សម្តេចធិបតី ដឹកនាំកិច្ចប្រជុំឧត្តមក្រុមប្រឹក្សា ដើម្បីវាយតម្លៃចំពោះការផ្តល់ទស្សនទានស្ថាបនារបស់គណបក្សនយោបាយ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា អញ្ជើញដឹកនាំកិច្ចប្រជុំប្រចាំឆមាសលើកទី៥ នៃឧត្តមក្រុមប្រឹក្សាពិគ្រោះ និងផ្តល់យោបល់ នៅព្រឹកថ្ងៃទី១១ ខែសីហា នេះ ដែលកិច្ចប្រជុំនេះ ដើម្បីវាយតម្លៃចំពោះការរួមចំណែករបស់ប្រតិភូគណបក្សឧត្តមក្រុមប្រឹក្សាពិគ្រោះ និងផ្តល់យោបល់ ក្នុងការផ្តល់ទស្សនទានស្ថាបនារយៈពេល ៣៥ខែកន្លងមក។

ឯកឧត្តម សែម សម្បត្តិ ប្រធានគណបក្សមហានគរ បានថ្លែងថា ប្រជុំឧត្តមក្រុមប្រឹក្សាពិគ្រោះ និងផ្ដល់យោបល់ គឺមានរបៀបវារៈសំខាន់ចំនួន៣ មានដូចជា៖ ១. សុន្ទរកថាបើកកិច្ចប្រជុំរបបស់សម្តេចធិបតី និងការវាយតម្លៃខ្ពស់ចំពោះការរួមចំណែករបស់ប្រតិភូគណបក្សឧត្តមក្រុមប្រឹក្សាពិគ្រោះ និងផ្តល់យោបល់ ក្នុងការផ្តល់ទស្សនទានស្ថាបនារយៈពេល៣៥ខែកន្លងមក។ ២. មតិរបស់ប្រធានប្រតិភូគណបក្សនីមួយៗ អំពីចក្ខុវិស័យនៃការរំពឹងទុកក្នុងការអភិវឌ្ឍន៍អភិបាលកិច្ចល្អ និងទី៣. ការខិតខំប្រឹងប្រែងរបស់រាជរដ្ឋាភិបាលនីតិកាលទី៧នៃរដ្ឋសភា ដើម្បីលើកស្ទួយប្រសិទ្ធភាពនៃការអនុវត្តជាក់ស្តែងនូវគោលនយោបាយបញ្ចកោណដំណាក់កាលទី១ ជាមួយនឹងបច្ចុប្បន្នភាពសង្គមជាតិ។

ឯកឧត្តម គង់្គ ប៊ុនធឿនប្រធានគណបក្សចលនាប្រជាធិបតេយ្យបានថ្លែងថា កិច្ចប្រជុំឧត្ដមក្រុមប្រឹក្សាពិគ្រោះនិងផ្ដល់យោបល់ក្រោមអធិបតីភាពដ៏ខ្ពង់ខ្ពស់សម្ដេចធិបតី ហ៊ុន ម៉ាណែត គឺពិតជាមានសារៈសំខាន់ខ្លាំងណាស់។ ហើយក្រោយពីបង្កើតក្រុមឧត្តមក្រុមប្រឹក្សាពិគ្រោះនិងផ្ដល់យោបល់នេះមក បណ្ដាគណបក្សនយោបាយបានបញ្ចូលនូវធាតុចូលនៅចំណុចខ្វះខាតដាក់ជូនប្រមុខរាជរដ្ឋាភិបាល គឺប្រមុខរាជរដ្ឋាភិបាលបានចាត់ចែងភ្លាមៗនិងទាន់ពេលវេលា។

ឯកឧត្តម អ៊ុន ជឹម ប្រធានគណបក្សឯកភាពជាតិខ្មែរបានថ្លែងថា នៅក្នុងកិច្ចប្រជុំឧត្តមក្រុមប្រឹក្សាពីគ្រោះនិងផ្ដល់យោបល់ការអធិបតីភាពរបស់សម្ដេចធិបតី ហ៊ុន ម៉ាណែត ប្រតិភូគណបក្សនយោបាយនីមួយៗនិងមានឱកាសរាយការណ៍នៅចំណុចសំខាន់ៗដែលប្រតិភូឧត្តមក្រុមប្រឹក្សាពិគ្រោះនិងផ្ដល់យោបល់ បានចុះធ្វើការនៅតាមរាជធានីខេត្តទូទាំងប្រទេស បានផ្ដល់នូវទស្សនៈទាននិងធាតុចូលសំខាន់ៗ ជូនដល់សម្ដេចនាយករដ្ឋមន្ត្រីដើម្បីឲ្យក្រសួងស្ថាប័ននីមួយៗ ធ្វើការឲ្យកាន់តែមានប្រសិទ្ធភាព។

សូមជម្រាបថា ឧត្តមក្រុមប្រឹក្សាពិគ្រោះ និងផ្តល់យោបល់ ត្រូវបានបង្កើតឡើងកាលពីថ្ងៃទី៦ ខែកញ្ញា ឆ្នាំ២០១៨ ដែលរហូតមកដល់ពេលបច្ចុប្បន្ននេះមានគណបក្សនយោបាយចំនួន ៣៥ ជាសមាជិក៕អត្ថបទ៖ សុភាព