គណបក្សសម្ព័ន្ធភាពនយោបាយបង្ហាញពីស្មារតីជាតិនិយម នាំយកអំណោយចែកជូនវីរកងទ័ព និងពលរដ្ឋភៀសសឹកនៅភូមិរង់ចាំ

គណបក្សសម្ព័ន្ធភាពនយោបាយបានបង្ហាញពីជំហររួមជាមួយរាជរដ្ឋាភិបាល និងបង្ហាញពីស្មារតីជាតិនិយម និងសាមគ្កីភាព ដោយបានយកអំណោយចែកជូនវីរកងទ័ពនៅជួរមុខដែលកំពុងតែឈរជើងការពារបូរណភាពទឹកដី និងចែកជូនគ្រួសារកងទ័ព និងជនភៀសសឹកនៅភូមិរង់ចាំ។

ឯកឧត្តម សែម សម្បត្តិ ប្រធានគណបក្សមហានគរបានថ្លែងថា គណបក្សសម្ព័ន្ធភាពនយោបាយទាំង២៩ បានរួមសា្មរតី និងឆន្ទៈ រួមទាំងប្រជាពលរដ្ឋ បានយកអំណោយជាអង្ករ និងគ្រឿងឧបភោគ បរិភោគ ទៅចែកជូនវីរកងទ័ពនៅជួរមុខនៅតំបន់បឹងត្រកួន និងចែកជូនប្រជាពលរដ្ឋនៅភូមិរង់ចាំចំនួន ២៦៥គ្រួសារ។ វីរកងទ័ព និងប្រជាពលរដ្ឋបានសម្តែងការរីករាយនិងថ្លែងអំណរគុណចំពោះការចុះសួរសុខទុក្ខដល់ពួកគាត់។ ទាំងអស់នេះបានបង្ហាញថា គណបក្សសម្ព័ន្ធភាពនយោបាយទាំង២៩ គឺមានស្មារតីសាមគ្គី ឯកភាព និងមានឆន្ទៈតែមួយ និងបានបង្ហាញពីជំហររួមជាមួយរដ្ឋាភិបាល និងបង្ហាញពីជំហររឹងមាំខាងស្ថេរភាពនយោបាយ និងជាគ្រឹះក្នុងការកសាងសន្តិភាពកម្ពុជឆ្ពោះទៅអនាគត។

ឯកឧត្តម គង្គ់ ប៊ុនធឿន ប្រធានគណបក្សចលនាប្រជាធិបតេយ្យបានថ្លែងថា ក្នុងស្មារតីជាតិនិយម គណបក្សសម្ព័ន្ធភាពនយោបាយទាំង២៩ នឹងខិតខំពង្រឹងសាមគ្គីភាពក្នុងការរិះរកវិធីដើម្បីជួយទៅដល់វីរកងទ័ពសមរភូមិមុខ និងជនភៀសសឹក និងចូលរួមជាមួយរាជរដ្ឋាភិបាលក្នុងការជួយដល់ជនភៀសសឹក ក៏ដូចជាការពង្រឹងស្មារតីដល់កងទ័ពដែលកំពុងតែឈរជើងការពារទឹកដីផងដែរ។

សូមជម្រាបថា ប្រតិភូគណបក្សសម្ព័ន្ធភាពនយោបាយទាំង២៩ បាននាំយកអំណោយចែកជូនវីរៈកងទ័ពនៅជួរមុខស្ថិតនៅឃុំបឹងត្រកួន ស្រុកថ្មពួក ខេត្តបន្ទាយមានជ័យ និងចែកជូនទៅដល់ជនភាសឹកនៅភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ កាលពីថ្ងៃទី២១ ខែមិថុនា ឆ្នាំ២០២៦។

អំណោយដែលចែកជូនទៅដល់វីរៈកងទ័ពជួរមុខមានអង្ករ ៤តោន ទឹកសុទ្ធ ២០០កេស និងថ្នាំពេទ្យ រួមទាំងគ្រឿងឧបភោគបរិភោគ មួយចំនួនទៀតផងដែរ។ បន្ទាប់ពីចែកអំណោយដល់វីរៈកងទ័ពជួរមុខរួច គណៈប្រតិភូគណបក្សសម្ព័ន្ធភាពនយោបាយចុះទៅសួរសុខទុក្ខប្រជាពលរដ្ឋនៅភូមិរង់ចាំ ចំនួន ២៦៥គ្រួសារ៕ អត្ថបទ៖ វង្ស សុភាព