ការបណ្ដុះបណ្ដាលដែលផ្ដល់ដោយរដ្ឋាភិបាល ធ្វើឱ្យយុវជនមានជំនាញពិតប្រាកដ មាន ការងារធ្វើ និងប្រកបរបរបាន

គិតមកដល់ពេលនេះ កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១,៥លាននាក់ របស់រាជរដ្ឋាភិបាល បានដំណើរការរយៈពេលជិត៣ឆ្នាំមកហើយ ដោយទទួលសិស្សានុសិស្ស និងយុវជនមកពីគ្រួសារក្រីក្រ និងងាយរងហានិភ័យរាប់ម៉ឺននាក់ឱ្យចូលរៀនដោយឥតគិតថ្លៃ ថែមទាំងទទួលបានប្រាក់ឧបត្ថម្ភប្រចាំខែទៀតផង។

ជួបសម្ភាសន៍ជាមួយអតីតសិស្សដែលបញ្ចប់ការសិក្សាជំនាញផ្នែកធុរៈកិច្ចភេសជ្ជៈ នៃវិទ្យាស្ថានជាតិសហគ្រិនភាព និងនវានុវត្តន៍ (NIEI) កញ្ញា ខន ស្រីលីន ដែលបច្ចុប្បន្នកំពុងប្រកបមុខរបរលក់ភេសជ្ជៈនៅផ្ទះ ស្ថិតនៅក្បែរវត្តសំរោងអណ្តែត ខណ្ឌសែនសុខ រាជធានីភ្នំពេញ បានឱ្យព័ត៍មាន ប៊ីធីវី ដឹងនៅព្រឹកថ្ងៃទី១៥ ខែសីហានេះថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស របស់រាជរដ្ឋាភិបាល មិនត្រឹមតែផ្តល់ការសិក្សាដោយមិនគិតថ្លៃនោះទេ ប៉ុន្តែថែមទាំងបានផ្តល់ប្រាក់ឧបត្ថម្ភប្រចាំខែថែមទៀត សម្រាប់សិស្សមកពីគ្រួសារមានបណ្ណសមធម៌ ឬបណ្ណងាយរងហានិភ័យ ដែលនេះជាការជួយជ្រោមជ្រែងយ៉ាងធំធេងដល់ការសិក្សារបស់ពួកគេ។

កញ្ញាបន្តថា គាត់ពិតជាសប្បាយចិត្តណាស់ដែលមានឱកាសទទួលបានការបណ្តុះបណ្តាលនេះ ទោះបីជាមិនបានទទួលប្រាក់ឧបត្ថម្ភដូចសិស្សដែលមានបណ្ណសមធម៌ប៉ុន្តែអាចរៀនបានដោយឥតគិតថ្លៃ ថែមទាំងទទួលការយកចិត្តទុកដាក់ពីគ្រូ បង្ហាត់បង្រៀនដែលមានចំណេះជំនាញច្បាស់លាស់ ហើយសាលាមានសម្ភារៈទំនើបៗឱ្យអនុវត្តផ្ទាល់ដោយមិនចំណាយសូម្បីប្រាក់មួយរៀល។ កញ្ញាបន្ថែមថា កម្មវិធី«រៀនឱ្យចេះ ឱ្យមានការងារធ្វើ»នេះ មិនមែនគ្រាន់តែជាពាក្យស្លោកនោះទេ ប៉ុន្តែជាការពិតជាក់ស្តែងដែលកំពុងកើតឡើងជាក់ស្តែង។

កញ្ញាក៏បានអំពាវនាវ និងលើកទឹកចិត្តដល់ប្រជាពលរដ្ឋដែលចង់មានជំនាញមួយពិតប្រាកដ ជាពិសេសប្រជាពលរដ្ឋដែលចំណាកស្រុក ជនភៀសសឹក ក៏ដូចជាយុវជនបោះបង់ការសិក្សា អាចងាកមករៀនជំនាញបច្ចេកទេស និងវិជ្ជាជីវៈ ទៅតាមចំណង់ចំណូលចិត្តរៀងខ្លួន ព្រោះមានជំនាញច្រើនវិស័យដែលកំពុងរង់ចាំសិស្សចុះឈ្មោះចូលរៀន។

គិតចាប់ពីប្រកាសដាក់ឱ្យដំណើរការជាផ្លូវការកម្មវិធីបណ្តុះបណ្តាលជំនាញវិជ្ជាជីវៈដល់យុវជនមកពីគ្រួសារក្រីក្រនិងគ្រួសា រងាយរងហានិកភ័យ នៅថ្ងៃទី១៤ ខែវិច្ឆិកា ឆ្នាំ២០២៣ រហូតត្រឹមឆមាសទី១ ឆ្នាំ២០២៦ មានយុវជនបានចុះឈ្មោះរៀនជំនាញផ្សេងៗគ្នាមានចំនួនប្រមាណជាង២៧ម៉ឺននាក់។ ដើម្បីគាំទ្រដល់ការបណ្តុះបណ្តាលជំនាញវិជ្ជាជីវៈ និងបច្ចេកទេស ឱ្យកាន់តែមានប្រសិទ្ធិភាពបន្ថែមទៀត ក្រសួងការងារ និងបណ្តុះបណ្តាលវិជ្ជាជីវៈ បានចុះហត្ថលេខាលើអនុស្សរណៈនៃកា រយោគយល់គ្នាជាមួយវិស័យឯកជនជាច្រើន ដើម្បីបង្កើនកិច្ចសហប្រតិបត្តិការរវាងរដ្ឋ និងឯកជនក្នុងការផ្តល់ជំនាញ បង្កើ នជំនាញ ផ្លាស់ប្តូរជំនាញ និងបង្កើនផលិតភាពការងារ ដើម្បីធានាថា ពលរដ្ឋកម្ពុជាមានជំនាញមួយពិតប្រាកដ ដែលអាចទទួលបានការងារ និងមុខរបរសមរម្យ និងមានស្ថិរភាពចំណូលស្របតាមការអំពាវនាវរបស់សម្តេចនាយករដ្ឋមន្រ្តី៕ អត្ថបទ៖ បូរ៉ាវី