ឯកឧត្តមទេសរដ្ឋមន្ត្រី អូស្មាន ហាស្សាន់ ជម្រុញយុវជននិងបញ្ញវន្តខ្មែរអ៊ិស្លាមអភិវឌ្ឍសមត្ថភាពបច្ចេកវិទ្យាឌីជីថល និងបំណិនសតវត្សរ៍ទី២១

ភ្នំពេញ ៖ ឯកឧត្តមទេសរដ្ឋមន្ត្រី អូស្មាន ហាស្សាន់ បានជម្រុញយុវជន និងបញ្ញវន្តខ្មែរអ៊ិស្លាមទាំងអស់ត្រូវអភិវឌ្ឍសមត្ថភាព ភាពជាអ្នក ដឹកនាំ សិក្សារៀនសូត្របន្ថែម ចេះប្រើប្រាស់បច្ចេកវិទ្យាឌីជី ថល និងបំណិនសតវត្សរ៍ទី២១ ដើម្បីរួមចំណែកជាមួយក្រសួង ស្ថាប័នសាមី លើការ អភិវឌ្ឍសេដ្ឋកិច្ច និងសង្គមជាតិទៅតាមជំនាញ និងវិស័យ។ រីឯសិស្សនិស្សិតក៏ត្រូវតម្រង់ទិសនៃការសិក្សាឱ្យចំទិសដៅស្របតាមតម្រូវការទីផ្សារការងារ និងសង្គមជាតិ ក្នុងបរិបទឌីជីថលដើម្បីចូលរួមកសាងប្រទេសជាតិ និងសហគមន៍ឱ្យកាន់តែរីក ចម្រើនថែមទៀត។

ការជម្រុញដូចនេះខណះ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានសមាគមសហភាពបញ្ញវន្តមុស្លីមកម្ពុជាអញ្ជើញជាអធិបតី ក្នុងពិធីបិទវេទិកាយុវជន-បញ្ញវន្តមុស្លិម២១ ឆ្នាំ២០២៤ នៅវិទ្យាស្ថានបច្ចេកវិទ្យាកម្ពុជា(តិចណូ)នារសៀល ថ្ងៃទី១១ ខែសីហា ឆ្នាំ២០២៤។

ក្នុងឱកាសនោះ ឯកឧត្តមបណ្ឌិត អូស្មាន ហាស្សាន់ បានកោត សរសើរ និងវាយតម្លៃខ្ពស់ចំពោះគណៈកម្មការរៀបចំវេទិកា និង ក្រុមការងារពាក់ព័ន្ធ ដែលបានបំពេញភារកិច្ចយ៉ាងសកម្មក្នុងស្មារតីទទួលខុសត្រូវខ្ពស់ ធ្វើឱ្យវេទិកានេះលេចជារូបរាងឡើង និងប្រព្រឹត្ត ទៅដោយរលូន ព្រមទាំងទទួលបានលទ្ធផលផ្លែផ្កាគួរឱ្យកត់ សម្គាល់។ឯកឧត្តមបន្តថា នេះមិនមែនជាលើកទី១ទេដែលសមាគមសហភាពបញ្ញវន្តមុស្លីមកម្ពុជា បានរៀបចំជំនួបរបស់បញ្ញវន្ត និស្សិតមុស្លិមកម្ពុជាដែលមានចំនួនរាប់រយនាក់បានចូលរួម និងបានបង្កើនមិត្តភាព និងកិច្ចសហប្រតិបត្តិការ​ល្អនិងបង្ខិតគ្នាឱ្យកាន់តែជិត រវាងនិស្សិត បញ្ញវន្តទាំងអស់ជាពិសេសជាមួយថ្នាក់ដឹកនាំអ៊ិស្លាម​នៅគ្រប់ក្រសួងស្ថាប័ន។

ឯកឧត្តមបន្ថែមថា ទាំងអស់នេះកើតឡើងទៅបានដោយសារតែ​ប្រទេសយើងមានសុខសន្តិភាពពេញលេញ មានការអភិវឌ្ឍលើគ្រប់វិស័យ ក្រោមការដឹកនាំប្រកបដោយគតិបណ្ឌិតរបស់​សម្តេចតេតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា​នាពេលបច្ចុប្បន្ន និងបានបន្តមកសម្តេចមហាបវរធិបតី ហ៊ុន ម៉ាណែត នា យករដ្ឋមន្ត្រីនាពេលបច្ចុប្បន្ន ជាពិសេសស​ហគមន៍ខ្មែរអ៊ិស្លាមមានការីកចម្រើនគួរជាទីមោទនៈ និងមានភាពខុសឆ្ងាយ បើប្រៀបធៀបទៅនឹងសម័យកាលមុនៗនៅកម្ពុជា។

តាមរបាយការណ៍បូកសរុបដោយ ឯកឧត្តម រ៉ូហ្វី អូស្មាន អនុ ប្រធានសមាគមសម្ព័ន្ធយុវជនមុស្លិមកម្ពុជា និងជាគណៈកម្មការរៀបចំកម្មវិធី បានឱ្យដឹងថា បន្ទាប់ពីវេទិកានេះបានបញ្ចប់ដោយជោគជ័យ អង្គវេទិកាបានប្រមូលធាតុចូលសំខាន់ៗ មួយចំនួន មានដូចជា ការងារអប់រំអ៊ិស្លាមនៅកម្ពុជា មានការរីកចម្រើនគួរជាទីមោទនៈ បន្ទាប់ពីមានការយកចិត្តទុកដាក់ខ្ពស់ពីប្រមុខរាជរដ្ឋាភិបាល និងថ្នាក់ដឹកនាំខ្មែរអ៊ិស្លាមនៅគ្រប់កម្រិត។ យុវជនខ្មែរអ៊ិស្លាមជាច្រើនមាន​ចំណេះ និងជំនាញច្បាស់លាស់ ដែលអាចទទួលបានការងារធ្វើល្អៗ។ យុវជនខ្មែរឥស្លាមជាច្រើនបានចូលរួមការងារសង្គម ដូចជាការងារនៅតាមសមាគម អង្គការ សាលារៀន មន្ទីរពេទ្យ ក្នុងគោល បំណងចូលរួមអភិវឌ្ឍសហគមន៍ខ្មែរអ៊ិស្លាម។

គួរឱ្យដឹងថា «វេទិកាយុវជន-បញ្ញវន្តមុស្លិម២១ ឆ្នាំ២០២៤»នេះ ត្រូវបានរៀបចំឡើង ស្របនឹងពេលវេលាដែលប្រទេសកម្ពុជា តាមរយៈក្រសួងអប់រំ យុវជន និងកីឡាបានរៀបចំប្រារព្ធទិវាអន្តរជាតិសម្រាប់យុវជន ១២ សីហា ខួបលើកទី២៥ ក្រោមមូលបទ«នវានុវត្តន៍ឌីជីថលរបស់យុវជនសម្រាប់ការអភិវឌ្ឍប្រកបដោយចីរភាព» ៕

អត្ថបទ៖ ភារម្យ