ការចូលជាសមាជឹកសហគមន៍កសិកម្មទំនើប បានផ្ដល់ផលប្រយោជន៍ជាច្រើនដល់ប្រជាកសិករក្នុងសហគមន៍

កំពង់ឆ្នាំង ៖ នៅថ្ងៃទី១១ ខែសីហា ឆ្នាំ២០២៦នេះ លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំងបានបញ្ជាក់ថា «ការចូលជាសមាជឹកសហគមន៍កសិកម្មទំនើបក្នុងខេត្តកំពង់ឆ្នាំង បានរួមចំណែកយ៉ាងសំខាន់ក្នុងការផ្តល់ផលប្រយោជន៍ជាច្រើនដល់ប្រជាកសិករនៅក្នុងសហគមន៍ ទាំងបច្ចេកទេស ការដាំដុះ ការផលិត និងការលក់ចេញ។»

លោកបានបន្តថា៖ ការចូលក្នុងសហគមន៍កសិកម្មទំនើបនេះ គឺបានរួមចំណែក និងផ្ដល់ផលប្រយោជន៍ជាច្រើនដល់ប្រជាកសិករ ដោយក្នុងនោះកសិករទទួលបានដូចជា ការគាំទ្រផ្នែកបច្ចេកទេស ហេដ្ឋារចនាសម្ពន្ធ និងមធ្យោបាយផលិតកម្មទំនើប ការពិភាក្សាយោបល់ និងការគ្រប់គ្រងមុខជំនាញ ទទួលបានឥណទានការប្រាក់ទាប សំដៅធ្វើយ៉ាងណាជួយកាត់បន្ថយថ្លៃដើម ផលិតកម្មឲ្យមានប្រសិទ្ធភាពខ្ពស់អាចប្រកួត ប្រជែងនៅលើទីផ្សារនៃប្រទេសដទៃទៀតបាន ។ កត្តាទាំងនេះ បាននាំអោយប្រជាកសិករក្នុងសហគមន៍កសិកម្មទំនើបក្នុងខេត្តកំពង់ឆ្នាំង យល់ថាការចូលជាសមាជឹកសហគមន៍នេះ គឺមានផលប្រយោជន៍ច្រើនដល់ពួកគាត់។រាជរដ្ឋាភិបាលកម្ពុជា មានទស្សនៈទានជំរុញឲ្យបង្កើតសហគមន៍កសិកម្មទំនើប ដែលមានកម្រិតសមាហរណកម្មខ្ពស់ ប្រមូលផ្តុំប្រជាកសិករ ក្រោមយន្តការផលិតកម្មកសិកម្មតែមួយសំដៅធ្វើយ៉ាងណាឲ្យមានសេដ្ឋកិច្ចមាត្រដ្ឋាន។

ក្នុងខេត្តកំពង់ឆ្នាំង បានបង្កើតសហគមន៍កសិកម្មទំនើបជាច្រើន ដែលក្នុងនោះមានសហគមន៍ផលិតស្រូវ មាន់ ជ្រូក ត្រី បន្លែជាដើម ហើយមន្ទីរកសិកម្ម រុក្ខាប្រម៉ាញ់ និងនេសាទ កំពុងប្រមូលផ្តុំប្រជាកសិករ និងណែនាំពួកគាត់អោយយល់កាន់តែច្បាស់ពីការចូលជាសមាជឹកសហគមន៍ ជាពិសេសមន្ទីរកសិកម្ម ក៏មានផ្សារលក់ផលិតផលរបស់សហគមន៍កសិកម្មទំនើបផងដែរ ដើម្បីអោយប្រជាកសិករមានឱកាសយកផលិតផលដែលផលិតបានមកដាក់លក់នៅទីនោះ៕

ដោយ ៖ កាំង ហុងវាស្នា