សម្ដេចពិជ័យសេនា ទៀ បាញ់ ណែនាំដល់ស្ថាប័នពាក់ព័ន្ធឱ្យបន្ដរៀបចំអភិវឌ្ឍន៍តំបន់ប្រវត្តិសាស្ត្រយោធាកម្ពុជា X-16

ត្បូងឃ្មុំ៖ ដើម្បីធានានិរន្តរភាពដំណើរការកសាងតំបន់ប្រវត្តិសាស្ត្រយោធាកម្ពុជានេះ និងបន្តសម្រេចបានតាមចក្ខុវិស័យ ជាទិសដៅ ផែនការកម្មវិធីសកម្មភាពការងារ សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ បានដាក់ចេញនូវការណែនាំមួយចំនួន ដល់ស្ថាប័នពាក់ព័ន្ធសំដៅបន្ដអភិវឌ្ឍន៍តំបន់ប្រវត្តិសាស្ដ្រមួយនេះ ឲ្យសាកសមជាមួយការតស៊ូ លះបង់របស់សម្ដេចតេជោ ហ៊ុន សែន រួមជាមួយយុទ្ធមិត្តដើម្បីស្វែងរកការរំដោះជាតិ។

ការណែនាំរបស់សម្ដេចពិជ័យសេនា ទៀ បាញ់ បានធ្វើឡើងក្នុងឱកាសប្រារព្ធខួបអនុស្សាវរីយ៍លើកទី៤៩ នៃទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២៦) និងខួបលើកទី៤៨ នៃការបង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា (១២ ឧសភា ១៩៧៨-១២ ឧសភា ២០២៦) នាព្រឹកថ្ងៃទី២០ ខែមិថុនា ឆ្នាំ២០២៦នេះ នៅតំបន់ប្រវត្តិសាស្ដ្រយោធា កោះថ្ម X-16។

បើតាមសម្ដេចពិជ័យសេនា ទៀ បាញ់, នៅឆ្នាំ២០២៧ ដែលត្រូវនឹងខួបលើកទី៥០នោះ ក្រុមការងារនឹងគោរពអញ្ជើញសម្ដេចតេជោ ហ៊ុន សែន អញ្ជើញជាអធិបតី ដូចនេះក្រុមការងារត្រូវគិតគូររៀបចំកិច្ចការងារផ្សេងពាក់ព័ន្ធការរៀបចំពិធីនេះដូចតទៅ៖

* បន្ដសាងសងអគារទទួលភ្ញៀវ អគារស្នាក់នៅ បំពាក់គ្រឿងសង្ហារឹម សាងសង់ផ្លូវ ហេដ្ឋារចនាសម្ព័ន្ធនានាឲ្យរួចរាល់ក្នុងឆ្នាំ២០២៧ ដើម្បីសម្ពោធដាក់ឲ្យប្រើប្រាស់ជាផ្លូវការ ស្របជាមួយនឹងការរៀបចំពិធីប្រារព្ធខួបលើកទី៥០នេះ

* បន្ដយកចិត្តទុកដាក់គ្រប់គ្រងថែទាំ រក្សាសណ្ដាប់ធ្នាប់ អនាម័យ និងទទួលភ្ញៀវគណៈប្រតិភនានា ធ្វើមគ្គទេសក៏ អំពីសច្ចភាពប្រវត្តិសាស្ដ្រដំណើរឆ្ពោះទៅការផ្ដួលរំលំរបបប្រល័យពូជសាសន៍ និងបន្ដអប់រំផ្សព្វផ្សាយខ្លឹមសារអត្ថន័យ នៅតំបន់ប្រវត្តិសាស្ដ្រនេះឲ្យបានទូលំទូលាយ

* សិក្សារៀបចំបំផុសចលនាប្រឡងប្រណាំងបង្កើតស្នាដៃ ក្នុងចំណោមសិស្ស និស្សិត ដើម្បីឆ្ពោះទៅអបអរខួបលើកទី៥០ ឆ្នាំ២០២៧។

សម្ដេចពិជ័យសេនា ទៀ បាញ់ អំពាវនាវដល់ឯកឧត្តម លោកជំទាវ លោកឧកញ៉ា លោក លោកស្រី ភ្ញៀវកិត្តិយសទាំងអស់បន្ដចូលរួមគាំទ្រជាថវិកា ឧបករណ៍ មធ្យោបាយ សម្ភារ តាមលទ្ធភាពដើម្បីជួយគាំទ្រការសាងសង់ហេដ្ឋារចនាសម្ព័ន្ធ នៅតំបន់ប្រវត្តិសាស្ដ្រយោធាតេជោ កោះថ្ម X-16៕