សម្តេចធិបតី៖ វិស័យអប់រំ និងសុខាភិបាល នៅតែជាអាទិភាពសម្រាប់ការដឹកនាំរបស់គណបក្សប្រជាជនកម្ពុជា

សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានប្រកាសអះអាងជាថ្មីម្តងទៀត ថា វិស័យអប់រំបណ្ដុះបណ្ដាលធនធានមនុស្ស និងវិស័យសុខាភិបាល គឺនៅតែជាអាទិភាពសម្រាប់ការដឹកនាំរបស់គណបក្សប្រជាជនកម្ពុជា ហើយវិស័យទាំងនេះ មិនត្រូវបានកាត់បន្ថយថវិកានោះឡើយ គឺមានតែលើកកម្ពស់បន្ថែមទៀត។

ក្នុងឱកាសអញ្ជើញជាអធិបតី ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៩ នាថ្ងៃទី១៥ ខែមិថុនា នេះ សម្តេចធិបតី ហ៊ុន ម៉ាណែត បានគូសបញ្ជាក់ថា ធនធានមនុស្ស គឺជួយឱ្យមានភាពធន់ ដរាបណាធនធានមនុស្សនេះមានភាពរឹងមាំ សេដ្ឋកិច្ចនឹងរឹងមាំ ហើយសេដ្ឋកិច្ចរឹងមាំ ការពារជាតិក៏រឹងមាំយូរអង្វែង ដូច្នេះហើយរាជរដ្ឋាភិបាល គ្មានគម្រោងកាត់បន្ថយការចំណាយទៅលើវិស័យអប់រំបណ្ដុះបណ្ដាលធនធានមនុស្ស និងវិស័យសុខាភិបាលនោះឡើយ។

សម្តេចធិបតីនាយករដ្ឋមន្រ្តី ក៏បានលើកឡើងផងដែរថា ការកសាងធនធានមនុស្សដែលជាធន ធានសំខាន់សម្រាប់ប្រទេសជាតិ គឺត្រូវយកចិត្តទុកដាក់លើសុខភាពជា គឺត្រូវធ្វើយ៉ាងណាឱ្យពលរដ្ឋម្នាក់ៗពោរពេញទៅដោយសុខភាពល្អ ជាធនធានរបស់គ្រួសារ ដូច្នេះរាជរដ្ឋាភិបាលនឹងខិតខំលើកកម្ពស់នូវវិស័យធនធានមនុស្ស និងសុខាភិបាលនេះឱ្យកាន់តែល្អប្រសើរបន្ថែមទៀត៕អត្ថបទ៖ បាន ចក់