រដ្ឋមន្ត្រីក្រសួងការពារជាតិ ដឹកនាំកិច្ចប្រជុំប្រកាស​សមាសភាព​គណៈកម្មាធិការ​ជាតិ​កាតព្វ​កិច្ច​យោធា

ភ្នំពេញ៖ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង​ជា​ប្រធានគណៈកម្មាធិការជាតិកាតព្វកិច្ចយោធា បានអញ្ជើញជាអធិបតីភាព​ក្នុង​កិច្ច​ប្រជុំ​ប្រកាសសមាសភាពគណៈកម្មាធិការជាតិកាតព្វកិច្ចយោធា និងពិភាក្សាអំពីការរៀបចំយន្តការ នីតិ​វិធី និងបែបបទសម្រាប់អនុវត្តច្បាប់ស្តីពីកាតព្វកិច្ចយោធានាព្រឹកថ្ងៃទី៣១ ខែសីហា ឆ្នាំ​២០២៦ នៅទីស្តីការក្រសួងការពារជាតិ។

កិច្ចប្រជុំនេះធ្វើឡើងបន្ទាប់ពីរាជរដ្ឋាភិបាលកម្ពុជា បានចេញសេចក្តីសម្រេចលេខ ១០៤ សសរ ចុះ​ថ្ងៃទី២៤ ខែសីហា ឆ្នាំ២០២៦ ស្តីពីការតែង​តាំង​សមាសភាព​គណៈកម្មា​ធិការ​ជាតិ​កាតព្វ​កិច្ច​យោធា ​ដើម្បីរៀបចំ និងដឹកនាំការអនុវត្តច្បាប់ស្តីពីកាតព្វកិច្ចយោធាឱ្យមានប្រសិទ្ធភាព។

ថ្លែង​ក្នុងកិច្ចប្រជុំ ឯកឧត្តម នាយឧត្តមសេនីយ៍ ទៀ សីហា បានថ្លែង​អំណរ​គុណ​យ៉ាង​ជ្រាល​ជ្រៅ​ចំពោះ​សមាជិក សមាជិកា មកពីគ្រប់ក្រសួង ស្ថាប័ន និងអង្គភាពពាក់ព័ន្ធ ដែលបាន​ចូល​រួម​ពិភាក្សា និងផ្តល់មតិយោបល់ជាធាតុចូលដ៏មានសារៈសំខាន់ ពាក់ព័ន្ធនឹងបទដ្ឋានគតិយុត្ត យន្តការ​របស់គណៈកម្មាធិការ និងការរៀបចំនីតិវិធី បែបបទ និងដំណើរការ​អនុវត្ត​ច្បាប់​ស្តីពី​កាតព្វ​កិច្ច​យោធា។

រដ្ឋមន្ត្រីក្រសួងការពារជាតិបានផ្តល់អនុសាសន៍ណែនាំដល់សមាជិក សមាជិកា គណៈ​កម្មាធិការ​ជាតិ​កាតព្វ​កិច្ចយោធាទាំងអស់ ឱ្យបន្តខិតខំ​អនុវត្ត​ការងារ​ដែល​នៅ​ចំ​ពោះ​មុខ​ប្រកប​ដោយ​ការ​ទទួល​ខុស​ត្រូវ និងឱ្យបានឆាប់រហ័ស ដើម្បីធានាឱ្យការងារអនុវត្តច្បាប់ស្តីពីកាតព្វកិច្ចយោធា សម្រេច​បាន​តាមគោលដៅ និងភារកិច្ចដែលប្រមុខរាជរដ្ឋាភិបាលបានប្រគល់ជូន។

តាម​សេចក្តីសម្រេចនេះ ឯកឧត្តម នាយឧត្តមសេនីយ៍ ទៀ សីហា ត្រូវបាន​តែង​តាំង​ជា​ប្រធាន​គណៈ​កម្មាធិការជាតិកាតព្វកិច្ចយោធា។ ឯកឧត្តម នាយឧត្តមសេនីយ៍ ភួង ស៊ីផាន រដ្ឋ​លេខា​ធិការ​ក្រសួងការពារជាតិ ជាអនុប្រធានអចិន្ត្រៃយ៍ និងមានអនុប្រធានចំនួន ៣រូប រួមមាន ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ, ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ និងជា​មេ​បញ្ជា​ការ​កងទ័ពជើងគោក និងឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកង​យោធ​ពល​ខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស។

គណៈកម្មាធិការជាតិកាតព្វកិច្ចយោធា ក៏មានសមាជិក សមាជិកា ចំនួន ២៤រូបទៀត ដែល​មក​ពី​ក្រសួង ស្ថាប័ន និងអង្គភាពពាក់ព័ន្ធនានា រួមមាន តំណាងក្រសួងមហាផ្ទៃ ក្រសួងសេដ្ឋកិច្ច និង​ហិរញ្ញ​វត្ថុ ក្រសួងអប់រំ យុវជន និងកីឡា ក្រសួងយុត្តិធម៌ ក្រសួងប្រៃសណីយ៍ និងទូរគមនាគមន៍ ក្រសួង​សុខាភិបាល ក្រសួងការងារ និងបណ្តុះបណ្តាលវិជ្ជាជីវៈ ក្រសួងមុខងារសាធារណៈ ព្រម​ទាំង​តំណាង​ខុទ្ទកាល័យសម្តេចមហាបវរធិបតី នាយករដ្ឋមន្ត្រី មេបញ្ជាការកងទ័ពជើងអាកាស មេ​បញ្ជាការកងទ័ពជើងទឹក អគ្គលេខាធិការដ្ឋានក្រសួងការពារជាតិ និង​អង្គ​ភាព​ពាក់​ព័ន្ធ​មួយ​ចំនួន​ទៀត។

ការតែងតាំងសមាសភាពគណៈកម្មាធិការជាតិកាតព្វកិច្ចយោធានេះ ធ្វើឡើងដោយ​ផ្អែក​លើ​ព្រះរាជ​ក្រម​លេខ នស/រកម/០៥២៦/០០៨ ចុះថ្ងៃទី២៣ ខែឧសភា ឆ្នាំ២០២៦ ដែល​ប្រកាស​ឱ្យ​ប្រើច្បាប់ស្តីពីកាតព្វកិច្ចយោធា និងអនុក្រឹត្យលេខ ១៧៦ អនក្រ.បក ចុះថ្ងៃទី១២ ខែសីហា ឆ្នាំ​២០២៦ ស្តីពីការអនុវត្តច្បាប់ស្តីពីកាតព្វកិច្ចយោធា។

តាមរយៈគណៈកម្មាធិការជាតិនេះ យន្តការ និងនីតិវិធី​ពាក់ព័ន្ធ​នឹង​ការ​អនុវត្ត​ច្បាប់​ស្តីពី​កាតព្វ​កិច្ច​យោធា នឹងត្រូវរៀបចំ និងបង្កើតជាបន្តបន្ទាប់ ដើម្បីធានាឱ្យការអនុវត្តច្បាប់មានប្រសិទ្ធភាព តម្លា​ភាព​ និងស្របតាមគោលការណ៍ច្បាប់។

ក្នុងកិច្ចប្រជុំ ក៏មានការបង្ហាញ និងពិភាក្សាអំពីពង្រាងខ្លឹមសារ នីតិវិធី និងបែបបទ​នៃ​ការ​អនុវ​ត្ត​ច្បាប់​ស្តីពីកាតព្វកិច្ចយោធា ដែលរាយការណ៍ដោយ ឯកឧត្តម ឧត្តមសេនីយ៍ឯក ស៊ីន សូផាន្នី មេ​បញ្ជា​ការ​រងកងរាជអាវុធហត្ថលើផ្ទៃប្រទេស និងជា​សមាជិក​គណៈ​កម្មាធិការ​ជាតិ​កាតព្វ​កិច្ច​យោធា​។ ជាមួយគ្នានេះ កិច្ចប្រជុំក៏បានពិភាក្សាអំពីការរៀបចំ និងផ្សព្វផ្សាយព័ត៌មានពាក់ព័ន្ធ ដើម្បី​ឱ្យ​ប្រជាពលរដ្ឋ ជាពិសេសយុវជនដែលត្រូវបំពេញកាតព្វកិច្ចយោធា បាន​យល់​ដឹង​ច្បាស់​លាស់​អំពី​សិទ្ធិ កាតព្វកិច្ច និងនីតិវិធីពាក់ព័ន្ធ។

បន្ថែមពីនេះ ឯកឧត្តម នាយឧត្តមសេនីយ៍ មាស សាវ៉ន អគ្គនាយកអគ្គនាយកដ្ឋានយោធសេវា និង​ជា​សមាជិកគណៈកម្មាធិការជាតិកាតព្វកិច្ចយោធា ក៏បានធ្វើ​សេចក្តី​រាយការណ៍​ជូន​អង្គ​ប្រជុំ​អំពី​ការ​ងារពាក់ព័ន្ធនឹងការរៀបចំ និងត្រៀមអនុវត្តកាតព្វកិច្ចយោធា៕ អត្ថបទ៖ វង្ស សុភាព