កម្ពុជា-អូស្រ្តាលី បន្តពង្រឹងកិច្ចសហប្រតិបត្តិការ ធានាដល់ប្រសិទ្ធភាពគម្រោង និងកម្មវិធីជំនួយនៅកម្ពុជា​

កម្ពុជា-អូស្រ្តាលី ប្រកាស​បន្តពង្រឹងកិច្ចសហប្រតិបត្តិការ តាមរយៈគម្រោង និងកម្មវិធីជំនួយ ដែលធានាដល់ប្រសិទ្ធភាព និង និរន្តភាព ឆ្លើយតបនឹងអាទិភាព ក៏ដូចបន្ស៊ីគ្នារវាងផែនការយុទ្ធសាស្ត្រអភិវឌ្ឍជាតិ ដើម្បីកសាងមូលដ្ឋានគ្រឹះឆ្ពោះទៅសម្រេច​ចក្ខុ វិស័យកម្ពុជាឆ្នាំ​២០៥០។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅសប្តាហ៍កន្លង មកនេះ បានទទួលជួបសម្តែងការគួរសម និងពិភាក្សាការងារជាមួយលោកជំទាវបណ្ឌិត Anne Aly រដ្ឋមន្រ្តីក្រសួងអភិវឌ្ឍន៍អន្តរជាតិ ក្រសួងធុរកិច្ចធុនតូច និងជារដ្ឋមន្រ្តីក្រសួងកិច្ចការពហុវប្បធម៌ នៃប្រទេសអូស្រ្តាលី, ឯកឧត្តមឧបនាយករដ្ឋមន្ត្រី បានសម្តែងនូវការ ស្វាគមន៍យ៉ាងកក់ក្តៅ និងវាយតម្លៃខ្ពស់ចំពោះរដ្ឋាភិបាលអូស្ត្រាលីដែលបានគាំទ្រកម្ពុជា ចាប់តាំងពីដំណើរការកសាងសន្តិភាព ការបង្រួបបង្រួមជាតិ នាដើមទសវត្សរ៍ ឆ្នាំ១៩៩០ (សម័យកាលកិច្ចព្រមព្រៀងសន្តិភាពទីក្រុងប៉ារីស ​ឆ្នំា១៩៩១-១៩៩២) រហូត មក។ ក្រៅពីនេះ អូស្រ្តាលីបានរួមចំណែកក្នុងការកសាងសន្តិភាព, ចាប់ពីឆ្នាំ១៩៩២ មកដល់បច្ច្ចប្បន្ននេះ រដ្ឋាភិបាលអូស្រ្តាលីបាន ផ្តល់ហិរញ្ញប្បទានឥតសំណងដល់រាជរដ្ឋាភិបាលកម្ពុជា មានទំហំសរុបប្រមាណជិត ២ ប៊ីលាន​ដុល្លារអូស្រ្តាលី (ប្រមាណ ១ ៣០០ លានដុល្លារអាម៉េរិក) សម្រាប់អភិវឌ្ឍន៍រួមមាន៖ វិស័យអប់រំ, កសិកម្ម, កិច្ចគាំពារសង្គមហេដ្ឋារចនាសម្ព័ន្ធ, ការបោសសំអាតមីន និងវិស័យសុខាភិបាលជាដើម។

តាមរយ:កម្មវិធីភាពជាដៃគូកម្ពុជា-អូស្ត្រាលី, រដ្ឋាភិបាលអូស្រ្តាលី ក៏បានផ្តល់ជំនួយសម្រាប់ការអភិវឌ្ឍសេដ្ឋកិច្ចប្រកបដោយ ភាពធន់ (CAPRED) និងជំនួយទាន់ពេល ក្នុងការឆ្លើយតបនឹងវិបត្តិថាមពលសកល ដែលកម្ពុជាកំពុងជួបប្រទះ, ផ្តល់នូវកញ្ចប់ អន្តរាគមន៍​សង្គមសម្រាប់គម្រោងលើកកម្ពស់ កិច្ចគាំពារសង្គម និងសុខភាពដំណាក់​កាលទី២ ជំនួយបច្ចេកទេសលើការអនុវត្ត យន្តការអត្តសញ្ញាណកម្មគ្រួសារក្រីក្រ (IDPoor) និងការអនុវត្តមូលនិធិសមធម៌សុខាភិបាលជាដើម ដែលបានរួមចំណែកដល់ ការអភិវឌ្ឍសេដ្ឋកិច្ចនិងសង្គម ព្រមទាំងគាំទ្រដល់ជីវភាពប្រជាពលរដ្ឋកម្ពុជា ដែលជាអាទិភាពក្នុងយុទ្ធសាស្ត្របញ្ច–កោណដំណាក់ កាលទី​១របស់រាជរដ្ឋាភិបាលកម្ពុជា។

ក្នុងជំនួបនេះ, លោកជំទាវបណ្ឌិត Anne Aly ក៏បានលើកឡើងកិច្ចសហប្រតិបត្តិការទ្វេភាគី និងចំណងមិត្តភាពដ៏រឹងមាំ កម្ពុជា-អូស្រ្តាលី និងបានបញ្ជាកថា ឆ្នាំក្រោយនេះជាខួបលើកទី៧៥ នៃចំណងមិត្តភាពការទូតរវាងប្រទេសទាំងពីរកម្ពុជា-អូស្ត្រាលី, តាមរយៈចំណងមិត្តភាពនេះ ភាគីអូស្រ្តាលី នឹងបន្តពង្រឹង និងពង្រីកកិច្ចសហប្រតិបត្តិការជា​មួយ​រដ្ឋាភិបាលកម្ពុជា ដោយផ្អែកតាម ផែនការយុទ្ធសាស្ត្រសេដ្ឋកិច្ចអាស៊ីអាគ្នេយ៍របស់អូស្ត្រាលីដល់ឆ្នាំ២០៤០ ដែលកិច្ចសហប្រតិបត្តិការនេះនឹងផ្តោតលើតម្រូវការជាក់ ស្តែង និងបន្តពង្រឹងកិច្ចសហប្រតិបត្តិការដែលមានស្រាប់ឱ្យកាន់តែរឹងមាំ។ អូស្រ្តាលីបន្តគាំទ្រ ពង្រឹង និងពង្រីកកិច្ចសហប្រតិបត្តិការ លើគ្រប់វិស័យជាមួយរាជរដ្ឋាភិបាលកម្ពុជា រួមចំណែកដល់ការអភិវឌ្ឍន៍ធនធានមនុស្ស ការផ្សាភ្ជាប់ ទំនាក់ទំនងរវាងប្រជាជន និង ប្រជាជននៃប្រទេសទាំងពីរកម្ពុជា–អូស្រ្តាលី ។

ភាគីទាំងពីរ ក៏បានពិភាក្សាអំពីការបន្តពង្រឹងកិច្ចសហប្រតិបត្តិការ តាមរយៈគម្រោង និងកម្មវិធីជំនួយ ដែលធានាបាននូវប្រសិទ្ធភាព និងនិរន្តភាព ឆ្លើយតបនឹងអាទិភាព ដើម្បីកសាងមូលដ្ឋានគ្រឹះឆ្ពោះទៅសម្រេច​ចក្ខុវិស័យកម្ពុជាឆ្នាំ​២០៥០ របស់រាជរដ្ឋាភិបាល កម្ពុជា ជាមួយនឹងផែនការយុទ្ធសាស្រ្តសេដ្ឋកិច្ចអាស៊ីអាគ្នេយ៍របស់អូស្ត្រាលីឆ្នាំ២០៤0។ ក្នុងនោះ​វិស័យធំៗដូចជា៖ ពាណិជ្ជកម្ម, វិនិយោគ, ការកសាងសមត្ថភាពស្ថាប័ន និងការអភិវឌ្ឍន៍ធនធានមនុស្ស និងបានឯកភាពបន្តពង្រឹងការអនុវត្តគម្រោងសហប្រតិ- បត្តិការនានាឲ្យកាន់តែមានប្រសិទ្ធភាពខ្ពស់ និងផ្តល់ផលវិជ្ជមានពិតប្រាកដ​ជាក់ស្តែង៕អត្ថបទ៖ សុន រ៉ាឌី​