ​ផ្លាស់​ប្តូរ​ចំណេះ​ដឹង ក៏ដូចជាការស្វែងយល់ពីប្រពៃណីវប្បធម៌ក្នុងតំបន់ស៊ីបេរីដល់ប្រជាជនកម្ពុជា។

សូម​បញ្ជាក់ថា ព្រឹត្តិការណ៍នេះមិនត្រឹមតែជាការរំលឹកដល់អតីតកាលនោះទេ ប៉ុន្តែ​គឺ​ជា​ការ​ផ្តល់​តម្លៃ​​ដល់ចំណងមិត្តភាពដ៏រឹងមាំ ក៏ដូចជាការប្តេជ្ញាចិត្តរួមគ្នាឆ្ពោះទៅកាន់អនាគតមួយ ដែល​មាន​កិច្ច​សហប្រតិបត្តិការលើវិស័យវប្បធម៌យ៉ាងស៊ីជម្រៅ។ ជាការពិតណាស់ វប្បធម៌គឺជា​ដួង​ព្រលឹង​របស់​ជាតិ ​ជាអត្តសញ្ញាណស្នូល និងជាធនធានដ៏មានតម្លៃមិនចេះរីងស្ងួត ហើយ​បាន​ដើរ​តួនា​ទី​យ៉ាង​សំខាន់​ក្នុងការពង្រឹងភាពជាដៃគូរវាងប្រទេសទាំងពីរកម្ពុជា-រុស្ស៊ី៕