មកដល់សប្តាហ៍ទី២៧ឆ្នាំ២០២៤នេះ ខេត្តកំពង់ឆ្នាំង មានអ្នកជំងឺគ្រុនឈាមកើនឡើង១០ករណី បើធៀបទៅនឹងឆ្នាំ២០២៣

កំពង់ឆ្នាំង៖ នៅថ្ងៃទី១២ ខែកក្កដា ឆ្នាំ២០២៤នេះ លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងបានអោយដឹងថា នៅក្នុងខេត្តកំពង់ឆ្នាំងគិតមកដល់សប្ដាហ៍ទី២៧ ឆ្នាំ២០២៤នេះ មានអ្នកជំងឺគ្រុនឈាមកើតឡើងចំនួន១៣៤ករណី បើធៀបទៅនឹងឆ្នាំ២០២៣មានតែ១២៤ករណីប៉ុណ្ណោះ ក្នុងនោះមិនមានអ្នកគ្រុនឈាមជាមនុស្សចាស់នោះទេ ។

លោកវេជ្ជបណ្ឌិត ប្រាក់ វ៉ុន បានបន្តទៀតថា៖ ទោះបីនៅសប្ដាហ៍ទី២៧ ឆ្នាំ២០២៤នេះ ក្នុងខេត្តកំពង់ឆ្នាំង បានរាលដាលជម្ងឺគ្រុនឈាមជាងឆ្នាំ២០២៣ចំនួន១០ករណីក្តី ក៏ប៉ុន្តែមិនទាន់មានករណីស្លាប់ដោយសារជម្ងឺគ្រុនឈាមនៅឡើយទេ។ កត្តាទប់ស្កាត់បានទាំងនេះ ដោយសារតែមន្ទីរសុខាភិបាល និងអ្នកពាក់ព័ន្ធ ជាពិសេសអាណាព្យាបាលមានការយល់ដឹងច្រើន ព្រោះនៅពេលកូនចៅគាត់មានសភាពក្តៅខ្លួនពុំស្រួល គឺគាត់នាំកូនចៅមកកាន់មន្ទីរពេទ្យបង្អែកភ្លាមៗតែម្តង ទោះបីកូនចៅគាត់មានជម្អឺគ្រុនឈាម គ្រុនក្តៅ គ្រុនផ្តាសាយក៏ដោយ។

លោកវេជ្ជបណ្ឌិតបានបន្ថែមថា៖ ចំពោះអ្នកកើតជំងឺគ្រុនឈាម គឺមិនមែនកើតតែម្ដងជារហូតនោះទេ វាអាចនឹងកើតឡើងម្តងទៀត ប្រសិនបើយើងធ្វេសប្រហែសឲ្យសត្វមូសខ្លាញីខាំ។ ហេតុនេះក្នុងនាមលោកជាប្រធានមន្ទីរសុខាភិបាលខេត្តកំពង់ឆ្នាំង សូមអំពាវនាវដល់អាជ្ញាធរពាក់ព័ន្ធនឹងប្រជាពលរដ្ឋដែលជាមាតាបិតាអាណាព្យាបាលទាំងអស់ ត្រូវប្រុងប្រយ័ត្នដល់កូនចៅរបស់ខ្លួន ត្រូវឱ្យគេងក្នុងមុង ពាក់អាវខោអាវដៃវែងជាប់ជានិច្ច ហើយក៏ត្រូវរួមគ្នាសម្អាតធ្វើអនាម័យតាមគេហដ្ឋានផងដែរដូចជាត្រូវលុបក្រឡុក សំបកកង់ឡាន ចានស្នោ របស់ដក់ទឹកបាន និងចូលរួមដាក់ថ្នាំអាបេតអោយបានគ្រប់ៗផ្ទះ៕

ដោយ ៖ កាំង ហុងវាស្នា