កាកបាទក្រហមកម្ពុជា ចែកអំណោយ និងផ្តល់ «អាហារផ្លូវចិត្ត» ដល់ជនពិការភ្នែក

បន្ទាប់ពីបានផ្តល់អំណោយមនុស្សធម៌លើកទី១ កាលពីខែមេសា ឆ្នាំ២០២៦រួចមក ដោយក្តីស្រឡាញ់ និងការគិតគូរជានិច្ចពីសុខទុក្ខជនមានពិការភាព សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី២៧ ខែតុលា ឆ្នាំ២០២៦នេះ បានចាត់លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា រៀបចំពិធីសូត្រមន្ត ចម្រើនព្រះបរិត្ត សំណេះសណាល និងផ្តល់ជូនអំណោយមនុស្សធម៌ជាគ្រឿងឧបភោគ-បរិភោគ និងថវិកាលើកទី២ ប្រចាំឆ្នាំ២០២៦ (ត្រូវជាលើកទី២១ ចាប់តាំងពីឆ្នាំ២០១៤មក) ជូនដល់មជ្ឈមណ្ឌលបណ្តុះបណ្តាលវិជ្ជាជីវៈជនពិការភ្នែក (សមាគមតន្ដ្រីសំនៀងជនពិការ) និងជនមានពិការភាពចំនួន ១៥០នាក់ ស្ថិតនៅភូមិជំរៅ សង្កាត់គោករកា ខណ្ឌព្រែកព្នៅ រាជធានីភ្នំពេញ។

​បន្ទាប់ពីបានស្តាប់របាយការណ៍របស់ ឯកឧត្តម ចាប តូ ប្រធានមជ្ឈមណ្ឌលបណ្តុះបណ្តាលវិជ្ជាជីវៈជនពិការភ្នែករួចមក លោកជំទាវ ពុំ ចន្ទីនី បានពាំនាំនូវការសួរសុខទុក្ខ និងក្តីនឹករលឹកពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលតែងតែយកចិត្តទុកដាក់ និងស្រឡាញ់អាណិតអាសូរដល់បងប្អូនជនមានពិការភាព។ ជាមួយគ្នានេះ លោកជំទាវបានកោតសរសើរដល់ ឯកឧត្តម ចាប តូ ដែលបានដឹកនាំសមាគមឱ្យមានការរីកចម្រើន រឹងមាំ ព្រមទាំងបានផ្តល់ការបណ្តុះបណ្តាលជំនាញ និងស្វែងរកការងារធ្វើជូនសមាជិក។

​លោកជំទាវបានបន្ថែមថា ការរៀបចំពិធីសួរសុខទុក្ខ និងផ្តល់អំណោយនាឆ្នាំនេះ គឺមានលក្ខណៈប្លែកពីឆ្នាំមុនៗ ដោយមិនបានរៀបចំជាអាហារផ្លូវកាយនោះទេ ប៉ុន្តែបានរៀបចំជា «អាហារផ្លូវចិត្ត» វិញ តាមរយៈការនិមន្ត សម្ដេចព្រះឧត្ដមវង្សា បណ្ឌិត គូ សុភាព សម្តែងព្រះធម៌អប់រំចិត្ត។

​ជាចុងក្រោយ លោកជំទាវ អគ្គលេខាធិការ បានក្រើនរំលឹកដល់អង្គពិធីទាំងមូលឱ្យបង្កើនការថែទាំសុខភាព ដោយកាត់បន្ថយការបរិភោគអាហារផ្អែម ប្រៃ ខ្លាញ់ បំពង កំប៉ុង ព្រមទាំងគ្រឿងស្រវឹង និងបារី ដើម្បីជៀសវាងជំងឺមិនឆ្លងទាំង ៤ (ទឹកនោមផ្អែម បេះដូងនិងសរសៃឈាម មហារីក និងរលាកផ្លូវដង្ហើមរ៉ាំរ៉ៃ) និងត្រូវប្រកាន់ខ្ជាប់នូវអនាម័យក្នុងការរស់នៅជានិច្ច។

​សូមបញ្ជាក់ថា អំណោយលើកទី២ ប្រចាំឆ្នាំ២០២៦នេះ រួមមាន៖ ថវិកាចំនួន ១០លានរៀល ជូនដល់មជ្ឈមណ្ឌលបណ្តុះបណ្តាលវិជ្ជាជីវៈជនពិការភ្នែក (សមាគមតន្ដ្រីសំនៀងជនពិការ) និងអំណោយជូនដល់ជនមានពិការភាពចំនួន ១៥០នាក់ ដោយក្នុងម្នាក់ៗទទួលបាន៖ អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកស៊ីអ៊ីវ ១យួរ, ទឹកបរិសុទ្ធ ១កេស និងថវិកាចំនួន ៥ម៉ឺនរៀល៕ អត្ថបទ សំ ងីម