អ្នកវិភាគនយោបាយបង្ហាញសុទិដ្ឋិនិយមចំពោះការរីកចម្រើនទំនាក់ទំនងបន្ថែមទៀតរវាងចិន និងកម្ពុជា

អ្នកវិភាគព្រឹត្តិការណ៍នយោបាយ និងសង្គម បានបញ្ជាក់ថា ដំណើរទស្សនកិច្ចរបស់រដ្ឋមន្ត្រីការបរ ទេស និងរដ្ឋមន្ត្រីក្រសួងការពារជាតិចិនមកកម្ពុជា ដើម្បីចូលរួមក្នុងកិច្ចប្រជុំស្តីពីយន្តការកិច្ចសន្ទ​នា​យុទ្ធ​សាស្ត្រ ២+២ កម្ពុជា-ចិន នៅថ្ងៃទី២២ ខែមេសា នេះ គឺពិតជានឹងនាំ​មកនូវសា​រ​ប្រយោជន៍​ជា​ខ្លាំង​សម្រាប់ប្រទេសទាំងពីរ ក្នុងការពង្រឹងនៅទំនាក់​ទំនង​ល្អ​ជា​មួយ​គ្នា​បន្ថែម​ទៀត​។

លោក ហេង ម៉េងលី អ្នកតាមព្រឹត្តិការណ៍នយោបាយ បានប្រាប់ BTV ថា កិច្ច​ប្រជុំ​ស្តី​ពី​យន្ត​ការ​កិច្ច​សន្ទនា​យុទ្ធសាស្ត្រ ២+២ រដ្ឋមន្ត្រីការបរទេស និងរដ្ឋមន្ត្រីការពារជាតិ កម្ពុជា-ចិន គឺ​ពិត​ជា​មាន​សារ​សំខាន់សម្រាប់កម្ពុជា ដែលកម្ពុជា-ចិន គឺជាមិត្តដែកថែបយូរអង្វែងមកហើយ។ កិច្ច​ប្រជុំ​នេះ ​ក៏នឹងពិភាក្សាលើបញ្ហាមួយចំនួននៅក្នុងតំបន់ និងអន្តរជាតិ និងជំរុញ​នូវ​ការ​ថែ​រក្សា​សន្តិសុខ​នៅ​ក្នុងតំ​បន់ និងពិភពលោក ជំរុញពង្រឹងដំណោះស្រាយផ្សេងៗដោយឈរលើសន្តិភាពនិយម។ ហើយ​ជា​ឱកាសថ្មីបន្ថែមទៀតទៅលើកិច្ចសហប្រតិបត្តិការ និងការពារ​ជាតិ​របស់​កម្ពុជា​ឲ្យមាន​តុល្យ​ភាព​នៅ​ក្នុងបរិការភូមិសាស្ត្រនយោបាយសកលដែលមានការផ្លាស់ប្តូរថ្មី។

បណ្ឌិត សឺន សំ អ្នកវិភាគ និងជាអ្នកតាមដានព្រឹត្តិការណ៍នយោបាយ និងសង្គម បានថ្លែងថា ដំណើរ​ទស្សនកិច្ចរបស់ឯកឧត្តម វ៉ាង យី រដ្ឋមន្ត្រីការបរទេស និងឯកឧត្តម តុង ជុន រដ្ឋ​មន្ត្រី​ក្រសួង​ការពារ​ជាតិចិន មកកម្ពុជាដើម្បីចូលរួមកិច្ចប្រជុំស្តីពីយន្តការកិច្ចសន្ទនាយុទ្ធសាស្ត្រ ២+២ គឺ​រដ្ឋមន្ត្រីការបរទេស និងរដ្ឋមន្ត្រីការពារជាតិ រវាងកម្ពុជា និងចិន នៅថ្ងៃទី២២ ខែមេសា ឆ្នាំ​២០២៦ គឺពិតជាមានសារសំខាន់សម្រាប់ប្រទេសទាំងពីរក្នុងការពង្រឹងនៅទំនាក់ទំនងល្អ ជា​មួយ​គ្នា​បន្ថែម​ទៀត ពោលគឺកម្ពុជា ចិន ជាមិត្តដែកថែប ហើយមានកិច្ច​ការ​បន្ថែម​ទៀត​ដែល​ប្រទេស​ទាំង​ពីរ​ត្រូវ​ជួប​ពិភាក្សា​ជាមួ​យ​គ្នា​ដើម្បី​ធ្វើយ៉ា​ង​ណាឱ្យ​ទំនាក់​ទំនង​ប្រទេសទាំ​ង​ពីរ​កាត់​តែមា​ន​ភាព​ជិត​ស្និទ្ធ​កាន់តែមានភាពល្អប្រសើរ។

សូមជម្រាបថា កម្ពុជា នឹងធ្វើម្ចាស់ផ្ទះកិច្ចប្រជុំ ស្តីពីយន្តការកិច្ចសន្ទនាយុទ្ធសាស្ត្រ ២+២ រវា​ង​រដ្ឋ​មន្ត្រី​ការ​បរទេស និងរដ្ឋមន្ត្រីការពារជាតិកម្ពុជានិងចិន នៅថ្ងៃទី២២ ខែមេសា ឆ្នាំ២០២៦។ កិច្ច​ប្រ​​ជុំនេះ គឺដើម្បីពង្រឹង​ទៅ​លើដៃគូរយុទ្ធសាស្ត្រគ្រប់ជ្រុងជ្រោយរវាងប្រទេស​ទាំងពីរ​ដែល​បាន​ឯក​ភាព​គ្នា​កន្លង​មក ក៏ដូចជាការលើកកម្ពស់ជំនឿទុកចិត្តផ្នែកនយោបាយ និងពង្រឹងកិច្ច​សហ​ប្រតិ​បត្តិ​ការ​រវាងប្រទេសទាំងពីរបន្ថែមទៀត៕ អត្ថបទ៖ វង្ស សុភាព