អ.ន.ក ចាប់ឆ្នោតប្រគល់ផ្ទះជូនអតីតយុទ្ធជនចំនួន៥១គ្រួសារនៅភូមិប៊ុនរ៉ានីសែនជ័យដំណាក់ទ្រយឹង

ពោធិ៍សាត់៖ សមាគមអតីតយុទ្ធជន និងនិវត្តជនកម្ពុជា នៅថ្ងៃទី២៤ ខែមិថុនា នេះ បានរៀបចំពិធីចាប់ឆ្នោតប្រគល់ផ្ទះជូនអតីតយុទ្ធ និងនិវត្តជនចំនួន៥១គ្រួសារថ្មីបន្ថែមទៀត ដែលចូលមករស់នៅភូមិប៊ុនរ៉ានីសែនជ័យដំណាក់ទ្រយឹង ឃុំព្រងិល ស្រុកភ្នំក្រវាញ ខេត្តពោធិ៍សាត់។

​យោងតាមរបាយការណ៍ របស់សមាគមអតីតយុទ្ធជន និងនិវត្តជនកម្ពុជា ខេត្តពោធិ៍សាត់ គិតត្រឹមខែមិថុនា ឆ្នាំ២០២៦ សមាគមអតីតយុទ្ធជន និងនិវត្តជន ខេត្តពោធិ៍សាត់ មានសមាជិកសរុប៤,៦៩៤នាក់ និងអតីតមន្ត្រីរាជការស៊ីវិល ១,៦៤៩នាក់។ ក្នុងរយៈពេល៦ខែដើមឆ្នាំ២០២៦ សមាគមបានបើកប្រាក់ឧបត្ថម្ភដល់គ្រួសារសព ចំនួន៧៥ករណី និងសហការជាមួយ ម.ជ.ជ. បើកប្រាក់ធានារ៉ាប់រង និងប្រាក់ឧបត្ថម្ភដល់សព ចំនួន២០ករណី ក្នុងខែមិថុនា ដែលមានទឹកប្រាក់សរុប ២៩២,០៥២,៨៥៦រៀល។ ចំពោះវឌ្ឍនភាពនៅតំបន់អភិវឌ្ឍន៍ភូមិប៊ុនរ៉ានីសែនជ័យដំណាក់ទ្រយឹង បច្ចុប្បន្នមានហេដ្ឋារចនាសម្ព័ន្ធរួមមាន៖ អនុវិទ្យាល័យ១កន្លែង (សិស្ស៣១៧នាក់), មណ្ឌលសុខភាព១កន្លែង, វត្តអារាម១កន្លែង និងអណ្តូងទឹក ៥២៥អណ្តូង។ សព្វថ្ងៃមានគ្រួសារអតីតយុទ្ធជន ដែលទទួលបានផ្ទះ និងដីអាស្រ័យផល ទាំង៦២៨គ្រួសារ គឺបានរស់នៅអចិន្ត្រៃយ៍ ចំនួន៤៧៧គ្រួសារ ដែលទទួលបានបណ្ណសមធម៌/ងាយរងហានិភ័យចំនួន ៤៥៨គ្រួសារ ហើយកំពុងចូលរួមសកម្មភាពសេដ្ឋកិច្ចតាមរយៈសហគមន៍កសិកម្ម ការដាំដុះម្ទេស និងការចិញ្ចឹមសត្វ។ បន្ថែមពីនោះ បានជ្រើសរើស បងប្អូនអតីតយុទ្ធជន និងនិវត្តជនថ្មី ដែលមានជីវភាពខ្វះខាត ចំនួន៣០០គ្រួសារ (ដោយជំហាន១ ចាប់ឆ្នោតរួចរាល់ ចំនួន២៤៩គ្រួសារ និងជំហាន២ ចំនួន៥១ ចាប់ឆ្នោតនាថ្ងៃនេះ)។

ឯកឧត្តម អ៊ុំ សុខ និងឯកឧត្តម ខូយ រីដា បានជម្រាបជូនថា «ភូមិប៊ុនរ៉ានីសែនជ័យដំណាក់ទ្រយឹង» គឺជាភូមិគំរូដ៏ពិសិដ្ឋមួយ ដែលផ្តើមចេញពីគំនិតផ្តួចផ្តើមប្រកបដោយមេត្តាធម៌ដ៏ខ្ពង់ខ្ពស់បំផុតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជាស្ថាបនិកផ្ទាល់។ ហើយសមាគមអតីតយុទ្ធជន និងនិវត្តជនកម្ពុជា និងអាជ្ញាធរខេត្ត បានយកចិត្តទុកដាក់ខ្ពស់បំផុតជាប្រចាំលើសុខទុក្ខ និងការរស់នៅរបស់បងប្អូនអតីតយុទ្ធជនក្នុងភូមិគំរូមួយនេះ ដើម្បីតបស្នងនឹងសេចក្តីស្រឡាញ់ និងការគិតគូររបស់សម្តេច។ អាជ្ញាធរខេត្ត បានប្រកាសពីការចាត់ចែងកែសម្រួលក្រុមការងារសម្ព័ន្ធមេត្រីភាពថ្មី ដើម្បីចុះជាប់ជាមួយមូលដ្ឋាន និងដោះស្រាយបញ្ហាប្រឈមជូនបងប្អូនឱ្យបានទាន់ពេលវេលា ពិសេសបងប្អូនអតីតយុទ្ធជន និងនិវត្តជនដែលចូលមករស់នៅថ្មី៕ ដោយ ៖ ភារុន