ឆមាសទី១ឆ្នាំនេះ មន្ទីរពេទ្យគន្ធបុប្ផាបានពិនិត្យ-ព្យាបាល និង​ផ្ដល់សេវាសម្ភព ទារក កុមារ និងស្ត្រីមានផ្ទៃពោះជិត ៧០ម៉ឺនករណី ក្នុងនោះព្យាបាលកុមារឆ្លងជំងឺគ្រុនឈាមចំនួន ៥ ៨៦៣ នាក់

ភ្នំពេញ៖ ក្នុងឆមាសទី១ ឆ្នាំ២០២៦នេះ មន្ទីរពេទ្យគន្ធបុប្ផា បាន​ទទួលបានសេវាពិនិត្យ-ព្យាបាល និង​ផ្តល់សេវាសម្ភព ទារក កុមារ និងស្ត្រី មានផ្ទៃពោះ ចំនួនជាង ៦៩៤ ៧៥៣ ករណី ក្នុងនោះ ការពិនិត្យ និងព្យាបាលនៅផ្នែកពិគ្រោះជំងឺក្រៅចំនួន ៥១២ ៤៦៧ ករណី ព្រមទាំង បានដាក់ឱ្យសម្រាកព្យាបាលនៅក្នុងមន្ទីរពេទ្យសម្រាប់ជំងឺធ្ងន់ធ្ងរចំនួន ១១៣ ៥៣៨ នាក់, ព្យាបាលកុមារឆ្លងជំងឺគ្រុនឈាម ចំនួន ៥ ៨៦៣ នាក់, កុមារមានជំងឺបេះដូងពីកំណើតដែលត្រូវវះកាត់ ចំនួន ៦២៦ នាក់, ផ្តល់សេវាពិនិត្យ និងតាមដានផ្ទៃពោះ ចំនួន ៥២ ៥១៣ ករណី, និងផ្តល់សេវាសម្រាលកូនចំនួន ៩ ៧៤៦ នាក់។ នេះបើតាម សេចក្តីប្រកាសព័ត៌មាន​ស្តីពីលទ្ធផលកិច្ចប្រជុំ​ក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា អាណត្តិទី៣ លើកទី៦ នៅថ្ងៃទី១២ សីហា​នេះ។

បើតាមសេចក្ដីប្រកាសព័ត៌មានបាឱ្យដឹងថា ក្នុងឆមាសទី១ឆ្នាំនេះ មន្ទីរពេទ្យគន្ធបុប្ផា បានចំណាយថវិកាសរុបចំនួនជាង ២១,៧៩ លាន ដុល្លារអាម៉េរិក ក្នុងផ្តល់សេវាពិនិត្យ និងព្យាលជំងឺទារក និងកុមារ ព្រមទាំងសេវាសម្ភពជូនស្ត្រីមានផ្ទៃពោះ ដោយឥតគិតថ្លៃ និងប្រកបដោយគុណភាព។ ប៉ុន្ដែ​ក្នុងឆមាសទី១ ឆ្នាំ២០២៦នេះ មូលនិធិគន្ធបុប្ផាកម្ពុជា ទទួលបានថវិកាពីសប្បរសជន​សរុបចំនួន ១៩,៨៧ លានដុល្លារអាម៉េរិក ថយចុះប្រមាណ ៧% បើធៀបនឹងរយៈពេលដូចគ្នាកាលពីឆ្នាំ២០២៥។

លោកជំទាវ ប៉ែន សុបភា អនុប្រធានប្រតិបត្តិនៃក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា បានបញ្ជាក់ក្នុងសេចក្តីប្រកាសព័ត៌មាន​ស្តីពីលទ្ធផលកិច្ចប្រជុំ​ក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា អាណត្តិទី៣ លើកទី ៦ នៅថ្ងៃទី១២ សីហា​ ថា ការថយចុះនេះ បណ្តាលមកពីកត្តាចម្បងៗមួយចំនួន រួមមាន ការធ្លាក់ចុះនៃទេសចរបរទេស និងការធ្លាក់ចុះនៃការបរិច្ចាគពីសប្បុរសជន ដែលអាចបណ្តាលមកពីកម្មវិបាកនៃ ជម្លោះព្រំដែនកម្ពុជា-ថៃ កាលពីចុងឆ្នាំ២០២៥ និង​ពីវិបត្តិសកល។

ចំណែក ឯកឧត្តមបណ្ឌិត ចន ណារិទ្ធ នាយកប្រតិបត្តិនៃមូលនិធិគន្ធបុប្ផាកម្ពុជា បានបញ្ជាក់ជូនអង្គប្រជុំថា ទោះបីជា ចំណូលសរុបប្រចាំឆមាសទី១ ឆ្នាំ២០២៦ មានការធ្លាក់ចុះបន្តិចក៏ដោយ, ក៏ថវិកា​ដែលទទួលបានពីការបរិច្ចាគក្នុងយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៦ របស់មូលនិធិគន្ធបុប្ផាកម្ពុជា ដែលដឹកនាំដោយ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា កាលពីអំឡុង ខែមិថុនា ឆ្នាំ២០២៦ មានការកើនឡើងគួរឱ្យកត់សម្គាល់ជាងការរំពឹងទុក បើធៀបនឹងយុទ្ធនាការឆ្នាំ២០២៥។

ឯកឧត្តមបណ្ឌិត ចន ណារិទ្ធ បន្ថែមថា ពោលគឺបានកើនឡើងពី ៦ លានដុល្លារអាម៉េរិកក្នុងយុទ្ធនាការឆ្នាំ២០២៥ ដល់ ៦,៣៨ លានដុល្លារអាម៉េរិក ក្នុងយុទ្ធនាការឆ្នាំ២០២៦។ ក្នុងនោះសប្បុរសជនចូលរួមបរិច្ចាគក្នុងយុទ្ធនាការដ៏ធំ និងសំខាន់នេះ ក៏មានការកើនឡើងផងដែរ កើនឡើងពីចំនួនប្រមាណ ៣០ម៉ឺននាក់ ក្នុងឆ្នាំ២០២៥ ដល់ប្រមាណ ៣៥ ម៉ឺននាក់ ក្នុងឆ្នាំ២០២៦។

សេចក្ដីប្រកាសព័ត៌មានបញ្ជាក់ថា​៖«ក្នុងឆមាសទី១ ឆ្នាំ២០២៦នេះ មន្ទីរពេទ្យគន្ធបុប្ផា បាន​ទទួលបានសេវាពិនិត្យ-ព្យាបាល និង​ផ្តល់សេវាសម្ភព ទារក កុមារ និងស្ត្រី មានផ្ទៃពោះ ចំនួនជាង ៦៩៤ ៧៥៣ ករណី ក្នុងនោះ ការពិនិត្យ និងព្យាបាលនៅផ្នែកពិគ្រោះជំងឺក្រៅចំនួន ៥១២ ៤៦៧ ករណី ព្រមទាំង បានដាក់ឱ្យសម្រាកព្យាបាលនៅក្នុងមន្ទីរពេទ្យសម្រាប់ជំងឺធ្ងន់ធ្ងរចំនួន ១១៣ ៥៣៨ នាក់, ព្យាបាលកុមារឆ្លងជំងឺគ្រុនឈាម ចំនួន ៥ ៨៦៣ នាក់, កុមារមានជំងឺបេះដូងពីកំណើតដែលត្រូវវះកាត់ ចំនួន ៦២៦ នាក់, ផ្តល់សេវាពិនិត្យ និងតាមដានផ្ទៃពោះ ចំនួន ៥២ ៥១៣ ករណី, និងផ្តល់សេវាសម្រាលកូនចំនួន ៩ ៧៤៦ នាក់។ ជាមួយគ្នានេះ មន្ទីរពេទ្យគន្ធបុប្ផាបានចំណាយថវិកាសរុបចំនួនជាង ២១,៧៩ លាន ដុល្លារអាម៉េរិក ក្នុងផ្តល់សេវាពិនិត្យ និងព្យាលជំងឺទារក និងកុមារ ព្រមទាំងសេវាសម្ភពជូនស្ត្រីមានផ្ទៃពោះ ដោយឥតគិតថ្លៃ និងប្រកបដោយគុណភាព»។

ក្នុងកិច្ចប្រជុំនេះ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងជាអនុប្រធានក្រុមប្រឹក្សាបរធនបាល នៃមូលនិធិគន្ធបុប្ផាកម្ពុជា បានវាយតម្លៃខ្ពស់លើវឌ្ឍនភាពការងាររបស់អង្គភាពប្រតិបត្តិនៃមូលនិធិគន្ធបុប្ផាកម្ពុជា និងលទ្ធផលការងាររបស់មន្ទីរពេទ្យគន្ធបុប្ផា។ ឯកឧត្តមសាស្ត្រាចារ្យ ក៏បានណែនាំគណៈគ្រប់គ្រងមន្ទីរពេទ្យ គន្ធបុប្ផា ឱ្យបន្តរក្សាកម្រិតគុណភាពសេវាពិនិត្យ និងព្យាបាល ព្រមទាំងបាលផ្តល់ការគាំទ្រផងដែរ លើការគិតគូរ ទាំងអំពីយន្តការអភិបាលកិច្ចរបស់មន្ទីរពេទ្យគន្ធបុប្ផា និងយន្តការគាំទ្រហិរញ្ញវត្ថុ រវាងមូលនិធិគន្ធបុប្ផាកម្ពុជា និងមូលនិធិគន្ធបុប្ផាស្វីស ក្នុងរយៈពេលមធ្យម និងវែងខាងមុខ៕

អត្ថបទ៖ ធូ វិរៈ