សម្ដេចធិបតី៖ បើប្រជាពលរដ្ឋដែលអត់ដីពិតប្រាកដសូមចុះឈ្មោះជាមួយអជ្ញាធរមូលដ្ឋានដើម្បីទទួលបានដី ចៀសវាងការកាប់ទន្ទ្រានដីព្រៃដែលជាទ្រព្យសម្បត្តិរបស់រដ្ឋ

ភ្នំពេញ៖ សម្ដេច​មហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា តាមរយៈបណ្ដាញ​សង្គម​ហ្វេសប៊ុក នៅព្រឹកថ្ងៃទី១៧ ខែសីហា ឆ្នាំ២០២៦នេះ បាន​អំពាវនាវដល់ប្រជាពលរដ្ឋ ដែលអត់ដីពិតប្រាកដ សូមចុះឈ្មោះជាមួយអជ្ញាធរមូលដ្ឋាន ដើម្បីទទួលបានដីចៀសវាងការកាប់ទន្ទ្រានដីព្រៃដែលជាទ្រព្យសម្បត្តិរបស់រដ្ឋ។

សម្ដេច​ធិបតី បានថ្លែងថា រាជរដ្ឋាភិបាលមានកម្មវិធីសម្រាប់ផ្តល់ដីជូនប្រជាពលរដ្ឋដែលអត់មានដីពិតប្រាកដ ដូចជាកម្មវិធី «គម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ច»-LASED (Land Allocation for Social and Economic Development), កម្មវិធីផ្តល់ដីសង្គមកិច្ចជូនអតីតយុទ្ធជន, កម្មវិធីផ្តល់ដី ការពារព្រៃ ដើម្បីរួមគ្នាអភិវឌ្ឍដោយចីរភាព ។ល។ ដែលបានផ្តល់ដីជូនប្រជាពលរដ្ឋរាប់ពាន់គ្រួសារកន្លងមកហើយ។

សម្ដេច​ធិបតីបានថ្លែងថា៖«ហេតុដូច្នេះ បើប្រជាពលរដ្ឋដែលអត់ដីពិតប្រាកដ សូមចុះឈ្មោះជាមួយអជ្ញាធរមូលដ្ឋាន ចៀសវាងការកាប់ទន្ទ្រានដីព្រៃដែលជាទ្រព្យសម្បត្តិរបស់រដ្ឋ»។

សម្ដេច​ធិបតី បានថ្លែង​បញ្ជាក់បែបនេះ តាមរយៈការ​ចែករំលែកបន្ត វីដេអូសកម្មភាព ឯកឧត្តម នួន ផារ័ត្ន អភិបាលខេត្តកំពង់ធំ ចុះពិនិត្យការកាយក្រវ៉ាត់ព្រំដីរបស់រដ្ឋ​ នៅឃុំបឹងល្វា ស្រុកសន្ទុកខេត្តកំពង់ធំ។

សូមជម្រាបថា នៅក្នុងអាណត្តិទី៧នេះ រាជរដ្ឋាភិបាលកម្ពុជាបានដាក់ចេញនូវ «គោលនយោបាយផ្ដល់ដីសម្បទានសង្គមកិច្ច» ជាយន្តការគន្លឹះដ៏សំខាន់ ដើម្បីដោះស្រាយតម្រូវការជូនប្រជាពលរដ្ឋក្រីក្រ សហគមន៍ជនជាតិដើមភាគតិច និងអ្នកដែលខ្វះខាតដីពិតប្រាកដ។ គោលនយោបាយនេះត្រូវបានអនុវត្តស្របតាម យុទ្ធសាស្ត្របញ្ចកោណ ដំណាក់កាលទី១ (មុំទី៤ នៃបញ្ចកោណទី៤) របស់រដ្ឋាភិបាល ដោយផ្តោតលើកម្មវិធីសំខាន់ៗដូចជា៖ ១. គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច (LASED III) ដែលរាជរដ្ឋាភិបាលបាននិងកំពុងបន្តជំរុញយ៉ាងសកម្មនូវ គម្រោង LASED III ដែលជាគម្រោងសហការរវាងក្រសួងរៀបចំដែនដី និងធនាគារពិភពលោក។ ២. កម្មវិធីដីសម្បទានសង្គមកិច្ចពិសេសគាំទ្រពលករ (LASED III-40) ដែលនេះជាកម្មវិធីថ្មីបន្ថែមផ្ដួចផ្ដើមឡើងក្នុងអាណត្តិទី៧នេះ ក្នុងគោលដៅផ្តោតលើការកំណត់ទីតាំងដីសម្បទានដើម្បី «គាំទ្រដល់ពលករខ្មែរដែលមានអាយុចាប់ពី ៤០ ឆ្នាំឡើងទៅ ដែលបានវិលត្រឡប់មកពីប្រទេសថៃ» ដើម្បីជួយសង្គ្រោះពលករក្រីក្រដែលគ្មានទីពឹង ឱ្យមានដីធ្លីពិតប្រាកដសម្រាប់បង្កបង្កើនផល បង្កើតប្រភពចំណូលនៅស្រុកកំណើត និងកាត់បន្ថយការចំណាកស្រុកបន្តទៀត។

រាជរដ្ឋាភិបាលក៏មាន គោលការណ៍ «ផ្ដល់ដី ពង្រឹងការការពារព្រៃឈើ» ដោយសម្តេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវគោលគំនិតក្នុងការរៀបចំដីសម្បទានសង្គមកិច្ចជូនពលរដ្ឋខ្វះដីពិតប្រាកដ ក្នុងទម្រង់ជាយុទ្ធសាស្ត្រឈ្នះ-ឈ្នះ ក្នុងនោះពលរដ្ឋទទួលបានដី និងការអភិវឌ្ឍជីវភាពនៅនឹងកន្លែង និងការពង្រាយពលរដ្ឋឱ្យទៅរស់នៅ និងបង្កើតសហគមន៍នៅតំបន់ទាំងនោះ ក៏ជាឱកាសឱ្យពួកគាត់ចូលរួមចំណែកការពារដីរដ្ឋ និងការពារព្រៃឈើជុំវិញនោះពីការទន្ទ្រានខុសច្បាប់ផងដែរ។

សរុបមក គោលនយោបាយអាណត្តិទី៧ មិនត្រឹមតែដោះស្រាយបញ្ហាអត់ដីដោយការ «ចែកដី» ប៉ុណ្ណោះទេ ប៉ុន្តែរដ្ឋាភិបាលបានភ្ជាប់ទៅនឹងការ «អភិវឌ្ឍជីវភាព» ដោយធានាថាពលរដ្ឋក្រីក្រពិតប្រាកដទទួលបានដីហើយ មានសមត្ថភាពបង្កើតចំណូល និងរស់នៅបានយូរអង្វែង៕