ម៉ូតូចំនួន១៣គ្រឿង ត្រូវបានផ្តល់ជូនវរសេនាតូចនគរបាលការពារព្រំដែនគោកលេខ៧០២ សម្រាប់ប្រើប្រាស់ក្នុងអង្គភាព

ឧត្តរមានជ័យ៖ ម៉ូតូំនួន១៣គ្រឿង និងគ្រឿងឧបភោគបរិភោគដែលជាអំណោយរបស់​អគ្គ​ស្នងការ​នគរបាលជាតិ ត្រូវបាន​ប្រគល់ជូន​ដល់អង្គភាពទីបញ្ជាការ​វរសេនាតូចនគរបាលការពារ​ព្រំដែនគោកលេខ៧០២ ទិសប្រាសាទតាមាន់ ខេត្តឧត្តរមានជ័យ តាមរយៈលោកឧត្តមសេនីយ៍ទោ ខូវ លី ស្នងការនៃស្នងការដ្ឋាននគរបាលខេត្តឧត្តរមានជ័យ សម្រាប់ទុកបម្រើការងារក្នុងអង្គភាព នៅព្រឹកថ្ងៃទី១៥សីហា ឆ្នាំ២០២៤នេះ។

ក្នុងពិធីនោះលោកឧត្តមសេនីយ៍ទោ ខូវ លី ស្នងការនៃស្នងការដ្ឋាននគរបាលខេត្តឧត្តឧត្តរមានជ័យ ធ្វើការផ្តាំផ្ញើរការសាកសួរសុខទុក្ខពីឯកឧត្តមអភិសតិ្តបណ្ឌិត ស សុខា ឧបនាយករដ្ឋមន្រ្តីរដ្ឋមន្រ្តី ក្រសួងមហាផ្ទៃ និងឯកឧត្តម ស ថេត អគ្គស្នងការនគរបាលជាតិ ចំពោះក្តីនឹករលឹកមកដល់បងប្អូន​កងកម្លាំងទាំងអស់គ្រប់ៗគ្នា ដែលកំពុងឈរជើងតាមខ្សែបន្ទាត់ព្រំដែន និងបានធ្វើការ​កោតសសើរ​វាយតម្លៃខ្ពស់ចំពោះ​កងកម្លាំង​វរសេនាតូចនគរបាលការពារព្រំដែន​គោកលេខ៧០២ ដែលជានិច្ចជាកាលបានខិតខំបំពេញតួនាទីការងារស្នូលរបស់ខ្លួនប្រកបដោយស្មារតីទទួលខុស ត្រូវខ្ពស់ផងដែរ។

លោកឧត្តមសេនីយ៍ទោ ខូវ លី ក៏​បានណែនាំ​ដល់កងកម្លាំងទាំងអស់​ត្រូវក្តាប់​សភាពការណ៍​រួមតាមខ្សែបន្ទាត់ព្រំដែនឲ្យបានល្អប្រសើរ ​ក្នុងដែនសមត្ថកិច្ចរបស់ខ្លួន និង​ត្រូវទប់ស្កាត់​ឲ្យខាន​តែ​បានរាល់សកម្មភាពផ្សេងៗចំពោះក្រុមជ្រុលនិយម​ដែលចង់ធ្វើការ​ញុះញង់​ប្រឆាំង​នឹងរដ្ឋាភិបាល​ស្របច្បាប់​ត្រូវធ្វើការ​ទប់ស្កាត់​បង្រ្កាប​ឲ្យបានទាន់​ពេលវេលា និង​មិន​ត្រូវឲ្យមាន​សកម្មភាព​ទាំងអស់នោះ​បានកើតឡើងក្នុងមូលដ្ឋានរបស់ខ្លួននោះទេ ។

ក្នុងនោះដែរលោកឧត្តមសេនីយ៍ទោស្នងការខេត្ត ក៏​បានប្រគល់ម៉ូតូចំនួន ១៣គ្រឿង និង​គ្រឿង​ឧបភោគ-បរិភោគ​មួយចំនួន ដល់កងកម្លាំងវរសេនាតូចនគរបាលការពារព្រំដែនកោគលេខ៧០២ សម្រាប់​បំរើជាប្រយោជន៍​ក្នុងការងារបម្រើដល់សង្គមផងដែរ៕