សម្ដេចធិបតី អបអរសាទរ កម្ពុជាបានបំបែកកំណត់ត្រាប្រវត្តិសាស្ត្រនៃការនាំចេញអង្ករច្រើនជាង ១លានតោន

នៅព្រឹកថ្ងៃទី២០ ខែតុលា ឆ្នាំ២០២៦នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានផ្ញើសារអបអរសាទរ ដែលកម្ពុជាបានបំបែកកំណត់ត្រាប្រវត្តិសាស្ត្រនៃការនាំចេញអង្ករច្រើនជាង ១លានតោន។

បើតាមយោងតាមក្រសួងកសិកម្ម រុក្ខាប្រមាញ់ និង នេសាទ គិតត្រឹមថ្ងៃទី១៩ ខែតុលា ឆ្នាំ២០២៦ ទំហំនៃការនាំចេញអង្ករផ្លូវការរបស់កម្ពុជាបានហក់ឡើងដល់ ១ ០១៤ ៤៤២ តោន ដែលនេះជាការបំបែកកំណត់ត្រាចាស់ (ឆ្នាំ២០២៥ សម្រេចបាន ៩៤០ ៣២១ តោន) និងជាការសម្រេចបាននូវចក្ខុវិស័យយុទ្ធសាស្ត្រជាតិដែលបានកំណត់អស់រយៈពេលជាង ១៥ ឆ្នាំមកហើយ (តាំងពីឆ្នាំ២០១០)។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រួមជាមួយក្រសួងកសិកម្ម រុក្ខាប្រមាញ់ និងនេសាទ បានសម្តែងនូវការអបអរសាទរ និងមោទនភាពយ៉ាងខ្លាំងចំពោះព្រឹត្តិការណ៍ដ៏សំខាន់នេះ។

បើតាមយោងតាមក្រសួងកសិកម្ម រុក្ខាប្រមាញ់ និង នេសាទ តួលេខគន្លឹះនៃការសម្រេចបាននូវកំណត់ត្រាប្រវត្តិសាស្ត្រ រួមមាន បរិមាណនាំចេញសរុប (គិតត្រឹម ១៩ តុលា ២០២៦)៖ ១ ០១៤ ៤៤២ តោន (លើសពី ១ លានតោនជាលើកដំបូងក្នុងប្រវត្តិសាស្ត្រ) ខណៈឆ្នាំចាស់សម្រេចបាន ៩៤០ ៣២១ តោន (រកចំណូលបានប្រមាណ ៦០២,៤១ លានដុល្លារអាមេរិក)។

ក្នុងនោះសម្រាប់ទីផ្សារចម្បងៗដែលកម្ពុជានាំចេញរួមមាន សហភាពអឺរ៉ុប (EU) ចិន បណ្តាប្រទេសក្នុងតំបន់អាស៊ាន (ជាពិសេសប្រទេសហ្វីលីពីនដែលបានបញ្ជាទិញយ៉ាងគំហុកក្នុងឆ្នាំនេះ ដើម្បីសន្តិសុខស្បៀង) ព្រមទាំងតំបន់អាហ្វ្រិក និងមជ្ឈិមបូព៌ា។ ចំណែកប្រភេទអង្ករនាំចេញសំខាន់ៗរួមមាន អង្ករក្រអូប (រួមទាំងអង្ករប្រណីតផ្សេងៗ) អង្ករសគ្រាប់វែង និងចុងអង្ករ។

ក្រសួងកសិកម្មកម្ពុជាបញ្ជាក់ថា នេះជាផ្លែផ្កាកើតចេញពីកិច្ចខិតខំប្រឹងប្រែងរួមគ្នារវាងរាជរដ្ឋាភិបាល ក្រសួងកសិកម្ម សហព័ន្ធស្រូវអង្ករកម្ពុជា ម្ចាស់រោងម៉ាស៊ីនកិនស្រូវ និងជាពិសេសគឺបងប្អូនប្រជាកសិករខ្មែរនៅទូទាំងប្រទេស ដែលបានជំរុញខ្សែច្រវាក់តម្លៃ និងគុណភាពអង្ករកម្ពុជារហូតទទួលបានការទទួលស្គាល់ និងគាំទ្រយ៉ាងខ្លាំងលើឆាកអន្តរជាតិ។

សូមជម្រាបថា ក្នុងផែនការយុទ្ធសាស្ត្របន្ទាប់របស់រាជរដ្ឋាភិបាល (២០២៥–២០៣០) ដើម្បីរក្សានិរន្តរភាព និងពង្រីកការប្រកួតប្រជែងបន្ថែមទៀត រាជរដ្ឋាភិបាលកម្ពុជាបានដាក់ចេញនូវ «យុទ្ធសាស្ត្រពង្រីកទីផ្សារអង្ករកិន និងការធ្វើពិពិធកម្មការនាំចេញ ឆ្នាំ២០២៥-២០៣០» ដោយផ្តោតលើទិសដៅសំខាន់ៗដូចជា៖ ការវាយលុកទីផ្សារស្រទាប់កណ្តាលនៅអាស៊ី៖ ជំរុញការនាំចេញប្រភេទ «អង្ករសគ្រាប់វែង» ទៅកាន់ក្រុមអ្នកប្រើប្រាស់ដែលមានចំណូលមធ្យមនៅក្នុងតំបន់អាស៊ី និងអាស៊ានបន្ថែមទៀត (ក្រៅពីពឹងផ្អែកតែលើអង្ករក្រអូបប្រណីត)។ ការបង្កើនយន្តការ G2G (រដ្ឋ និងរដ្ឋ)៖ ពង្រឹងកិច្ចព្រមព្រៀងពាណិជ្ជកម្មសេរីដែលមានស្រាប់ និងការចរចាទិញ-លក់ដោយផ្ទាល់រវាងរដ្ឋាភិបាល និងរដ្ឋាភិបាល ព្រមទាំងការចូលរួមក្នុងកម្មវិធីស្បៀងអាហារពិភពលោក (UN) និងអង្គការមនុស្សធម៌នានា។ ការធ្វើពិពិធកម្មទៅកាន់អាមេរិកខាងជើង និងអាហ្វ្រិក៖ កាត់បន្ថយការពឹងផ្អែកតែលើទីផ្សារប្រពៃណី (ចិន និងអឺរ៉ុប) ដោយពង្រីកខ្លួនចូលទៅក្នុងទីផ្សារសហរដ្ឋអាមេរិក កាណាដា និងបណ្តាប្រទេសធំៗនៅទ្វីបអាហ្វ្រិក និងការដោះស្រាយបញ្ហាដប (Bottlenecks) និងកាត់បន្ថយថ្លៃដើម៖ វិនិយោគបន្ថែមលើហេដ្ឋារចនាសម្ព័ន្ធដឹកជញ្ជូន (ដូចជាការប្រើប្រាស់ផ្លូវទឹក និងកំពង់ផែ) សម្រួលនីតិវិធីគយ និងពង្រឹងសមត្ថភាពម៉ាស៊ីនសម្ងួត និងរោងម៉ាស៊ីនកិនស្រូវ ដើម្បីឱ្យតម្លៃអង្ករខ្មែរកាន់តែមានភាពប្រកួតប្រជែងខ្ពស់នៅលើឆាកអន្តរជាតិ៕