គ.ស.ហ ពិនិត្យពិភាក្សាលើសេចក្តីព្រាងនៃការដឹកជញ្ជូនតាមផ្លូវទឹក មុនដាក់ជូនរាជរដ្ឋាភិបាល

គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បើកកិច្ចប្រជុំចង្អៀត ពិនិត្យ​លើការ​រៀបចំ​ឯក​សារក្របខណ្ឌនៃការ អភិវឌ្ឍ និងការគ្រប់គ្រងអាជីវកម្មកំពង់ផែទន្ល និងការតភ្ជាប់​បណ្តាញ​ប្រព័ន្ធ​ដឹកជញ្ជូនតាមផ្លូវទឹកទន្លេ ជាមួយផ្លូវសមុទ្រនៅកម្ពុជា មុននឹងដាក់​ជូន​រាជ​រដ្ឋាភិបាល​ពិនិត្យ និងអនុម័តដាក់ឱ្យអនុវត្ត។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និង​ហិរញ្ញវត្ថុ និងជាប្រធាន គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ គ.ស.ហ. នៅ​ថ្ងៃទី១៦ ខែកក្កដា ឆ្នាំ២០២៤ នេះ បានដឹកនាំកិច្ចប្រជុំ ដើម្បីពិនិត្យ និងពិភាក្សាលើសេចក្តីព្រាង «ក្របខណ្ឌនៃការអភិវឌ្ឍ និងការគ្រប់គ្រងអាជីវកម្មកំពង់ផែទន្លេ និងការតភ្ជាប់បណ្តាញ ប្រព័ន្ធ​ដឹក​ជញ្ជូន​តាម​ផ្លូវទឹកទន្លេជាមួយផ្លូវសមុទ្រនៅកម្ពុជា» មុននឹងដាក់ជូនរាជរដ្ឋាភិបាលពិនិត្យ និង​អនុម័ត​ដាក់​ឱ្យអនុវត្តនា ពេលខាងមុខ។

ជុំវិញបញ្ហានេះដែរ បន្ទាប់ពីបានដាក់ចេញនូវផែនការមេគ្រប់ជ្រុងជ្រោយ ស្តីពីប្រព័ន្ធ​ដឹក​ជញ្ជូន​អន្តរ​មធ្យោបាយ និងភស្តុភារ កម្មកម្ពុជា ២០២៣-២០៣៣២, រាជរដ្ឋាភិបាល​បាន​សម្រេច​នូវ​កិច្ចការ​អាទិភាពពាក់ព័ន្ធនឹងវិស័យដឹកជញ្ជូនផ្លូវទឹកជាបន្តបន្ទាប់ ក្នុងនោះ «ច្បាប់ស្តីពីការ​ដឹក​ជញ្ជូន​តាម​ផ្លូវទឹក» ត្រូវបានអនុម័ត និងដាក់ឱ្យប្រើប្រាស់នាពេលថ្មីៗនេះ។ បន្ថែមពីនេះ ក្រប​ខណ្ឌ នៃការអភិវឌ្ឍ និងការគ្រប់គ្រងអាជីវកម្មកំពង់ផែទន្លេ និងការតភ្ជាប់​បណ្តាញ​ប្រព័ន្ធ​ដឹក​ជញ្ជូន​តាម​ផ្លូវ​ទឹកទន្លេ ជាមួយផ្លូវសមុទ្រនៅ កម្ពុជា ត្រូវបានរៀបចំឡើងជាផែនទីបង្ហាញផ្លូវ សម្រាប់​ក្រសួង-ស្ថាប័នពាក់ព័ន្ធ ក្នុងការរៀបចំផែនការ និងអភិវឌ្ឍវិស័យដឹកជញ្ជូន តាមផ្លូវ​ទឹក​ទន្លេ​ ឱ្យកាន់តែមានភាពរីកចម្រើន និងស្របតាមនិន្នាការសកល ។

ក្របខណ្ឌនេះមានគោលបំណងពង្រីក និងបង្កើន​ការ​ប្រើប្រាស់​ប្រព័ន្ធ​ដឹក​ជញ្ជូន​តាម​ផ្លូវ​ទឹក​ទន្លេ​តាមរយៈ​ការធ្វើឱ្យប្រសើរឡើងនូវហេដ្ឋារចនាសម្ព័ន្ធដឹក​ជញ្ជូនតាមផ្លូវ​ទឹក​លើក​កម្ពស់​ប្រសិទ្ធ​ភាព​សេវា​កំពង់​ផែ​ដោយការប្រើប្រាស់បច្ចេកវិទ្យាទំនើប និងការកាត់បន្ថយ​ចំណាយ​ឡូជីស្ទិក​សំដៅ​រួម​ចំណែក​ទ្រទ្រង់​ចីរភាពនៃកំណើនសេដ្ឋកិច្ចកម្ពុជាក្នុងរយៈពេលវែង និងបង្កើនសមត្ថភាព​ប្រកួត​ប្រជែង​ក្នុង​តំបន់ និងសកល។

ដើម្បីសម្រេចគោលបំណងខាងលើ, ក្របខណ្ឌនេះ កំណត់គោលដៅក្នុងការបង្កើន​ការ​ប្រើប្រាស់​មធ្យោបាយ​ដឹកជញ្ជូនតាម ផ្លូវទឹកទន្លេ តាមរយៈការដាក់ចេញនូវវិធានការជាយុទ្ធសាស្ត្រ ដែល​គិត​គូរ​អំពី៖ ការកំណត់ទីតាំងកំពង់ផែទន្លេជាយុទ្ធសាស្ត្ររបស់ រាជរដ្ឋាភិបាល និងការដាក់​ចេញ​នូវ​សសរស្ដម្ភចំនួន៥រួមមាន៖ ការពង្រឹងក្របខណ្ឌគតិយុត្ត, ការពង្រឹងយន្តការស្ថាប័ន, ការ​កំណត់អាទិភាពលើយុទ្ធសាស្ត្រវិនិយោគ, ការកំណត់ប្រភពហិរញ្ញប្បទាន និងម៉ូឌលអភិវឌ្ឍន៍ និង ការអនុវត្តបញ្ជីគម្រោងនៃផែនការមេ គ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និង​ភស្តុភារកម្មកម្ពុជា ២០២៣-២០៣៣៕

អត្ថបទ៖ សុន រ៉ាឌី