ឯកឧត្តម ទេសរដ្ឋមន្រ្តី គន់ គីម ដឹកនាំ​កិច្ចប្រជុំ​ស្តីពី​សកម្មភាព​ការងារ​គ្រប់​គ្រង​គ្រោះ​មហន្ត​រាយ​ប្រចាំ​ឆមាស​ទី១ និងទិសដៅបន្តអនុវត្តឆមាសទី២ ឆ្នាំ២០២៦

នាព្រឹកថ្ងៃទី៧ ខែកក្កដា ឆ្នាំ២០២៦ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុ​ប្រធាន​ទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញជា​អធិបតី​ដឹកនាំ​កិច្ច​ប្រជុំ​ស្តីពី​សកម្ម​ភាព​ការងារគ្រប់គ្រងគ្រោះមហន្តរាយ ប្រចាំឆមាសទី១ និងទិសដៅបន្ត​អនុវត្ត​ឆមាស​ទី​២ ​ឆ្នាំ២០២៦ និងពិនិត្យ​វឌ្ឍនភាព​នៃ​ការ​អនុវត្ត​ផែនការ​សកម្មភាព​ជាតិ​សម្រាប់​ការ​កាត់​បន្ថយ​ហានិភ័យ​គ្រោះ​ម​ហន្តរាយ ២០២៤-២០២៨។

កិច្ចប្រជុំនេះមានការអញ្ជើញចូលរួមពីឯកឧត្តម អនុប្រធានទី២, ឯកឧត្តម អនុប្រធាន, ឯកឧត្តម ទីប្រឹក្សា និងអគ្គលេខាធិការ អគ្គលេខាធិការរង រួមទាំងប្រធាននាយកដ្ឋាន និងមន្រ្តី។ ឯកឧត្តម ទេស​រដ្ឋ​មន្រ្តីមានប្រសាសន៍ថា គណៈកម្មាធិការជាតិគ្រប់គ្រងគ្រោះមហន្តរាយ បានរៀប​ចំ​ធ្វើ​ការ​បូក​សរុប​របាយការណ៍ ស្តីពីសកម្មភាព​ការងារ​របស់​គណៈកម្មាធិការ​ជាតិ​គ្រប់​គ្រង​គ្រោះ​មហន្ត​រាយ​សំដៅ​ពង្រឹង​អភិបាល​កិច្ចហានិភ័យគ្រោះមហន្តរាយ, ការវិនិយោគទៅក្នុង ការកាត់​បន្ថយ​ហានិភ័យ​គ្រោះ​មហន្តរាយ សម្រាប់ភាពធន់ និងការបង្កើនការត្រៀមរៀបចំសម្រាប់ការឆ្លើយតប និង​ការស្តារឡើងវិញគ្រោះមហន្តរាយ ដែលដឹកនាំអនុវត្ត និងសម្របសម្រួលដោយតាមក្រសួង-ស្ថាប័ន លេខាធិការរដ្ឋានគ្រប់គ្រងគ្រោះមហន្តរាយថ្នាក់ក្រោមជាតិ ដៃគូអភិវឌ្ឍន៍ និង​វិស័យ​ឯកជន​។

ឯកឧត្តម ទេសរដ្ឋមន្រ្តី មានប្រសាសន៍ទៀតថា ក្នុងរយៈពេល៦ខែដំបូង ឆ្នាំ២០២៦ ព្រះ​រា​ជា​ណា​ចក្រ​កម្ពុជា បានជួបប្រទះការប្រែប្រួលអាកាសធាតុតាមលក្ខណៈរដូវកាលជាបន្តបន្ទាប់ ដោយ​ឆមាស​ទី​១នេះ គ្របដណ្តប់លើរដូវកាលចំនួនពីរ គឺ រដូវប្រាំង និង រដូវវស្សា។

ក្នុងអំឡុងរដូវប្រាំង ចាប់ពីខែមករាដល់ខែមេសា ប្រទេស​កម្ពុជា​ទទួល​រង​ឥទ្ធិពល​ពី​អាកាស​ធាតុ​ក្តៅ ​និងស្ងួត ដោយសីតុណ្ហភាពនៅតំបន់មួយចំនួនបានកើនឡើងខ្ពស់ជាងមធ្យមភាគប្រចាំឆ្នាំ។ ចាប់​ពីខែឧសភា និងខែមិថុនា កម្ពុជាបានចាប់ផ្តើម ទទួលឥទ្ធិពលពីខ្យល់មូសុងនិរតី និ​ង​ភ្លៀង​កក់​ខែ ​ដែលជាសញ្ញានៃការចូលមកដល់នៃរដូវវស្សា បង្កឱ្យមានភ្លៀងធ្លាក់រាយប៉ាយ និង​អាកាស​ធាតុ​មិន​ស្ថិត​ស្ថេរ​នៅតាមតំបន់ជាច្រើន។

ឯកឧត្តម ទេសរដ្ឋមន្រ្តី ថ្លែងថា ទាក់ទងនឹងស្ថានភាពគ្រោះមហន្តរាយ ក្នុងអំឡុងរដូវប្រាំង បាន​កើត​មាន​ករណី អគ្គីភ័យ ជាច្រើននៅទូទាំង ប្រទេស ដែលបណ្តាលឱ្យខូចខាតលំនៅឋាន ទ្រព្យ​សម្បត្តិ និងហេដ្ឋារចនាសម្ព័ន្ធមួយចំនួន។ កត្តាសំខាន់ៗដែល បង្កើនហានិភ័យអគ្គីភ័យរួមមាន សីតុណ្ហ​ភាព​ខ្ពស់ អាកាសធាតុស្ងួត ការប្រើប្រាស់ប្រភពភ្លើងដោយខ្វះការប្រុងប្រយ័ត្ន និង ការ​ឆាប​ឆេះ​នៅ​តំបន់ព្រៃ និងដីស្រែ។

ឯកឧត្តម ទេសរដ្ឋមន្រ្តី ថ្លែងទៀតថា ចំណែកនៅដំណាក់កាលផ្លាស់ប្តូរពីរដូវប្រាំងចូលរដូវវស្សា និង​ក្នុង​អំឡុងពេលមានភ្លៀងកក់ខែ បានកើតមានករណី ខ្យល់កន្ត្រាក់ និងរន្ទះបាញ់ ជា​បន្ត​បន្ទាប់​នៅ​​តាម​បណ្តារាជធានី-ខេត្ត មួយចំនួន ដែលបណ្តាលឱ្យមានការខូចខាតផ្ទះសម្បែង សាលារៀន និង​ទ្រព្យ​សម្បត្តិរបស់ប្រជាពលរដ្ឋ ព្រមទាំង បង្កឱ្យមានអ្នក រងរបួស និងបាត់​បង់​ជីវិត​ក្នុង​ករណី​មួយ​ចំនួន​ផង​ដែរ។

ដោយឡែក គោលបំណងពិនិត្យលើការអនុវត្តផែនការសកម្មភាពជាតិសម្រាប់ ការកាត់បន្ថយ​ហានិភ័យ​ គ្រោះមហន្តរាយ ២០២៤-២០២៨ ដោយផ្តោត​លើ​ការ​លើក​កម្ពស់​ចំណេះ​ដឹង​អំពី​ការ​កាត់​បន្ថយ និងការគ្រប់គ្រងហានិភ័យគ្រោះមហន្តរាយ និងការពង្រឹងអភិបាល​កិច្ច​ហានិភ័យ​គ្រោះ​ម​ហន្តរាយ។

គណៈកម្មាធិការជាតិគ្រប់គ្រងគ្រោះមហន្តរាយបានសម្របសម្រួល និងសហការ​យ៉ាង​ជិត​ស្និទ្ធ​ជា​មួយ​​ក្រសួង-ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ ក្នុងការជំរុញ និងពង្រឹង​ការ​អនុវត្ត​សកម្ម​ភាព​ ដើម្បីលសាងសមត្ថភាពសម្រាប់ការត្រៀមបង្ការ ការត្រៀមចំកា​រ​ឆ្លើយ​តប​សង្គ្រោះ​បន្ទាន់ ​និងការស្តារឡើងវិញក្រោយគ្រោះមហន្តរាយទាំងនៅថ្នាក់ជាតិ និងថ្នាក់ក្រោមជាតិ ខណៈ​ជា​លទ្ធផល សកម្មភាពសំខាន់ៗជាច្រើនត្រូវបានអនុវត្ត និងសម្រេចបាន ប្រកបដោយ​ប្រសិទ្ធ​ភាព​៕