កាកបាទក្រហមកម្ពុជា រៀបចំពិធីសូត្រមន្តចម្រើនព្រះជន្មវស្សា ថ្វាយសម្ដេចព្រះមហាក្សត្រី ព្រះវររាជមាតាជាតិខ្មែរ គម្រប់ ៩០ យាងចូល ៩១ព្រះវស្សា

នៅក្នុងឱកាសដ៏មហានក្ខត្តឫក្សឧត្តុង្គឧត្តម នៃព្រះរាជពិធីបុណ្យចម្រើនព្រះជន្មវស្សា គម្រប់ ៩០ យាងចូល ៩១ព្រះវស្សា របស់សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល និងជាព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។ កាកបាទក្រហមកម្ពុជា បានរៀបចំពិធីសូត្រមន្ត ចម្រើនព្រះបរិត្ត និងរាប់បាត្រព្រះសង្ឃ ដើម្បីថ្វាយព្រះរាជកុសល និងថ្វាយព្រះពរជ័យ សិរីសួស្តី ជយាមហាប្រសើរ ថ្វាយសម្តេចម៉ែជាម្ចាស់ជីវិតលើត្បូង។

ពិធីដ៏មហោឡារិកនេះ បានប្រព្រឹត្តទៅនៅព្រឹកថ្ងៃព្រហស្បតិ៍​ ៤កើត ខែបឋមាសាឍ ឆ្នាំមមី អដ្ឋស័ក ព.ស. ២៥៧០ ត្រូវនឹង ថ្ងៃទី១៨ ខែមិថុនា ឆ្នាំ២០២៦ នៅទីស្នាក់ការកណ្តាលកាកបាទក្រហមកម្ពុជា ស្ថិតក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។ ក្រោមអធិបតីភាពដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។

ភ្លាមៗបន្ទាប់ពីការអញ្ជើញមកដល់ សម្តេចកិត្តិព្រឹទ្ធបណ្ឌិត ប្រធាន បានអញ្ជើញបូជាគ្រឿងសក្ការៈ ផ្កា ទៀន និងធូប ថ្វាយព្រះភូមិទេវតា នៅខាងមុខអគារធំជាន់ផ្ទាល់ដី និងបានអញ្ជើញថ្វាយផ្កា ចំពោះព្រះឆាយាលក្ខណ៍ សម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត។

បន្ទាប់មក សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមជាមួយថ្នាក់ដឹកនាំ ភរិយាថ្នាក់ដឹកនាំ សប្បុរសជន មន្ត្រី បុគ្គលិក និងយុវជនកាកបាទក្រហមកម្ពុជា បានអញ្ជើញចូលរួមក្នុងពិធីសូត្រមន្តចម្រើនព្រះបរិត្ត នៅសាល A ជាន់ទី៣ ដោយមានការយាង និងនិមន្តពី សម្តេចសង្ឃ និងព្រះសង្ឃ សរុបចំនួន ៩១ អង្គ ស្របតាមព្រះរាជប្បវេណី និងតាមគន្លងព្រះពុទ្ធសាសនា។ នៅក្នុងឱកាសនោះដែរ សម្តេចកិត្តិព្រឹទ្ធបណ្ឌិត ប្រធាន ក៏បានអញ្ជើញថ្វាយប្រគេនទេយ្យទាន ចំពោះសម្តេចសង្ឃ ៩អង្គ នៅសាល A ជាន់ទី៣ ផងដែរ។

ជាកិច្ចបន្ទាប់ ពិធីរាប់បាត្រថ្វាយប្រគេន សម្តេចសង្ឃ និងព្រះសង្ឃទាំង ៩១ អង្គ បានប្រព្រឹត្តទៅយ៉ាងជ្រះថ្លានៅខាងមុខអគារធំជាន់ផ្ទាល់ដី។ នៅក្នុងឱកាសដ៏វិសេសវិសាលនេះ សម្តេច ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី ដែលបានអញ្ជើញចូលរួមក៏បានមានសទ្ធាជ្រះថ្លា មហិមា បានចូលរួមរាប់បាត្រថ្វាយ-ប្រគេន សម្តេចព្រះមហាសង្ឃរាជ សម្តេចព្រះសង្ឃ និងព្រះសង្ឃគ្រប់ព្រះអង្គ ទៅតាមកម្លាំងសទ្ធារៀងៗខ្លួន ដើម្បីឧទ្ទិសកុសល និងថ្វាយព្រះរាជកុសលជានិរន្តរ៍។

សូមបញ្ជាក់ជូនផងដែរថា នៅក្នុងវរោកាសដ៏ឧត្តុង្គឧត្តមថ្លៃថ្លានេះ កាកបាទក្រហមកម្ពុជា បានរៀបចំទេយ្យទានយ៉ាងសមរម្យសម្រាប់ថ្វាយ-ប្រគេន សម្តេចសង្ឃ ៩ អង្គ ដោយក្នុង ១ អង្គៗ រួមមាន៖ លាងបរិក្ខា ១, កន្ត្រកភេសជ្ជៈ១, កន្ត្រកផ្លែឈើ១, ចង្ហាន់១ស្រាក់, បង្អែម១កាតូ, ព្រមទាំងបច្ច័យចំនួន ១.០០០ ដុល្លារអាម៉េរិក។ បន្ថែមលើនេះ កាកបាទក្រហមកម្ពុជា ក៏បានប្រគេនទេយ្យទានសម្រាប់វត្តចំនួន ៩ ក្នុង១វត្តៗ ទទួលបាន កន្ត្រកផ្កា១កន្ត្រ, អង្ករ១បាវ ស្មើ៥០គីឡូ, មី១កេស, ត្រីខ១កេស, ត្រីងៀត-សាច់ក្រក ១កន្រ្តកស្មើ១៤គីឡូក្រាម, ទឹកបរិសុទ្ធអារុណា២កេស, ទឹកក្រូច២កេស, ទឹកត្រឡាច២កេស, ទឹកសណ្តែក២កេស, បាកាស២កេស, ទឹកដោះខាប់១កេស, ទឹកដោះស្រស់៥កេស, អូវ៉ាន់ទីន១កេស, និងបច្ច័យចំនួន ១០ លានរៀល។ ដោយឡែក ទេយ្យទានសម្រាប់រាប់បាត្រព្រះសង្ឃចំនួន ៨២ អង្គ គឺក្នុង១អង្គៗ ប្រគេន៖ សាដក១, ចង្ហាន់ ១ស្រាក់, បង្អែម១កាតូ និងបច្ច័យចំនួន ២០ម៉ឺនរៀល។

ទន្ទឹមនឹងពិធីដ៏មានអត្ថន័យនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសហការីទាំងអស់នៃកាកបាទក្រហមកម្ពុជា មានសេចក្តីសោមនស្សរីករាយជាអនេកប្បការ និងសូមព្រះបរមរាជានុញ្ញាតលំឱនកាយថ្វាយ ព្រះរាជសព្ទសាធុការពរ បវរសួស្តី សិរីវឌ្ឍនា ជយាមហាប្រសើរ ថ្វាយសម្ដេចព្រះមហាក្សត្រី ព្រះវររាជមាតាជាតិខ្មែរ សូមព្រះអង្គប្រកបដោយព្រះរាជសុខភាពល្អបរិបូរណ៍ ព្រះកាយពលមាំមួនខ្លាំងក្លា ព្រះរបស់ព្រះអង្គ ជ្រកកោនក្នុងក្តីសុខក្សេមក្សាន្ត ជានិច្ចនិរន្តរ៍។

ក្នុងវរោកាសដ៏មហាប្រសើរថ្លៃថ្លានេះ សម្តេចកិត្តិព្រឹទ្ធបណ្ឌិត និងសហការី ក៏សូមអភិវន្ទថ្វាយនូវព្រះរាជកតញ្ញូកតវេទិតាធម៌ដ៏ខ្ពង់ខ្ពស់បំផុត ថ្វាយសម្ដេចព្រះមហាក្សត្រី ដែលជានិច្ចកាលព្រះអង្គតែងប្រោសព្រះរាជូបត្ថម្ភគាំទ្រ កាកបាទក្រហមកម្ពុជាគ្រប់កាលៈទេសៈ ដែលនេះជាកម្លាំងចិត្តដ៏ធំធេងដល់ កាកបាទក្រហមកម្ពុជា ក្នុងការដង្ហែតាមព្រះរាជសកម្មភាពមនុស្សធម៌ ដើម្បីឧត្តំប្រយោជន៍ប្រជារាស្ត្រ ជាតិ សាសនា និងព្រះមហាក្សត្រ៕ អត្ថបទ: សំ ងីម