គោលដៅចំនួន៥ទីតាំងនៅកម្ពុជា នឹងត្រូវរឹតបន្តឹងខ្លាំងខាងផ្នែកចរាចរណ៍ ដើម្បីរួមចំណែកកាត់បន្ថយការគ្រោះថ្នាក់

ភ្នំពេញ៖ អគ្គស្នងការដ្ឋាននគរបាលជាតិ នៃក្រសួងមហាផ្ទៃ បានឱ្យដឹងថា គិតចាប់ពីថ្ងៃទី១ ខែកញ្ញាតទៅ សមត្ថកិច្ចនឹងចាប់ផ្តើមរឹតបន្តឹងលើការអនុវត្តច្បាប់ចរាចរណ៍ផ្លូវគោក ដោយមានការផាកពិន័យ ក្នុងនោះទីតាំងចំនួន៥ មានដូចជា រាជធានីភ្នំពេញ ខេត្តព្រះសីហនុ កណ្តាល កំពង់ស្ពឺ និងស្វាយរៀង នឹងត្រូវរឹតបន្តឹងខ្លាំងជាងគេ ដោយសារអត្រាគ្រោះថ្នាក់ចរាចរណ៍ខ្ពស់។

ការលើកឡើងនេះរបស់ ឯកឧត្តម ឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ ធ្វើឡើងក្នុងពិធីចុះហត្ថលេខាលើអនុស្សរណៈនៃការយោគយល់គ្នា ស្តីពីការប្រើប្រាស់សេវាកម្មធនាគារ កាណាឌីយ៉ា ក.អ សម្រាប់ប្រតិបត្តិការបង់ប្រាក់ពិន័យអំពើល្មើសច្បាប់ស្តីពីចរាចរណ៍ផ្លូវគោក នៅរសៀលថ្ងៃទី៣១ ខែសីហា ឆ្នាំ២០២៦នេះ។

ឯកឧត្តម ឧត្តមសេនីយ៍ឯក បានមានប្រសាសន៍បន្តថា ដោយពិនិត្យឃើញស្ថានភាពគ្រោះថ្នាក់ ដែលកើតឡើងយ៉ាងគំហុកនាពេលចុងក្រោយនេះ ជាពិសេស៥គោលដៅខាងលើ ដែលគិតត្រឹម​រយៈពេល ៦ខែកន្លងទៅនេះ ថ្នាក់ដឹកនាំក្រសួងមហាផ្ទៃ​ បានស្នើសុំទៅប្រមុខរាជរដ្ឋាភិបាល ដើម្បីរឹតបន្តឹងច្បាប់នេះឡើងវិញ។ ឯកឧត្តម បានបន្តថា កន្លងទៅកម្លាំងនគរបាលចរាចរណ៍ផ្លូវគោក គ្រាន់តែធ្វើការអប់រំ មិនធ្វើការផាកពិន័យទេ បានន័យថា អប់រំឱ្យប្រជាពលរដ្ឋចូលរួមគោរពច្បាប់ ប៉ុន្តែសង្កេតឃើញថា នៅតែមានកំណើនខ្ពស់។

បើតាម ឯកឧត្តម ឧត្តមសេនីយ៍ឯក ចេវ ហាក់ គិតក្នុងឆមាសទី១ ឆ្នាំ២០២៦ អត្រាអ្នកស្លាប់ដោយសារគ្រោះថ្នាក់ចរាចរណ៍ មានចំនួន ៧៧៣នាក់ ក្នុងនោះជាង ១ ០០០នាក់ រងរបួស ហើយរបួសអាចបន្តស្លាប់កើនឡើងថែមទៀត។ ឯកឧត្តម បានបន្ថែមថា ករណីគ្រោះថ្នាក់នេះបង្កឡើងដោយសារការបើកបរលើសល្បឿនកំណត់ មានរហូត ៤៦% នៃគ្រោះថ្នាក់, ការមិនគោរពសិទ្ធិអាទិភាព ក៏គ្រោះថ្នាក់ខ្ពស់ដែរ និងមួយទៀត គឺបើកបរក្នុងស្ថានភាពស្រវឹង ខណៈការរឹតបណ្តឹង អ្នកបើកបរក្នុងស្ថានភាពស្រវឹង បាននិងកំពុងតែធ្វើរហូតមកគ្រប់រាជធានីខេត្ត។

ការរឹតបន្តឹងច្បាប់ចរាចរណ៍ផ្លូវគោកយ៉ាងម៉ឺងម៉ាត់ ចាប់ពីថ្ងៃទី១ ខែកញ្ញានេះតទៅ ជាពិសេសនៅក្នុងភូមិសាស្ត្រគន្លឹះទាំង៥ខាងលើ គឺជាវិធានការដាច់ខាត និងចាំបាច់បំផុតរបស់អគ្គស្នងការដ្ឋាននគរបាលជាតិ ដើម្បីទប់ស្កាត់ និងកាត់បន្ថយអត្រាគ្រោះថ្នាក់ចរាចរណ៍ឱ្យនៅកម្រិតទាបបំផុត។ ជោគជ័យនៃយុទ្ធនាការនេះ មិនមែនពឹងផ្អែកតែលើការផាកពិន័យរបស់សមត្ថកិច្ចនោះទេ ប៉ុន្តែទាមទារដាច់ខាតនូវការចូលរួមគោរពច្បាប់ដោយស្មោះត្រង់ និងស្មារតីទទួលខុសត្រូវខ្ពស់ពីគ្រប់អ្នកបើកបរ ដើម្បីសុវត្ថិភាពផ្ទាល់ខ្លួន និងសង្គមជាតិទាំងមូល៕

អត្ថបទ៖ ឈិត បូរ៉ាវី