សម្ដេចតេជោ៖ កំណែទម្រង់ហិរញ្ញវត្ថុសាធារណៈជាបញ្ហាដ៏ធំដូចអូសឫស្សីបញ្ច្រាសចុង

សម្តេចតេជោ ហ៊ុន សែន ប្រមុខរដ្ឋស្តីទី បានរំលឹក​អំពី​បញ្ហា​ទាក់​ទិន​នឹង​កំណែ​ទម្រង់​ហិរញ្ញវត្ថុ​សាធារណៈ ដែលជាបញ្ហាធំ ប្រៀបបាននឹងការអូសឫស្សីបញ្ច្រាសចុងដូច្នោះដែរ។

ក្នុងឱកាសអ​ញ្ជើញទស្សនកិច្ចទីស្នាក់ការថ្មី នៃអគ្គនាយកដ្ឋានពន្ធដារ នាព្រឹកថ្ងៃទី២ ខែមិថុនា នេះ សម្តេចតេជោ ហ៊ុន សែន បានបញ្ជាក់ថា ការធ្វើកំណែទ​ម្រង់​ហិរញ្ញ​វត្ថុ​សាធារណៈ​ដោយ​រាប់​បញ្ចូល​ទាំង​ការកែទម្រង់ពន្ធដារ មិនមែនជាបញ្ហាតូចតាចទេ វាធំណាស់ ស្ទើរដូចអូស​ឫស្សី​បញ្ច្រាស​ចុង​ឯណោះ។ រឿងអ្នកជាប់ពន្ធ វាជារឿងមួយហើយ ប៉ុន្តែមន្ត្រីដែលបាត់បង់ផលប្រយោជន៍គឺជារឿងមួយទៀត។

សម្ដេចតេជោ បានលើកឡើងអំពីការផ្ដលើ់ចំណារពីរ យកទៅប្រើប្រាស់ដើម្បីធ្វើកំណែទម្រង់ គឺទី១- ឆ្នាំ២០១៣ ធ្វើសកម្មភាពដោយក្ដីក្លាហាន កុំមានការភ័យខ្លាចអី។ ទី២- ធ្វើ និងអនុវត្ត ហើយបញ្ជាក់ថា អ្នកដែលមក Lobby ខ្ញុំឱ្យយល់ខុស មកដល់ពេលនេះ មិនទាន់កើត ឬមិនទាន់ចាប់ជាតិនៅឡើយទេ។ បើមិនមានភាពហ្មត់ចត់ម៉ឺងម៉ាត់ កំណែទម្រង់នេះចេញមិនរួចទេ ។ ខ្ញុំធ្លាប់បញ្ជាក់ហើយថា វាវេទនាណាស់ ដែលធ្វើនាយករដ្ឋមន្ត្រីដោយគ្មានសាច់ប្រាក់ វាគ្មានប្រាក់ចំណូលគ្រប់គ្រាន់បំពេញឱ្យការចំណាយ ។ ប៉ុន្តែខ្ញុំជ្រើសរើសមនុស្សត្រូវ ដោយជ្រើសរើស គង់ វិបុល ហើយចាប់ផ្ដើមធ្វើកំណែទម្រង់ ដែលដឹកនាំដោយឯកឧត្តម គាត់ ឈន់ និងបន្តមក ឯកឧត្តម អូន ព័ន្ធមុនីរដ្ឋ ។ ប្រសិនបើមិនធ្វើកំណែទម្រង់ទេ ប្រហែលប្រាក់ពន្ធរបស់យើងគឺនៅដដែល។

សម្ដេចតេជោ ហ៊ុន សែន បានរំលឹកអំពីការសន្សំប្រាក់បានប្រមាណ៤ពាន់លានដុល្លារ សម្រាប់ចាត់ចែងធ្វើការអភិវឌ្ឍជាតិ តែកូវីដ-១៩ បានធ្វើឱ្យស្រកស្រុតផែនការរបស់សម្ដេច មិនបានសម្រេច ប៉ុន្តែក្រោយពីកូវីដ បានងើឡើងវិញ៕