រដ្ឋមន្ត្រីការបរទេសកម្ពុជា៖ ទំនាក់ទំនងការទូតមានសារៈសំខាន់ណាស់ សម្រាប់កម្ពុជា-ថៃ មានលក្ខណៈវិជ្ជមានជាមួយគ្នា

ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានលើកឡើងថា ទំនាក់ទំនងការទូតមានសារៈសំខាន់ណាស់ សម្រាប់ឱ្យទំនាក់ទំនងរវាងប្រទេសទាំង២ កម្ពុជា-ថៃ មានលក្ខណៈវិជ្ជមានជាមួយគ្នា។ ការលើកឡើងនេះ ធ្វើឡើងនៅ នៅល្ងាចថ្ងៃទី២០ ខែតុលា ឆ្នាំ២០២៦ នេះ ក្នុងឱកាស ឯកឧត្តមឧបនាយករដ្ឋមន្ត្រី ធ្វើសន្និសីទសារព័ត៌មាន ស្តីពី «លទ្ធផលកិច្ចប្រជុំលើកទី២ របស់គណៈកម្មការផ្សះផ្សាក្រោមអនុសញ្ញាអង្គការសហប្រជាជាតិ ស្ដីពីនីតិសមុទ្រ(UNCLOS) រវាងកម្ពុជា និងថៃ នៅទីក្រុងឡាអេ ប្រទេសហូឡង់។

ឯកឧត្តមឧបនាយករដ្ឋមន្ត្រី ប្រាក់ សុខុន មានប្រសាសន៍ថា កិច្ចប្រជុំលើកទី២ របស់គណៈកម្មការផ្សះផ្សាក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) បានកត់សម្គាល់ឃើញថា ការឯកភាព និងវិធានការដែលភាគីទាំងពីរធ្លាប់បានព្រមព្រៀងពីមុន មិនទាន់ត្រូវបានអនុវត្តពេញលេញនៅឡើយ។ ហេតុដូច្នេះ គណៈកម្មការបានលើកទឹកចិត្តឱ្យភាគីទាំងពីរអនុវត្តការប្តេជ្ញាចិត្តទាំងនោះឡើងវិញ និងបានលើកទឹកចិត្តឱ្យខិតខំដំឡើងកម្រិតតំណាងការទូត ដោយតែងតាំងតំណាងជាន់ខ្ពស់ម្នាក់ប្រចាំនៅរាជធានីរបស់ភាគីម្ខាងទៀត។

ឯកឧត្តមឧបនាយករដ្ឋមន្ត្រី លើកឡើងថា ទំនាក់ទំនងការទូតមានសារៈសំខាន់ណាស់ សម្រាប់ឱ្យទំនាក់ទំនងរវាងប្រទេសទាំង២ មានលក្ខណៈវិជ្ជមានជាមួយគ្នា មានផលប្រយោជន៍ឱ្យគ្នាទៅវិញទៅមក ហើយអាចឱ្យប្រជាជននៃប្រទេសទាំង២ រាប់រកគ្នាទៅវិញទៅមកដោយមិត្តភាព និងពេលខ្លះដោយភាតរភាព។

ឯកឧត្តមឧបនាយករដ្ឋមន្ត្រី ប្រាក់ សុខុន បញ្ជាក់បន្ថែមថា៖ “ទំនាក់ទំនងការទូតនេះ គឺកាន់តែមានសារៈសំខាន់ថែមទៀតក្នុងគ្រាមានភាពតានតឹង និងនៅមានជម្លោះ។ ករណីនេះ គឺចំករណីកម្ពុជា និងថៃតែម្ដង។ ទំនាក់ទំនងការទូតជួយរក្សានូវទំនាក់ទំនងប្រកបដោយសន្តិវិធីរវាងប្រទេសយើងទាំង២ អាចជួយដោះស្រាយនូវជម្លោះទាំងឡាយដែលកើតឡើងដោយសន្តិវិធី ដោយការពិភាក្សាគ្នា ដោយការស្វែងរកដំណោះស្រាយណា ដែលមិនមែនដំណោះស្រាយតាមផ្លូវយោធា ហើយទំនាក់ទំនងការទូតជួយទៅដល់ការរក្សាសន្តិភាព ចៀសវាងនូវការមិនយល់គ្នា ឬការយល់ច្រឡំគ្នា ហើយបង្កើនសហប្រតិបត្តិការរវាងប្រទេសទាំង២ ផងដែរ”។

ឯកឧត្តមឧបនាយករដ្ឋមន្ត្រី ប្រាក់ សុខុន លើកឡើងបន្តថា សព្វថ្ងៃនេះ ទំនាក់ទំនងការទូតរវាងកម្ពុជា និងថៃ បានទម្លាក់ត្រឹមកម្រិតលេខាទី២ ដែលជាកម្រិតទាបបំផុតនៅក្នុងទំនាក់ទំនងការទូតរវាងប្រទេស២។

គួរបញ្ជាក់ថា នៅក្នុងកិច្ចប្រជុំលើកទី២ របស់គណៈកម្មការផ្សះផ្សាក្រោមអនុសញ្ញាអង្គការសហប្រជាជាតិ ស្ដីពីនីតិសមុទ្រ(UNCLOS) រវាងកម្ពុជា និងថៃ នៅទីក្រុងឡាអេ ប្រទេសហូឡង់ ពីថ្ងៃទី១៤ ដល់ថ្ងៃទី១៨ ខែតុលា ឆ្នាំ២០២៦, គណៈកម្មការក៏បានលើកទឹកចិត្តឱ្យភាគីទាំងពីរចូលរួមដោយស្ថាបនា និងដោយបើកចំហលើទិដ្ឋភាពបច្ចេកទេស នៃការកំណត់ព្រំដែននៅក្នុងក្រុមការងារមួយ ក្រោមការដឹកនាំរបស់គណៈកម្មការផ្សះផ្សា ដែលជាចំណុចភាគីទាំងពីរបានព្រមព្រៀងគ្នាអនុវត្តដើម្បីកសាងទំនុកចិត្តទៅវិញទៅមក។ បន្ថែមពីលើនេះ ភាគីទាំងពីរបានទទួលស្គាល់នូវសិទ្ធិក្នុងការធ្វើសេចក្តីថ្លែងការណ៍ ដើម្បីការពារសិទ្ធិស្របច្បាប់ ឬកែតម្រូវព័ត៌មានមិនពិត និងព័ត៌មានបំភាន់។ យ៉ាងណាក៏ដោយ ដើម្បីរក្សាបរិយាកាសអំណោយផលឈានទៅរកកិច្ចព្រមព្រៀង កម្ពុជានិងថៃបានប្តេជ្ញាអនុវត្តការអត់ធ្មត់ខ្ពស់ក្នុងទំនាក់ទំនងសាធារណៈ និងការចេញសេចក្តីថ្លែងការណ៍នានា ដែលអាចរួមចំណែកដល់អារម្មណ៍អវិជ្ជមានរបស់សាធារណជន ឬបង្កើនភាពតានតឹងរវាងប្រជាជននៃប្រទេសទាំងពីរ៕