ភ្ញៀវទេសចរជិត ២លាននាក់ ទៅទស្សនាខេត្ដសៀមរាប នាឱកាសចូលឆ្នាំថ្មីរយៈពេលបីថ្ងៃ

ភ្ញៀវ​ទេសចរជាតិ និងអន្ដរជាតិ ប្រមាណ១លានជាង៨៤ម៉ឺននាក់ បានដើរ​លេង​កម្សាន្ដ​ក្នុង​ពិធី​ចូល​ឆ្នាំ​ថ្មី​ប្រពៃណី​ជាតិខ្មែរ នៅខេត្ដសៀមរាប ចាប់ពីថ្ងៃទី១៤ដល់ថ្ងៃទី១៦ខែមេសាឆ្នាំ២០២៦នេះ ក្នុង​នោះមានអ្នកទេសចរជាតិនិងអន្ដរជាតិ ប្រមាណជាង៨ម៉ឺន៩ពាន់នាក់ បានទៅ​ទស្សនា​ប្រាសាទ​អង្គរ​។

អ្នកទេសចរជាតិបានសម្ដែងមោទនភាព នៅពេលខ្លួនបានឃើញពីភ្ញៀវទេសចរជាតិ និងអន្ដរជាតិ ទៅ​ទស្សនា ប្រាសាទអង្គរជាច្រើនកុះករ និងប្រកបដោយស្នាមញញឹម ដែលនេះបានបង្ហាញថា ប្រជាជន​ខ្មែរ បានចូលរួមលើកកម្ពស់ផ្សព្វផ្សាយពីវប្បធម៌ អរិយធម៌របស់ខ្លួនកាន់តែច្រើន ដើម្បី​ឱ្យ​ពិភព​លោក​បានស្គាល់ប្រាសាទបុរាណរបស់ខ្មែរ។ពួកគាត់បន្ដថា បើទោះបី ការដើរកម្សាន្ដ​ពិធី​បុណ្យ​ចូល​ឆ្នាំ​ថ្មី មានអាកាសធាតុកក្ដៅបន្ដិចក៏ពិតមែន ប៉ុន្ដែពេលចូលដល់តំបន់ប្រាសាទអង្គរ ហាក់​មាន​អារម្មណ៍ត្រជាក់ត្រជុំ ដែលពួកគាត់ហៅថា សៀមរាបអង្គរ ជាបេះដូងរបស់ខ្មែរ។ ពួកគាត់បន្ដថា ការចូលរួមដើរកម្សាន្ដចូលឆ្នាំថ្មី បានធ្វើឱ្យពួកគាត់ ក៏ដូចជា​យុវជន​យល់​ដឹង​ច្បាស់​ពី​វប្បធម៌​របស់ខ្លួនផងដែរ ជាពិសេស បានផ្ដល់ប្រាក់ចំណូលដល់ប្រជាពលរដ្ឋក្នុងមូលដ្ឋាន

របាយការណ៍មន្ទីរទេសចរណ៍ ខេត្ដសៀមរាប បានបង្ហាញថា ភ្ញៀវទេសចរជាតិ-អន្តរជាតិ និង​បង​ប្អូន​ប្រជា​ពលរដ្ឋដើរលេងកម្សាន្តក្នុងខេត្តសៀមរាបក្នុងថ្ងៃបុណ្យចូលឆ្នាំខ្មែរ ចាប់ពីថ្ងៃទី១៤-១៦ ខែ​មេសា ឆ្នាំ២០២៦ មានចំនួនប្រមាណ ១,៨៤២,៤៣៨ នាក់ក្នុងនោះ មានអ្នកទេសចរជាតិ និង​បង​ប្អូន​ប្រជា​ពលរដ្ឋប្រមាណ ១,៨៣៧,០០០ នាក់ និង និងភ្ញៀវទេសចរបរទេស មានចំនួន ៥,៤៣៨ នាក់។ ជាមួយគ្នានេះ អ្នកទេសចរជាតិនិងអន្ដរជាតិ បានចូលទស្សនាប្រាសាទអង្គរវត្ដ ប្រមាណ​ជាង​៨​ម៉ឺន៩ពាន់នាក់ ក្នុងអ្នកទេសចរអន្ដរជាតិមានជាង៥៤០០នាក់ ក្នុងរយៈពេល​៣​ថ្ងៃ​នៃ​ពិធី​បុណ្យ​ចូល​ឆ្នាំខ្មែរនេះ៕