បេក្ខសមណសិស្សខេត្តស្វាយរៀង ប្រឡងសញ្ញាបត្រធម្មវិន័យថ្នាក់ត្រីថ្នាក់ទោនិងថ្នាក់ឯក

បេក្ខសមណសិស្សក្នុងខេត្តស្វាយរៀង ថ្ងៃទី៧ ខែមិថុនា ឆ្នាំ២០២៦ បានធ្វើការប្រឡងដើម្បីទទួលយកសញ្ញាបត្រធម្មវិន័យ ថ្នាក់ត្រី ថ្នាក់ទោ និងថ្នាក់ឯក ។

អភិបាលរងខេត្តស្វាយរៀង លោក ញ៉ែម សារី ក្នុងឱកាសបើកវិញ្ញាសារជូនដល់បេក្ខសមណសិស្សសញ្ញាបត្រធម្មវិន័យ ថ្នាក់ត្រី ថ្នាក់ទោ និងថ្នាក់ឯក នៅក្នុងមណ្ឌលវត្ត (ជម្ពូប្រឹក្សា) មណ្ឌលវត្ត (ព្រៃឆ្លាក់)  ក្រុងស្វាយរៀង បានស្នើដល់បេក្ខសមណសិស្ស ទាំងអស់ត្រូវបញ្ចេញសមត្ថភាព​ ចំណេះដឹង ដែលបានសិក្សាកន្លងមក ដើម្បីប្រឡងយកសញ្ញាបត្រ សម្រាប់បន្តការសិក្សាបន្ថែមនៅតាមគ្រឹះស្ថាននានា។

លោកអភិបាលរងខេត្ត បានបញ្ជាក់ថា បានស្នើដល់លោកគ្រូ អនុរក្ស និងមន្ត្រីពាក់ព័ន្ធ ត្រូវសហការត្រួតពិនិត្យបន្ថែមឱ្យបានគ្រប់សកម្មភាព រក្សាការពារ សន្តិសុខ សណ្តាប់ធ្នាប់ ក្នុងករណីមានសកម្មភាពមិនប្រក្រតីត្រូវធ្វើការទប់ស្កាត់ឱ្យបានទាន់ពេលវេលា ដើម្បីបង្កលក្ខណៈសម្បត្តិផ្តល់ឱកាសជូនបេក្ខសមណសិស្សប្រឡងឱ្យមានសុវត្ថិភាព ។

របាយការណ៍របស់មន្ទីរធម្មការ និងសាសនា ខេត្តស្វាយរៀង បានបញ្ជាក់ថា នៅក្នុងសម័យប្រឡងសញ្ញាបត្រធម្មវិន័យថ្នាក់ត្រី ថ្នាក់ទោ និងថ្នាក់ឯក ឆ្នាំសិក្សា២០២៥-២០២៦ នេះ មានបេក្ខសមណសិស្សដាក់ពាក្យចូលប្រឡង ចំនួន៤០០អង្គ/នាក់ ក្នុងនោះ មន្ទីរបានរៀបចំមណ្ឌលប្រឡងចំនួនពីរ រួមមានមណ្ឌល វត្តជម្ពូប្រឹក្សា និងមណ្ឌល វត្តព្រៃឆ្លាក់ ស្មើនឹង​១៨បន្ទប់ រួមមានថ្នាក់ត្រី ចំនួន២១៧អង្គ ថ្នាក់ទោ ចំនួន១២៥អង្គ និងថ្នាក់ឯក ចំនួន៥៨អង្គ៕ ដោយ ៖ ភា សារិត