កម្ពុជាបានត្រៀមលក្ខណៈរួចរាល់នាំផលិតផលជលផលទៅទីផ្សារអឺរ៉ុប

កម្ពុជាបានត្រៀមលក្ខណៈរួចរាល់ នាំផលិតផលជលផលពីកម្ពុជាទៅទីផ្សារអឺរ៉ុប ប្រសិន​បើ​អគ្គនាយកដ្ឋានទទួលបន្ទុកសុខភាព និងសុវត្ថិភាពរបស់សហភាពអឺរ៉ុប ចុះមក​វាយ​តម្លៃ​នៅ​ឆ្នាំ​២០២៥ ហើយយល់ព្រមអនុញ្ញាតឱ្យនាំទៅអឺរ៉ុប។

មានប្រសាសន៍ប្រាប់អ្នកសារព័ត៌មានមុនចេញដំណើរទស្សនកិច្ចសិក្សា និងផ្សព្វផ្សាយ អំពី​សហ​គ្រាស​ជលផលទទួលបានការគាំទ្រពីគម្រោង CAPFISH-Capture នាថ្ងៃទី១៥ ខែកក្កដានេះ លោក​ជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្មរុក្ខាប្រមាញ់ និង​នេសាទ បានឱ្យដឹងថា សហគ្រាសជលផលដែលទទួលបានការគាំទ្រពីគម្រោង CAPFISH-Capture បានត្រៀមលក្ខណៈរួចរាល់ រង់ចាំការវាយតម្លៃពីអគ្គនាយកដ្ឋានទទួលបន្ទុកសុខភាព និង​សុវត្ថិភាពរបស់សហភាពអឺរ៉ុប ចុះមកវាយតម្លៃនៅឆ្នាំក្រោយ។ ហើយប្រសិនការវាយតម្លៃនេះ គោរ​ព​ទៅតាមស្តង់ដារសុវត្ថិភាពម្ហូបអាហាររបស់សហភាពអឺរ៉ុប នោះកម្ពុជានឹងអាចនាំ​ផលិត​ផលជលផលទៅទីផ្សារអឺរ៉ុប។ លោកជំទាវបន្តថា តាមរយៈគម្រោង CAPFISH-Capture លូវ​នេះ​មាន​សហ​គ្រាសចំនួន១៧ហើយ ទទួលបាន​និមិត្ត​សញ្ញា​គុណភាព​​ផលិត​ផល​ជល​ផល​កម្ពុជា​(CQS)។

លោក ប្រាយអាន់ ហ្វ័រណារី (Bryan Fornari) នាយកផ្នែក​សហប្រតិបត្តិការ​សហភាព​អឺរ៉ុប​ប្រចាំ​ប្រទេស​កម្ពុជា លើកឡើងថា សហគ្រាសកម្ពុជា​អាច​នាំ​ផលិតផល​ជលផល​ទៅ​ទីផ្សារ​អឺរ៉ុប​ត្រូវការ​រៀប​ចំ​នីតិវិធីជាច្រើនដែលអាជ្ញាធរនៃប្រទេសកម្ពុជា និងសហភាពអឺរ៉ុបមានកិច្ចសហការរួមគ្នា។ លើស​ពីនេះ លោកបានលើកឡើងពី សក្តានុពលផលិតផលជលផលនៅកម្ពុជាផងដែរ។

រដ្ឋបាលជលផលនៃក្រសួងកសិកម្មរុក្ខាប្រមាញ់ និងនេសាទ សហការ​ជាមួយ​អង្គ​ការ​សហ​ប្រជាជាតិ​ដើម្បីអភិវឌ្ឍន៍(UNIDO) បានរៀបចំដំណើរទស្សនកិច្ចសិក្សា និងផ្សព្វផ្សាយ អំពី​សហ​គ្រាស​ជល​ផលទទួលបានការគាំទ្រពីគម្រោង CAPFISH-Capture ស្ថិតនៅក្នុងរាជធានីភ្នំពេញ ខេ​ត្តកោះកុង និងខេត្តព្រះសីហនុ ចាប់ពីថ្ងៃទី១៥ ដល់ថ្ងៃទី១៨ ខែកក្កដា ឆ្នាំ២០២៤។ ដំណើរ​ទស្សនកិច្ចនេះ ធ្វើឡើងក្រោមប្រធានបទស្តីពី៖ការទទួលស្គាល់ក្នុងស្រុក និង​ជា​សាកល​៖ផ​លិត​អាហារ​សុវត្ថិភាព ពន្លឿនភាពជោគជ័យ៕

អត្ថបទ៖ ទូច សោភ័ណ