កម្ពុជាទទួលបានគម្រោងវិនិយោគ ៣៣ ទុនវិនិយោគ ៥២៥លានដុល្លារអាមេរិកក្នុងខែកក្កដា

ក្រុមប្រឹក្សាអភិវឌ្ឍន៍កម្ពុជា (ក.អ.ក.) និង អនុគណៈកម្មាធិការ វិនិយោគរាជធានី-ខេត្ត (អ.គ.វ.រ.ខ.) បានចុះបញ្ជីគម្រោងវិនិយោគសរុបចំនួន ៣៣គម្រោង ដែលមានទុនវិនិយោគសរុបប្រមាណ ៥២៥លានដុល្លារអាម៉េរិក និងអាចបង្កើតឱកាសការងារជូនប្រជាពលរដ្ឋ បានប្រមាណ១៧ពាន់កន្លែង។

សេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា ក្នុងចំណោម ៣៣ គម្រោង គឺ ២៣ គម្រោង ត្រូវបានចុះបញ្ជី ដោយក្រុមប្រឹក្សាអភិវឌ្ឍន៍កម្ពុជា ក្នុងទំហំទុនវិនិយោគប្រមាណ៤៩៤លានដុល្លារអាមេរិក និងអាចបង្កើត ការងារបានប្រមាណ៩ពាន់កន្លែង។

ដោយឡែក គម្រោងវិនិយោគដែលត្រូវបានចុះបញ្ជីដោយ អនុគណៈកម្មាធិការ វិនិយោគរាជធានី-ខេត្ត មានចំនួន១០គម្រោង ក្នុងទំហំទុនវិនិយោគប្រមាណ ៣១លានដុល្លារអាមេរិក និងអាចបង្កើត ការងារបានប្រមាណ៨ពាន់កន្លែង។

គម្រោងវិនិយោគដែលមានភាពលេចធ្លោសម្រាប់ខែកក្កដា រួមមាន ៖ ទី១-គម្រោងបង្កើតកសិដ្ឋានចិញ្ចឹមត្រី គ្រំ និងរោងចក្រកែច្នៃគុជខ្យង់-ត្រី មានទុនវិនិយោគ ៤១ លានដុល្លារអាមេរិក និងបង្កើតការងារចំនួន ២ ៩៣៩ ដែលមានទីតាំងនៅស្រុកស្ទោង ខេត្តកំពង់ធំ។

ទី២-គម្រោងអាជីវកម្មរ៉ែមាស និងរោងចក្រកែច្នៃ ដែលមានទុនវិនិយោគ ៣១លានដុល្លារអាមេរិក និងបង្កើតការងារចំនួន ៤០០កន្លែង ។គម្រោងនេះ ស្ថិតនៅស្រុកសំបូរ ខេត្តក្រចេះ និងស្រុកសណ្តាន់ ខេត្តកំពង់ធំ។

ទី៣-គម្រោងអភិវឌ្ឍន៍ស្ថានីយប្រព័ន្ធអាគុយស្តុកទុកថាមពលអានុភាព ៥០០ មេហ្គាវ៉ាត់ មានទុនវិនិយោគ ២៤៤លានដុល្លារអាមេរិក និងបង្កើតការងារបានចំនួន ៩កន្លែង ដែលមានទីតាំងនៅស្រុកក្រគរ ខេត្តពោធិ៍សាត់ ព្រមទាំងគម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យអនុភាព ១០០មេហ្គាវ៉ាត់ មានទុនវិនិយោគ ៦២លានដុល្លារអាមេរិក និងបង្កើតការងារចំនួន ១៦កន្លែង។

ទី៤- គម្រោងបង្កើតរោងចក្រកែច្នៃរ៉ែលោហៈមិនមែនដែក មានទុនវិនិយោគ ១៥លានដុល្លារអាមេរិក និងបង្កើតការងារចំនួន ២០០កន្លែង ដែលមានទីតាំងនៅតំបន់សេដ្ឋកិច្ចពិសេស កោះកុង ចេជាង។

ជាការកត់សម្គាល់ ការវិនិយោគក្នុងរយៈពេល៧ខែដំបូងនៃឆ្នាំ២០២៦ នេះ កម្ពុជានៅតែបន្តទាក់ទាញគម្រោងវិនិយោគដែលមានគុណភាព ជាពិសេសក្នុងវិស័យហេដ្ឋារចនាសម្ព័ន្ធ និងទេសចរណ៍ ខណៈវិស័យឧស្សាហកម្មនៅតែជាវិស័យនាំមុខក្នុងការ ទាក់ទាញវិនិយោគ៕អត្ថបទ៖ ធូ វិរៈ