អ្នកវិភាគ៖ ថៃកំពុងជួបបញ្ហាផ្ទៃក្នុង​ដោយព្យាយាមទាញ​ប្រទេសជិតខាងចូល​ដើម្បី​បង្វែរ​ស្ថានការណ៍

អ្នកវិភាគយល់ថា បច្ចុប្បន្នប្រទេសថៃកំពុងជួបបញ្ហាផ្ទៃក្នុង ដោយព្យាយាម​ទាញ​បញ្ហា​ជា​មួយ​ប្រទេស​ជិតខាង ជាពិសេសប្រទេសកម្ពុជាចូលដើម្បីបង្វែរស្ថានការណ៍បញ្ហាផ្ទៃក្នុង។

មាន​ប្រសាសន៍ក្នុងកិច្ចសម្ភាសជាមួយBTV នៅព្រឹកថ្ងៃទី១៣ ខែសីហា ឆ្នាំ២០២៦នេះ លោកបណ្ឌិត ស៊ឺន សំ អ្នកវិភាគគោលនយោបាយអន្តរជាតិនៅរាជបណ្ឌិត្យសភាកម្ពុជា បាន​លើក​ឡើង​ថា ថៃជាប្រទេសមួយមានបញ្ហាផ្ទៃក្នុងច្រើន ដូចដែរយើងបានដឹងហើយថា ប្រទេសថៃ​អនុញ្ញាត​ឱ្យ​ដាំ​ដុះកញ្ចា មានន័យថា ការផលិតគ្រឿងញៀន​នៅ​ប្រទេសថៃ​មាន​ភាព​ទូលំ​ទូលា​យ​ណាស់។​ រីឯការគ្រប់គ្រងអាវុធនៅថៃ គ្មានសណ្តាប់ធ្នាប់នោះទេ ដោយសារពលរដ្ឋមា​ន​សិ​ទ្ធិ​កាន់​កាំ​ភ្លើង​ច្រើន ហើយអ្វីដែរល្បីនៅប្រទេសថៃមួយទៀត គឺសំបូរកន្លែងសប្បាយ អញ្ជឹងពេល​មាន​កន្លែង​សប្បាយ​បែបនេះ បញ្ហាអសន្តិសុខនៅក្នុងប្រទេសក៏មានច្រើនដែរ ដូច្នេះហើយបើប្រទេសថៃអត់មានបញ្ហាជាមួយប្រទេសជិតខាងនោះទេ ជាពិសេសជាមួយប្រទេសកម្ពុជា បញ្ហាទាំងអស់របស់ប្រទេសថៃនឹងបុកទៅផ្ទៃក្នុងប្រទេស ដែលអាចធ្វើឱ្យរង្គោះរង្គើទៅដល់រដ្ឋាភិបាល ឬព្រះបរមរាជវាំងប្រទេសថៃ ពីព្រោះក្នុងចំណោមសារណៈជនរបស់ថៃ ជាពិសេសយុវជនមានគំនិតចង់មានការផ្លាស់ប្តូរ ដូចជាកាលមុនការបោះឆ្នោតឆ្នាំ២០២៣ ក៍មានគណបក្សនយោបាយមួយដែលចង់ឱ្យមានការធ្វើកំណែទម្រង់ស៊ីជម្រៅ នៅក្នុងរាជវាំង និងរាជរដ្ឋាភិបាលថៃ។

លោកបណ្ឌិត ស៊ឺន សំ អ្នកវិភាគគោលនយោបាយអន្តរជាតិនៅរាជបណ្ឌិត្យសភាកម្ពុជា បានបន្តទៀតថា ប្រសិនបើប្រទេសកម្ពុជាមិនខ្លាំងទេ មិនច្បាស់លាស់ ក្នុងការជែកវែកញែក ពន្យល់ ហើយជាពិសេសទឹកចិត្តកងទ័ព សមត្ថភាពកងទ័ព ក្រៅពីនោះ ការកសាងសេដ្ឋកិច្ច និងការកសាងធនធានមនុស្សដែលពូកែ និងមានសមត្ថភាពនៅគ្រប់ផ្នែករបស់រាជរដ្ឋាភិបាល ជារឿងដែលកម្ពុជាត្រូវតែធ្វើ ពីព្រោះថាប្រទេសថៃគ្មានចេតនាណាមួយគោរពដែនអធិបតេយ្យភាពរបស់កម្ពុជានោះទេ គេឈ្លានពានកម្ពុជាហើយ បែរជាចោទកម្ពុជាទៀត ដែលនេះជាយុទ្ធសាស្រ្តដែលគេធ្លាប់បានធ្វើមកលើកម្ពុជា។

តាមរយៈសារព័ត៌មាននៅក្នុងប្រទេសថៃ និងអន្តរជាតិនានា បានចុះផ្សាយពីបញ្ហាផ្ទៃក្នុងប្រទេសថៃនៅអំឡុងឆ្នាំ២០២៦ ជាបន្តបន្ទាប់ ដែលក្នុងនោះរួមមាន៖ ជម្លោះព្រំដែនជាមួយប្រទេសជាតិខាង រាប់បញ្ចូលទាំងប្រទេសកម្ពុជាមួយដែរ, ក្មេងជំទង់បាញ់សម្លាប់មិត្តរួមថ្នាក់ គ្រូបង្រៀន និងអាព្យាបាលនៅក្នុងសាលារៀន, អំពើឃាតកម្មលើជនជាតិរុស្ស៊ីពីរនាក់បងប្អូន, ការក្ស័យធន ឬអាជីវកម្មមួយចំនួនត្រូវបានបិទ,មន្រ្តីអាកាសចរវាយតប់ទេសចរបរទេស និងបញ្ហាគ្រឿងញៀនជាដើម៕ អត្ថបទ៖ទូច សោភ័ណ