គណៈទន្តពេទ្យកម្ពុជា រម្លឹកគ្រូពេទ្យត្រូវប្រកាន់ខ្ជាប់ក្រមសីលធម៌ដល់អតិថិជន ដើម្បីចៀសវាងការកើតមានបណ្តឹង

អគ្គលេខាធិកាគណៈទន្តពេទ្យកម្ពុជា បានដាក់ចេញនូវការណែនាំជាថ្មីដោយជំរុញឱ្យក្រុមគ្រូពេទ្យទាំងអស់បង្កើនការយកចិត្តទុកដាក់ និងប្រកាន់ខ្ជាប់នូវក្រមសីលធម៌វិជ្ជាជីវៈ ព្រមទាំងការគោរពដល់អ្នកមកទទួលសេវា ឬអតិថិជន ដោយបញ្ជាក់ថា «ចំណេះដឹង និងជំនាញ ត្រូវតែដើរទន្ទឹមនឹងសីលធម៌»។

ទន្តបណ្ឌិត ប្រាក់ វណ្ណី អគ្គលេខាធិកាគណៈទន្តពេទ្យកម្ពុជា ក្នុងឱកាសអញ្ជើញជាអធិបតីភាពក្នុងពិធីបើកសន្និសីទសមាគមទន្តពេទ្យសម្រាប់កុមារកម្ពុជា លើកទី១ កាលពីព្រឹកថ្ងៃទី១៣ សីហា ឆ្នាំ២០២៦នេះ បានមានប្រសាសន៍ថា កន្លងមកសង្កេតឃើញថា ការអនុវត្តក្រមសីលធម៌របស់ក្រុមគ្រូពេទ្យមិនបានគ្រប់ជ្រុងជ្រោយនៅឡើយទេ អញ្ចឹងក្នុងពេលនេះ មិនថាការព្យាបាលធ្មេញកុមារ មិនថាការព្យាបាលដោយ Implant ឬក៏មុខវិជ្ជាផ្សេងៗទៀតត្រូវតែគោរពក្រមសីលធម៌ ពីព្រោះសេចក្តីសុខរបស់មនុស្ស ត្រូវតែគោរពក្រមសីលធម៌។

ទន្តបណ្ឌិត ប្រាក់ វណ្ណី បានសង្កត់ធ្ងន់ទៀតថា ដោយសារកាន់ការងារខាងទទួលបណ្តឹង លោកយល់ឃើញថា ប្រសិនបើពេទ្យមិនគោរពសីលធម៌ទេ អតិថិជននឹងប្តឹង ហើយបើកាលណាមានបណ្តឹង បើសិនគណៈវិជ្ជាជីវៈសង្កេតឃើញថា ការងារខុសនឹងក្រមសីលធម៌ នោះនឹងជួបពិន័យ និងឈានទៅដល់ការបាត់បង់វិជ្ជាជីវៈតទៅទៀត។ លោកបានរម្លឹកបន្ថែមថា ទាំងគ្រូពេទ្យ និងទន្តពេទ្យទាំងអស់​ នៅពេលដែលចេញប្រកបវិជ្ជាជីវៈត្រូវតែគោរពក្រមសីលធម៌ជាចម្បង ពីព្រោះនេះជាកត្តាមួយដែលរួចផុតពីពាក្យបណ្តឹង។

ទាក់ទិនកម្មវិធីសន្និសីទសមាគមទន្តពេទ្យសម្រាប់កុមារកម្ពុជា លើកទី១នេះ ទន្តបណ្ឌិតឯកទេស យស់ ចាន់ថូ ប្រធានសមាគមទន្តពេទ្យសម្រាប់កុមារកម្ពុជា បានបញ្ជាក់ឱ្យដឹងថា ធ្វើឡើងក្រោមប្រធានប្រធានបទ៖ “ដំណោះស្រាយបញ្ហាផ្សេងៗក្នុងវិស័យទន្តសាស្រ្តកុមារ” ក្នុងគោលបំណងផ្សព្វផ្សាយពីសារៈសំខាន់អត្ថប្រយោជន៍ក្នុងព្យាបាលធ្មេញកុមារ វិធីសាស្ត្រក្នុងការរៀបចំករណីពិបាកដោះស្រាយវិធីវិភាគ និងវាយតម្លៃធ្មេញព្រៃ ឬធ្មេញទឹកដោះ ជូនដល់សមាជិក សមាជិការ និងអ្នកចូលរួមទាំងអស់ក្នុងកម្មវិធីនេះ។ លោកសង្ឃឹមយ៉ាងមុតមាំថា សិក្ខាកាម នឹងទទួលបានចំណេះដឹង ចំណេះធ្វើ ព្រមទាំងបទពីសោធន៏ល្អៗពីវារគ្មិន ដើម្បីបន្តការងារវិស័យទន្តពេទ្យនេះ ប្រកបដោយវិជ្ជាជីវៈ និងមានប្រសិទ្ធិភាពខ្ពស់៕

អត្ថបទ៖ ឈិត បូរ៉ាវី