គណៈកម្មាការអន្ដរក្រសួង ចុះពិនិត្យ និងវាយតម្លៃប្រគល់ទទួលបញ្ចប់ផ្លូវកៅស៊ូ ប្រវែងជាង ៣គីឡូម៉ែត្រ នៅឃុំសង្វើយ ស្រុកជីក្រែង ខេត្តសៀមរាប

ផ្លូវកៅស៊ូពីរជាន់ចំនួន ១ខ្សែ មានប្រវែង ៣,៥០០ម៉ែត្រ នៅក្នុងភូមិពាក់ស្ពា នៅឃុំសង្វើយ ស្រុក​ជីក្រែង ខេត្តសៀមរាប ត្រូវបានក្រុមការងារអន្ដរក្រសួងចំនួន២ ចុះត្រួតពិនិត្យ និងវាយ​តម្លៃ​ប្រគល់​ទទួលបញ្ចប់ជាស្ថាពររយៈពេលធានាសុពលភាពការងារថែទាំផ្លូវ។ ផ្លូវនេះស្ថាបនា​ដោយ​កង​វិស្វកម្មលេខ ១៨០ ស្ពាន-ថ្នល់ នាយកដ្ឋានវិស្វកម្ម ក្រសួងការពារជាតិ។

គួរឱ្យដឹងថា រាជរដ្ឋាភិបាលកម្ពុជា ដែលមានក្រសួងអភិវឌ្ឍន៍ជទបទ ជាសេនាធិការ បាន​នឹង​កំពុង​ខិតខំស្ថាបនាផ្លូវនៅទីជនបទឱ្យកាន់តែល្អប្រសើរ ដែលក្នុងនោះមានផ្លូវចាក់បេតុង ផ្លូវ​ក្រាល​កៅស៊ូពីរជាន់ និងផ្លូវក្រាលគ្រួសក្រហមជាដើម ដើម្បីបង្កភាពងាយស្រួល ក្នុងការធ្វើ​ដំណើរ​របស់​ប្រជាពលរដ្ឋនៅទីជនបទ ក៏ដូចជាការដឹកជញ្ជូនកសិផល ជាពិសេសនៅក្នុងរដូវវស្សានេះ។

ក្រុមការងារអន្ដរក្រសួងដែលដឹកនាំដោយឯកឧត្ដមបណ្ឌិត នួន ដាញ៉ិល រដ្ឋលេខាធិការ​តំណាង​ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅព្រឹកថ្ងៃទី១៩ ខែកក្កដា ឆ្នាំ​២០២៤។

ក្នុងពេលដឹកនាំគណៈកម្មការអន្តរក្រសួងចុះពិនិត្យវាយតម្លៃផ្លូវជនបទ និងសំណេះ​សំណាល​ជា​មួយ​ពលរដ្ឋរស់នៅអមសងខាងផ្លូវឯកឧត្ដមបណ្ឌិត នួន ដាញ៉ិល បានថ្លែងថា ផ្លូវគឺជា​សរសៃ​ឈាម​ ដ៏​សំខាន់មួយ ក្នុងការអភិវឌ្ឍសេដ្ឋកិច្ចនៅកម្ពុជា ដូចនេះ រាជរដ្ឋាភិបាលតាំងពីអាណត្តិមុន រហូត​​ដល់​រាជ​រដ្ឋាភិបាលទី៧ នៅតែចាត់ទុក និងដាក់ចូលវិស័យនេះ នៅក្នុង​យុទ្ធសាស្ត្រ​បញ្ចកោណ ដំណាក់​កាលទី១។ មួយវិញទៀតការអភិវឌ្ឍផ្លូវជនបទ ដើម្បីតភ្ជាប់រវាងទីជនបទ និង​ទីប្រជុំជន ឬ​ទីក្រុងឱ្យកាន់តែខិតជិតគៀកគ្នា ប្រជាពលរដ្ឋងាយស្រួលធ្វើដំណើរទៅមក ជា​ពិសេស ការ​នាំ​យក​កសិផល ឬផលិតផលផ្សេងៗ ទៅកាន់ទីផ្សារបានឆាប់រហ័ស។

ឯឧត្ដម​បណ្ឌិតរដ្ឋលេខាធិការ បានបន្ថែមថា មិនត្រឹមតែប៉ុណ្ណោះ ការប្រែក្លាយផ្លូវជនបទ ដែល​ពី​មុន​មាន​សភាពភក់ជ្រាំ លំបាកក្នុងការធ្វើដំណើរនេះ វាជួយកាត់បន្ថយពេលវេលា ថវិកា មាន​សុវត្ថិ​ភាព មិនបង្កការរំខានសម្រាប់សិស្សានុសិស្សទៅកាន់សាលារៀន និង​ប្រជាពលរដ្ឋទៅកាន់មន្ទី​រ​ពេទ្យ ​កាន់តែឆាប់រហ័សជាងមុនដែលទាំងនេះ គឺជាការគិតគូររបស់រាជរដ្ឋាភិបាល មិនថា​ត្រឹម​តែ​នៅ​ខេត្តតាកែវមួយប៉ុណ្ណោះទេ គឺនៅទូទាំងប្រទេស។

ឆ្លៀតឱកាសនោះដែរក្រុមការងារក៏បានបង្ហាញនូវសមិទ្ធផលរបស់រាជរដ្ឋាភិបាល តាមរយៈ​ក្រសួង​អភិវឌ្ឍន៍​ជនបទ បានផ្តល់ផ្លូវសម្រាប់ឱ្យប្រជាពលរដ្ឋងាយស្រួលធ្វើដំណើរ ដឹកកសិកផល​ទៅ​កាន់​ទីផ្សារ និងចូលរួមចំណែកលើកស្ទួយជីវភាពរបស់អ្នកភូមិនៅតំបន់នេះឱ្យកាន់តែល្អប្រសើរទៀត។

ឯកឧត្ដមបណ្ឌិត នួន ដាញ៉ិល និងក្រុមការងារក៏បានអំពាវនាវ និងស្នើឱ្យអាជ្ញាធរ​មូលដ្ឋាន​រួម​នឹង​ប្រ​ជាពលរដ្ឋ ត្រូវចូលរួមថែរក្សាផ្លូវទាំងនោះឱ្យបានល្អ និងចូលរួម​ទប់​ស្កាត់​ការ​ដឹកជញ្ជូន​លើស​ទម្ងន់​កំណត់ ដើម្បីរក្សាគុណភាពផ្លូវឱ្យជាប់បានយូរ ងាយស្រួលក្នុងការធ្វើដំណើរ ពិសេស​ប្រជាពលរដ្ឋ​ត្រូវ​ចាត់ទុកផ្លូវទាំងអស់នៅក្នុងមូលដ្ឋានជាផ្លូវរបស់ខ្លួន។

ប្រជាពលរដ្ឋ​បានបង្ហាញនូវការសប្បាយរីករាយ ដែលទទួលបាននូវសមិទ្ធផលផ្លូវថ្មី ធ្វើឱ្យពួក​គាត់​ងាយ​ស្រួល​ក្នុងការធ្វើដំណើរ ហើយការអភិវឌ្ឍនូវផ្លូវនេះ គឺបានឆ្លើយតបទៅនឹងសំណូមពរ និង​តម្រូវ​ការ​ចាំបាច់ ដែលចង់បានកន្លងមក៕