កងកម្លាំងយោធា និងសមត្ថកិច្ចការពារព្រំដែនភូមិសាស្ត្រស្រុកម៉ាឡៃ បង្ក្រាបទំនិញថៃឆ្លងដែនដោយខុសច្បាប់ ពីសំណាក់ក្រុមឈ្មួញលួចនាំចូលមកកម្ពុជា (សាច់បង្កក់នាំពីថៃចូលមក)

បន្ទាយមានជ័យ៖ កងកម្លាំងយោធា និងសមត្ថកិច្ចការពារព្រំដែនភូមិសាស្ត្រស្រុកម៉ាឡៃ ខេត្តបន្ទាយមានជ័យ នៅវេលាម៉ោង៥:៥០ថ្ងៃទី១១ ខែសីហា ឆ្នាំ២០២៦ បង្ក្រាបទំនិញថៃឆ្លងដែនដោយខុសច្បាប់ ពីសំណាក់ក្រុមឈ្មួញលួចនាំចូលមកកម្ពុជា (សាច់បង្កក់នាំពីថៃចូលមក) ។ នេះបើតាមលោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគ៥។

សូមបញ្ជាក់ថា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា បានប្រកាសបញ្ជាឱ្យមានការស៊ើបអង្កេតទ្រង់ទ្រាយធំ និងបង្ក្រាបរាល់ការនាំចូលទំនិញខុសច្បាប់ពីប្រទេសថៃ ជាពិសេសករណីសាច់បង្កក និងទំនិញរត់ពន្ធតាមច្រកព្រំដែនគោក។ វិធានការក្តៅនេះត្រូវបានធ្វើឡើងបន្ទាប់ពីកម្ពុជាបានរកឃើញឃ្លាំងស្តុកសាច់បង្កកខុសច្បាប់ជាច្រើនកន្លែងនៅក្នុងរាជធានីភ្នំពេញកាលពីពាក់កណ្ដាលឆ្នាំ២០២៦នេះ​។

កន្លងទៅនេះសម្ដេច​តេជោ បានណែនាំឱ្យវែកមុខមន្ត្រីគប់គិត និងឈ្មួញទុច្ចរិតដែលនាំទិនិញពីថៃនេះ ដោយសម្ដេច​ឱ្យសួរនាំឈ្មួញផ្ទាល់៖ «សម្តេចតេជោបញ្ជាក់ថានឹងហៅឈ្មួញធំៗដែលនាំចូលសាច់បង្កកខុសច្បាប់មកសួរចម្លើយដោយផ្ទាល់»។

សម្ដេច​ក៏បានឱ្យចាត់វិធានការលើមន្ត្រីពុករលួយ៖ មិនត្រឹមតែបង្ក្រាបក្រុមអាជីវករនោះទេ រាល់មន្ត្រីរូបណាដែលបានគប់គិត ទទួលសំណូក និងបើកដៃឱ្យនាំចូលទំនិញខុសច្បាប់ នឹងត្រូវរងទណ្ឌកម្មខាងវិន័យ និងច្បាប់យ៉ាងធ្ងន់ធ្ងរ។ ក្រៅពីនេះ សម្ដេច​ឱ្យការស៊ើបអង្កេតខ្សែសង្វាក់៖ អាជ្ញាធរត្រូវស្រាវជ្រាវរកអ្នកពាក់ព័ន្ធទាំងអស់ ចាប់តាំងពីតៃកុងឡានដឹកទំនិញ រហូតដល់មេខ្លោងនៅពីក្រោយខ្នង។

សម្តេចតេជោបានសង្កត់ធ្ងន់ថា ក្នុងស្ថានភាពដែលព្រំដែនគោកត្រូវបានបិទ គ្រប់មុខទំនិញទាំងអស់ដែលលួចនាំចូលឆ្លងកាត់ព្រំដែនគោកពីថៃ គឺចាត់ទុកជាទំនិញខុសច្បាប់ ទំនិញរត់ពន្ធ បំផ្លាញជាតិ និងប្រមាថជាតិ៕